ޕީއެސްވީގެ ކޯޗަކަށް ރުޑް ވެން ނިސްތެލްރޫއީ
31 މާރިޗު 2022 | ބުރާސްފަތި 02:32ނިސްތެލްރޫއީ ޕީއެސްވީއާ ހަވާލުވާނީ ކުރިއަށް އޮތް ސީޒަނުން ފަށައިގެން
ރުޑް ވެން ނިސްތެލްރޫއީ: ފޮޓޯ-ޕީއެސްވީ
ނެދަލެންޑްސްގެ ޕީއެސްވީގެ ކޯޗަކަށް އެކްލަބާއި, މެންޗެސްޓަރ ޔުނައިޓެޑްގެ ކުރީގެ ތަރި ރުޑް ވެން ނިސްތެލްރޫއީ ހަމަޖައްސައިފިއެވެ. ކުރީގެ ފޯވާޑް ޕީއެސްވީގެ ހެޑް ކޯޗުކަމާއި ހަވާލުވާނީ 2022/2023 ވަނަ އަހަރުގެ ސީޒަނުން ފަށައިގެންނެވެ.
މިއީ މެންޗެސްޓަރ ޔުނައިޓެޑްގެ އިތުރުން ރެއާލް މެޑްރިޑާއެކުވެސް ކާމިޔާބުހޯދި ފޯވާޑްގެ ކޯޗިންގ ކެރިއަރުގައި ސީނިއަރ ބޮޑު ޓީމެއްގެ ހެޑްކޯޗުކަން ކުރާ ފުރަތަމަ ފަހަރެވެ. އޭނާ ޕީއެސްވީއާ ހަވާލުވަނީ އެކްލަބްގެ މިހާރުގެ ކޯޗު މިސީޒަން ނިމުމުން ކްލަބާ ވަކިވުމުންނެވެ. މިހާރުގެ ކޯޗު ރޮޖާގެ އެއްބަސްވުން މިސީޒަންގެ ނިޔަލަށް ހަމަވާނެއެވެ. ނިސްތެލްރޫއީ ބުނީ ޕީއެސްވީގެ ހެޑްކޯޗުކަމަކީ އޭނާގެ އަބަދުގެވެސް ހުވަފެނެއް ކަމަށެވެ.
ރުޑް ވެން ނިސްތެލްރޫއީ ވަނީ ޕީއެސްވީއަށް ކުޅުނު 67 މެޗުން 62 ގޯލް ޖަހާފައެވެ. އެކްލަބް ދޫކޮށް އޭނާ ބަދަލުވީ މެންޗެސްޓަރ ޔުނައިޓެޑަށެވެ. ޔުނައިޓެޑާއެކު ޕްރިމިއަރ ލީގާއި, އެފްއޭކަޕާއި ލީގުކަޕްވެސް ހޯދިއެވެ. އޭގެފަހުން ރެއާލް މެޑްރިޑަށް ބަދަލުވެ, އެކްލަބާއެކު ލަލީގާ ދެފަހަރު ހޯދިއެވެ. ކުޅުން ހުއްޓާލީ 2012 ވަނަ އަހަރުއެވެ. ކުޅުން ހުއްޓާލުމަށްފަހު ނެދަލެންޑްސްގެ ޤައުމީ ޓީމްގެ ކޯޗުން ޓީމާއެކު ދެ އަހަރު މަސައްކަތްކުރިއެވެ. ކޯޗިންގައި އޭނާ ވަނީ ޕީއެސްވީގެ ޔޫތް ޓީމްގައި މަސައްކަތްކޮށްފައެވެ.
ޕީއެސްވީ ވަނީ ޑަޗް ލީގު 24 ފަހަރު ކާމިޔާބުކޮށްފައެވެ. އެކަމަކު 2018 ވަނަ އަހަރުގެ ފަހުން ލީގު ކާމިޔާބެއް ނުކުރެވެއެވެ. މިސީޒަންގައި އޮތީ އެއްވަނާގައި އޮތް އަޔެކްސްއަށްވުރެ ދެ ޕޮއިންޓް ފަހަތުގައެވެ.
