ސިއްހީ ކުއްލި ނުރައްކަލުގެ ހާލަތުގައި ރޯދަމަސް

2020 ވަނަ އަހަރުގެ މާރޗް މަހު ރާއްޖެއިން ކޮވިޑް-19ގެ ކޭސްތައް ފެންނަން ފެށުމާއެކު، އެއަހަރުގެ އޭޕްރީލް މަހުގެ 17 ވަނަ ދުވަހު މުޅި މާލެ ސަރަހައްދު ލޮކްޑައުންކުރިއެވެ. އެއާއެކު އާންމު ދިރިއުޅުމުގައި ކުރަމުން އައި އެތައް ކަމަކަށް ހުއްޓުން އައެވެ. އެއްވުންތައް ބޭއްވުމާއި، ބޭރަށް ނިކުމެ އުޅުމާއި އޮފީސްތައް ބަންދުކޮށް، ގޭގައި ތިބެގެން އޮންލައިންކޮށް މަސައްކަތް ކުރުންފަދަ ދަތި އެތައް ކަމަކާއި ކުރިމަތިލާން ޖެހުނެވެ. އަދި ޒަރޫރީ ބޭނުމެއްގައި ބޭރަށް ނިކުންނަން ހުއްދަ ދިން ނަމަވެސް އެއީ ވަރަށް ކުޑަ ވަގުތުކޮޅެކެވެ.

އެފަދަ ހާލަތެއްގައި އުޅެނިކޮށް އޭޕްރީލް މަހުގެ 23 ވަނަ ދުވަހު އެ އަހަރުގެ ރަމަޟާން މަސް ފެށުނެވެ. ރަމަޟާން މަހަކީ އަޅުކަމުގެ މައްސަރެއް ނަމަވެސް މިއީ އާއިލާއާއި ރައްޓެހިންނާ ދިމާވެލައި، ހިތްހަމަޖައްސާލުމަށް ލިބޭ ފުރުސަތެއްވެސް މެއެވެ. މިގޮތުން މާހެފުންތައް ބޭއްވުމާއި، ރޯދަ ވީއްލުމާއި، ތަރާވީހަށްފަހު އާއިލާގެ އެންމެން އެކުވެލައި އުޅުން ފަދަ ކަންކަން ކުރެއެވެ. އެހެންނަމަވެސް 2020 ވަނަ އަހަރުގެ ރަަމަޟާން މަހު މިފަދަ އެއްވެސް ކަމެއް ކޮށްލުމުގެ ފުރުސަތެއް ލިބިގެނެއް ނުދިޔައެވެ. އެއަށްވުރެ ރާއްޖޭގެ ކޮވިޑް-19ގެ ހާލަތު ގޯހެވެ. އެ ދުވަސްވަރު އާއިލާގެ މީހަކާއި ބައްދަލުކޮށްލަން ބޭނުންނަމަ އެކަން ކުރެވެނީ ވީޑިއޯ ކޯލަކުންނެވެ.

އެ ދުވަސްވަރު ދިވެހިން ކުރަންޖެހުނީ އުނދަގޫ ތަޖުރިބާއެކެވެ. އެހެންނަމަވެސް ބޭރަށް ނިކުމެ ނޫޅެވުނަސް، ގެއަށް ބޭނުންވާ މުދާ ހޯދުމުގައި އެއްވެސް ކަހަލަ ދައްޗަކާއި ކުރިމަތިލާކަށް ނުޖެހުނެވެ. ރެސްޓޯރެންޓަކަށް ގޮސް ކާލާނެ ފުރުސަތު ނުލިބުނަސް ތަންތަނުން އެއްޗެހި ގެނެސްގެން ކެއުމުގެ ފުރުސަތު ލިބުނެވެ. ގޭގައި ކައްކާ އެއްޗެއް އާއިލާގެ އެހެން ގޭގެއަށް ނުފޮނުވުނަސް، ރެސްޓޯރެންޓުތަކުންނާއި، ކުދި ކުދި އޮންލައިން ވިޔަފާރިތަކުން ގެންދިޔައީ އެމީހަކު ބުނި ތަނަކަށް އެ ބޭނުންވާ އެއްޗެއް ޑެލިވަރީ ކޮށްދެމުންނެވެ. އަދި ކޮޗިޑް-19ގެ ހާލަތުގައި ރާއްޖޭގެ އިގްތިސާދަށް ކިތަންމެ ބޮޑު ހީނަރުކަމެއް އައިކަމުގައިވިޔަސް ސަރުކާރުން ގެންދިޔައީ އެއްވެސް ރައްޔިތަކަށް އެއްޗަކަށް ދަތިނުވެ އުޅެވޭކަން ޔަގީންކުރަމުންނެވެ.

އާއިލާގެ މީހަކާއި، ގާތް ރަހުމަތްތެރިއަކާވެސް ބައްދަލުނުވެ އެ އަހަރުގެ ރަމަޟާން މަސް ނިމިގެން ދިޔައީއެވެ. އެއަށްފަހު 2021 ވަނަ އަހަރުގެ ރަމަޟާން މަސް ބައްދަލުކުރިއިރުވެސް ރާއްޖޭގައި ކޮވިޑް-19 ފެތުރެމުންދެއެވެ. އެހެންނަމަވެސް ކުރިން އަޅާފައިވާ ގިނަ ފިޔަވަޅުތަކަކަށް ލުއި ދީފައިވެއެވެ. އެޗްޕީއޭއިން ކަނޑައަޅާފައިވާ އަދަދަށް މީހުން ބައިވެރިކޮށްގެން އެއްވުންތައް ބޭއްވުނެވެ. އެހެންނަމަވެސް މާސްކު އެޅުމާއި ގައިދުރުކަން ބަހައްޓަން ޖެހުނެވެ. 2021 ވަނަ އަހަރުގެ ރަމަޟާން މަހަކީ އޭގެ ކުރީ ރަމަޟާން މަހާއި އަޅާ ބަލާއިރު ފަސޭހަ ރަމަޟާން މަހެކޭ ބުނެވިދާނެއެވެ. އާއިލާގެ އެންމެން އެކުވެ އެއްވުންތައްވެސް ބޭއްވުނެވެ. އެހެންނަމަވެސް ފިޔަވަޅުތަކަކާއި އެކުއެވެ.

މިދިޔަ ދެ އަހަރާއި އަޅާ ބަލާއިރު މިއަހަރުގެ ރަމަޟާން މަސް ހާސްބައި ތަފާތެވެ. މިދިޔަ މާޗް މަހުން ފެށިގެން އެޗްޕީއޭއިން ވަނީ ކޮވިޑް-19 ގެ ހާލަތާއެކު ރާއްޖޭގައި ހިންގާފައިވާ ސިއްހީ ކުއްލި ނުރައްކަލުގެ ހާލަތު އުވާލާފައެވެ. އަދި އެއާއެކު އަޅާފައިވާ ހުރިހާ ފިޔަވަޅުތަކެއް ވެސް ވަނީ އުވާލާފައެވެ. މާސްކު އަޅަން މަޖުބޫރުނުވެ، އެއްވުންތައް ބޭއްވުމަށް ހުއްދަ ލިބިގެންދިޔައެވެ. މިއާއެކު މިއަހަރުގެ ރަމަޟާން މަސް ފެށިގެން އައީ ދިވެހިންގެ އާދައާއި އެއްގޮތަށޭ ބުނެވިދާނެއެވެ. ގިނަ އާއިލާތައް އެކުވެ މާހެފުން ބާއްވާފައިވެއެވެ. އަދި އޮފީސްތަކުގައި މާހެފުން ބޭއްވުމާއި، ރައްޓެހިންގެ މެދުގައިވެސް މާހެފުން ބާއްވާފައިވެއެވެ.

މި ހުރިހާ ކަމެއް މިހެން ހުރިއިރު މިއަހަރުގެ ރަމަޟާން މަސް ފާއިތުވި 2 އަހަރާއި އަޅާ ބަލާއިރު ތަފާތުވާނެކަން އެނގެއެވެ. ރަމަޟާން މަހުގެ ހަވީރު ވަގުތު ފިނި ބުރު ޖަހާލަން ނިކުމެވުމާއި، ރޯދަވީއްލުންތައް ބޭއްވުމާއި، ތަރާވީހަށްފަހު އެންމެން އެކުވެ އުޅުމުގެ ފުރުސަތު އެއްވެސް ދައްޗެއް ނެތި މިހާރު މިވަނީ ލިބިފައެވެ.