މިހާރު ކުރިއަށްދާ ޔުއެފާ ނޭޝަންސް ލީގުގައި ނެދަލެންޑްސް ކުޅުނު ފުރަތަމަ މެޗު ކާމިޔާބުކޮށްފިއެވެ.

ހުކުރު ދުވަހުގެރޭ ކުޅުނު މި މެޗުގައި ވަރުގަދަ ބެލްޖިއަމްގެ މައްޗަށް ނެދަލެންޑްސް ކުރިހޯދީ 4-1ންނެވެ. ޑިވިޝަން އެކެއްގެ ގްރޫޕް ޑީގައި، ބެލްޖިއަމް ދަނޑުގައި ކުޅުނު މި މެޗުގައި ނެދަލެންޑްސް ލީޑްނެގީ ފުރަތަމަ ހާފުގެ 40 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ސްޓީވެން ބާގްވެއިންއެވެ. ފުރަތަމަ ހާފުގައި ބެލްޖިއަމްގެ ޑިފެންޑަރު ރޮމެއޫ ލުކާކޫއަށް އަނިޔާވެގެން އޭނާ ވަނީ ބަދަލުކޮށްފައެވެ.

ދެވަނަ ހާފުގައި ނެދަލެންޑްސްއިން ތިން ލަނޑު ޖެހިއިރު، ބާސެލޯނާއަށް ކުޅެމުން އަންނަ މެމްފިސް ޑިޕާއީ ދެލަނޑު ޖެހިއެވެ. ނެދަލެންޑްސްގެ އަނެއް ލަނޑު ކާމިޔާބުކޮށްދިނީ ޑެންޒެލް ޑަމްފްރީސްއެވެ. ބެލްޖިއަމްގެ ހަމައެކަނި ލަނޑު ދެވަނަ ހާފުގެ އިތުރު ވަގުތުގައި ކާމިޔާބުކޮށްދިނީ، ބަދަލު ކުޅުންތެރިއެއްގެ ގޮތުގައި ކުޅެން އެރި މިޝީ ބަޓްޝުއާޔީއެވެ.

މި މޮޅާއެކު ނެދަލެންޑްސް ވަނީ އެޓީމު އެންމެ ފަހުން ކުޅުނު 10 މެޗުންވެސް ބަލިނުވެ ސަލާމަތްވެފައެވެ.

ގްރޫޕްގެ އެއްވަނާގައި ތިން ޕޮއިންޓާއެކު ނެދަލެންޑްސް އޮތްއިރު، ދެވަނާގައި ޕޮލެންޑްވެސް އޮތީ ތިން ޕޮއިންޓު ހޯދައިގެންނެވެ. ގްރޫޕްގެ ފުރަތަމަ މެޗުގައި ޕޮލެންޑް ވަނީ 2-1ން ނެދަލެންޑްސް ބަލިކޮށްފައެވެ. ޕޮއިންޓެއް ނުލިބި، ވޭލްސް ތިންވަނާގައި އޮތްއިރު، ބައިކޮޅަށް ގިނަ ގޯލު ވަނުމުން، ޕޮއިންޓަކާ ނުލައި ފުލުގައި އޮތީ ބެލްޖިއަމްއެވެ.