އެކި އުކުޅުތައް ބޭނުންކޮށްގެން މަކަރާއި ހީލަތުން ފައިސާ ހޯދާކަމަށް ބުނާ މީހަކު ކްރިމިނަލް ކޯޓުން ބަންދުކޮށްފިއެވެ.

ކޯޓުން ބަންދު ކޮށްފައިވަނީ ކ މާލެ ޒައިދާން މުޙައްމަދު ހާޝިމްއެވެ.

އެ މައްސަލައިގައި ބޭއްވި ބަންދު މަޖިލީހުގައި ފުލުހުން ބުނެފައިވަނީ، އެ ބާވަތުގެ ގިނަ މައްސަލަތަކެއް އޭނާގެ މައްޗަށް ތުހުމަތު ކުރެވިގެން ތަހުގީގު ކުރަމުންދާ ކަމަށެވެ.

އެފަދަ މައްސަލައެއް 31 މާރޗް 2022 ވަނަ ދުވަހު ޕްރޮސިކިއުޝަނަށް ބަލައިގެންފައިވާކަމަށް ދައުލަތުގެ ވަކީލު ވިދާޅުވެއެވެ. އެގޮތުން އެ މައްސަލައަކީ ޖިނާއީ ބޮޑު މައްސަލައެއް ކަމަށާއި، އިތުރު ފަރާތަކަށް މިފަދަ ކުށެއްގެ ޝިކާރައަކަށް ވިޔަ ނުދިނުމަށްޓަކައި އޭނާ ބަންދުގައި ބަހައްޓައި ދިނުމަށް އެދޭކަމަށް ދައުލަތުން ބުނެއެވެ.

އޭގެ އިތުރުން، އޭނާ ބަދަލު ދޭންޖެހޭ އެއްވެސް ފަރާތަކަށް މިހާތަނަށް ބަދަލު ދީފައި ނުވާކަމަށް ޕީޖީ ވަކީލު ފާހަގަ ކުރައްވައެވެ.

މި މައްސަލައިގައި ފުލުހުން ފާހަގަ ކޮށްފައިވާ ގޮތުގައި "ހޯމްވޯރކް" ފިހާރައިން ބޮޑެތި ޢަދަދުތަކުން ގަނެވިއްކުމުގެ މުޢާމަލާތް އޭނާ ވަނީ ކޮށްފައެވެ. އަދި މުދަލުގެ އަގަށް ވަގުތުން ފައިސާ ދޭންޖެހޭއިރު، އޭނާގެ ނަމުގައިވެސް ނުވަތަ އޭނާގެ ކުންފުނީގެ ނަމުގައިވާ އެއްވެސް އެކައުންޓެއްގައިވެސް އެ މިންވަރަށް ފައިސާ ނެތްކަމަށް މި މައްސަލައިގެ އައިއޯއިން ވަނީ ފާހަގަކޮށްފައެވެ.

ހޯމްވޯރކް ފިހާރައިން އޮޅުވާލައިގެން ނެގިކަމަށް ބެލެވޭ ފިލާތައް ހުރީ ރަޖިސްޓްރީ ނުކުރާ ކުންފުންޏެއްގެ ނަމުގައި ވިއްކާފައިވާކަމަށް ބެލެވޭ ހެކިތަކެއް ތަހުޤީޤަށް ލިބިފައިވާކަމަށް އައިއޯއިން ވަނީ ބުނެފައެވެ. އަދި މިއީ އަނިޔާވެރިކަމެއް ހިމެނިފައިނުވާ ކުށެއް ކަމުގައި ވީނަމަވެސް، އޭނާއަކީ އެކި އެކުޅުތައް ބޭނުން ކޮށްގެން އޮޅުވާލައިގެން ތަކުރާރުކޮށް މަކަރާހީލަތް ހަދަމުންދާ މީހެއްކަމަށް ބެލެވޭކަމަށް ފުލުހުން ބުނެއެވެ.

ވުމާއެކު، އޭނާ މުޖުތަމަޢުގެ ތެރެއަށް ދޫވުމަކީ މުޖުތަމަޢުގައި އުޅޭ އަފްރާދުންނަށް ނުރައްކަލެއް އޮންނާނެ ކަމެއްގެ ގޮތުގައި ޝަރީއަތަށް ބުރަވެވޭކަން ޝަރީއަތުން ވަނީ ފާހަގަކޮށްފައެވެ. އަދި އޭނާ ފްލައިވުޑް ފިލާ ގަންނަން މުޢާމަލާތު ކޮށްފައިވަނީ އަގު އަދާކުރާނެ ގޮތެއް ނެތިކަމަށް ބުރަވެވޭކަންވެސް ޝަރީއަތުން ފާހަގަ ކުރެއެވެ.

ޝަރީއަތުން ފާހަގަކުރާ ގޮތުގައި އެ ކަންކަމުން އޭނާ މި މުޢާމަލާތް ކޮށްފައިވަނީ ކުށްކުރުމުގެ ނިޔަތުގައިކަމަށް ބެލެވެއެވެ.

އެކަންކަމާއި ގުޅިގެން އޭނާ ކޯޓުގައި ދައްކާފައިވާ ވާހަކަތަކަށް ބަލާއިރު، އޭނާ ބަންދުން ދޫކޮށްލާތާ 1 މަސް ދުވަހުގެ ތެރޭގައި ފައިސާ ދައްކާ ޚަލާޞް ކުރާނެކަމަށް ވަނީ ބުނެފައެވެ. އަދި އެއީ މަދަނީ މުޢާމަލާތުތަކެއް ކަމަށާއި، ބަންދު ކޮށްފިނަމަ ފައިސާ ނުދެއްކި އިތުރަށް ލަސްވާނެކަމަށް އޭނާގެ ފަރާތުން ވަނީ ބުނެފައެވެ.

އޭނާއަކީ ކުށުގެ ރެެކޯޑުވެސް އޮތް މީހެކެވެ. ކޯޓުން ވަނީ އޭނާ 15 ދުވަހަށް ބަންދު ކުރުމަށް އަމުރުކޮށްފައެވެ.

ކްރިމިނަލް ކޯޓުގައި މި މައްސަލަ ނިންމެވީ ގާޒީ މުޙައްމަދު މިސްބާޙުއެވެ.

މި އަޑުއެހުން ތާވަލުކޮށްފައި އޮތީ އާދިއްތަ ދުވަހުގެ ހެނދުނު 10:30 އަށެވެ.