މެންޗެސްޓަރ ޔުނައިޓެޑް ބަލިނުވެ ސަލާމަތްވީ ކިރިޔާ

އިނގިރޭސި ޕްރިމިއަރ ލީގުގައި ލެސްޓަރ ސިޓީ އަތުން ކިރިޔާ ބަލިނުވެ, މެންޗެސްޓަރ ޔުނައިޓެޑް ސަލާމަތްވެއްޖެއެވެ. މެޗު ނިމުނީ 1-1 ން އެއްވަރުވެގެންނެވެ. މެޗުން މެންޗެސްޓަރ ޔުނައިޓެޑް ސަލާމަތްކޮށްދިނީ ފްރެޑް ޖެހި ގޯލުންނެވެ. އޭގެކުރިން ލެސްޓަރ ސިޓީއަށް ލަނޑު ޖަހައިދިނީ އިހަނާޗޯއެވެ.

މެޗުގައި އިހަނާޗޯއަށް ލަނޑު ޖަހަން ފުރުޞަތު ތަނަވަސްކޮށްދިނީ މަޑިސަންއެވެ. އޭނާ ވަނީ މެޗުގައި ލަނޑެއްވެސް ޖަހާފައެވެ. އެކަމަކު ވީއޭއާރުން ބެލުމަށްފަހު ރެފްރީ ލަނޑު ބަލައެއް ނުގަތެވެ.

ރޮނާލްޑޯއާއި ނުލާ ކުޅެ މެންޗެސްޓަރ ޔުނައިޓެޑަށް މެޗުން މޮޅުނުވެވުމުން, ގަދަ ހަތަރެއްގެ ޖާގައަކާއި ދެމެދު 4 ޕޮއިންޓްގެ ފަރަޤެއް އެބައޮތެވެ. ޔުނައިޓެދް އޮތީ 50 ޕޮއިންޓާއެކު ހަ ވަނާގައެވެ. ހަތަރު ވަނާގައި އާސެނަލް އޮތީ 54 ޕޮއިންޓާއެކުއެވެ. އާސެނަލްއަށް ޔުނައިޓެޑަށްވުރެ އިތުރަށް ދެ މެޗު އެބައޮތެވެ.