ޒީރޯއަކުން ހީރޯއަކަށް!

ފީފާ ވޯލްޑް ކަޕް މުބާރާތަކީ އެ މުބާރާތުގައި ވާދަކުރާ 32 ޤައުމަށް ވެސް ވަރަށް މުހިންމު މުބާރާތެކެވެ.

ދުނިޔޭގެ ބޮޑެތި ބާރުތަކުގެ ގޮތުގައި ދެކެމުން އަންނަ ޓީމުތަކުން ފެށިގެން، އާދައިގެ ޓީމުތައް ވެސް ނުކުންނަނީ މުބާރާތް ކާމިޔާބު ކުރުމުގެ މަޤްސަދުގައެވެ. ނޫންނަމަ ދެވެން އޮތް އެންމެ ދުރަކަަށް ދިޔުމުގެ މަޤްސަދުގައެވެ. އެ ދަތުރުގައި ޓީމުތަކުގެ ކޯޗުން އިސްކަން ދެނީ އެންމެ މޮޅެތި ކުޅުންތެރިންނަށެވެ. ތަޖުރިބާ ހުރި ކުޅުންތެރިންނަށް ބޮޑަށް އިސްކަންދޭއިރު، ޒުވާން ކުޅުންތެރިންނަށް ވެސް އިސްކަން ދެއެވެ.

މިހާރު ޤަތަރުގައި ކުރިއަށްދާ ފީފާ ވޯލްޑް ކަޕްގައި ވެސް ޒުވާން ކުޅުންތެރިން ފެނިގެންދެއެވެ. ޓީމުތަކުން އެ ކުޅުންތެރިން އަންނަނީ ވެސް މޮޅު ކުޅުމެއް ދައްކަމުންނެވެ. ފޯވާޑުންނާއި، މިޑްފީލްޑަރުންނެވެ. ޑިފެންޑަރުންނެވެ. ނަމަވެސް މިފަހަރު ބަލާލަން މިއުޅެނީ ޒީރޯއަކުން ހީރޯއަކަށް ވީ ގޯލް ކީޕަރަކަށެވެ. ޓީމުގެ އެންމެ މުހިންމު މަގާމުގައި އޭނާ ދައްކައިދިން ޔަގީންކަމުގެ ވާހަކައެވެ.

މުބާރާތަށް ނެދަލެންޑްސް ކުރިމަތިލީ އަށް އަހަރަށްފަހުއެވެ. އެންމެ ފަހުން 2014 ވަނަ އަހަރު ބްރެޒިލްގައި އޮތް މުބާރާތުން އެ ޤައުމު ކެޓީ ސެމީ ފައިނަލުންނެވެ. އެއަށްފަހު 2018 ވަނަ އަހަރުވެ މުބާރާތުން ގެއްލުމަށްފަހު، މިއަހަރުގެ މުބާރާތަށް އައި އިރު ޓީމުގައި ކީޕަރެއްގެ މައްސަލަ ބޮޑެވެ. އިތުބާރު ހިފޭ ކީޕަރެއް ނެތުމަކީ އެ ޓީމަށް އޮތް އެންމެ ބޮޑު ބިރުކަމަށް ކޯޗު ލުއިސް ވެން ހާލް ވެސް ވަނީ ބުނެފައެވެ.

މުބާރާތަށް ނެދަލެެންޑްސް ކުރިމަތިލީއިރު ކީޕަރުގެ ބިރާއެކު ކޯޗު ވެން ހާލް ފުރުސަތު ދިނީ އުމުރުން 28 އަހަރުގެ އެންޑްރިއަސް ނޮޕާޓް އަށެވެ. މުބާރާތުގެ ފުރަތަމަ މެޗުން ފެށިގެން ގަދަ 16އާ ހަމަ އަށް ނޮޕާޓް ވަނީ އިތުބާރާއެކު ނެދަލެންޑްސްގެ ގޯލު ބަލަހައްޓާފައެވެ. މުބާރާތުގައި މިހާތަނަށް ކުޅުނު ހަތަރު މެޗުން އޭނާގެ ކޮޅަށް ވަނީ ހަތަރު ގޯލެވެ. ގިނަ މެޗުތަކުގައި އޭނާ ވަނީ މުހިންމު ބޯޅަތަކެއް ދިފާއު ވެސް ކޮށްފައެވެ. އެއާއެކު ވެން ހާލްގެ އިތުބާރު މިހާރު އޭނާ އަށް އޮވެއެވެ.

ނޮޕާޓް ބުނީ އަބަދުވެސް ކުޑައިރު އޭނާ ދެކެމުން އައި ހުވަފެއް އޮތް ކަމަށެވެ. އެއީ ނެދަލެންޑްސްއާއެކު ފީފާ ވޯލްޑް ކަޕްގައި ކުޅުމެވެ. ނޮޕާޓް ބުނީ އޭނާގެ ކެރިއަރަށް ބަލައިފިނަމަ، އޭނާ އަށް އެކަން ނުވާނެ ކަމަށް ޤަބޫލު ވެސް ކުރެވުނު ކަމަށެވެ. އެހެންކަމުން އެ ހުވަފެން އެއް ފަރާތްކޮށްލަން ޖެހުނު ކަމަށް ވެސް ނޮޕާޓް ބުންޏެވެ. ނަމަވެސް ނޮޕާޓް ބުނީ އޭނާއަށް ފުރުސަތު ލިބުނީ ނޭނގުމެއްގެ ތެރެއިން ކަމަށެވެ. އޭނާ ކުރި ކުރި މަސައްކަތާއި، ހިތްވަރަށް ބަލާފަ ކޯޗު އޭނާ އަށް ފުރުސަތު ދިނީ ކަމަށެވެ. އެހެންކަމުން އެކަމާ މިހާރު ފަޚުރުވެރިވާކަން ފާހަގަ ކުރަމުން ނޮޕާޓް ބުނީ މަސައްތަކައިގެ ކުރިއަށް ދަނީ އުފަލުން ކަމަށެވެ.

ނޮޕާޓްގެ ކުލަބުގެ ތަޖުރިބާ ވެސް މަދެވެ. ޤައުމީ ޓީމުގެ ތަޖުރިބާ އަދި މާ މަދެވެ. ނެދަލެންޑްސް ޤައުމީ ޓީމުގައި އޭނާ ހިމެނުނީ ވެސް މިއހަރުއެވެ. މިހާތަނަށް ކުޅުނީ ހަތަރު މެޗެވެ. އެއީ ވޯލްޑް ކަޕްގައި ކުޅުނު ހަތަރު މެޗެވެ. ނަމަވެސް ހަތަރު މެޗުން ވެސް ނޮޕާޓް ވަނީ އޭނާގެ ފެންވަރު ދައްކައިދީފައެވެ. އިތުބާރާއެކު ގޯލް ބެލެހެއްޓޭނެކަމުގެ ޔަގީންކަމެވެ. ކުއާޓާ ފައިނަލްގައި އާޖެންޓީނާއާ ދެކޮޅަށް ނިކުންނައިރު، ވެން ހާލަށް އެންމެ އިތުބާރު އޮންނާނީ ވެސް އެ ޓީމުގެ ގޯލަށެވެ. ޒީރޯ އިން ހީރޯ އަށްވީ ނޮޕާޓްއަށެވެ.