2014ގެ ޓީމަށް ވުރެ ނެދަލޭންޑްސްގައި މިހާރު އޮތް ޓީމު ކޮލެޓީ: ވެންހާލް

މީގެ ކުރިން 2014 ވަނަ އަހަރުގެ ފީފާ ވޯލްޑް ކަޕްގައި ނެދަލޭންޑްސްގައި އޮތް ޓީމަށް ވުރެ މިހާރު އޮތް ޓީމު ކޮލެޓީ ކަމަށް ކޯޗު ލުއިސް ވެންހާލް ބުނެފިއެވެ.

އަށް އަހަރަށްފަހު މިއީ ނެދަލޭންޑްސް ވޯލްޑް ކަޕަށް ނުކުންނަ ފުރަތަމަ ފަހަރެވެ. އެންމެ ފަހުން އެ ޓީމު ކުޅެފައިވަނީ 2014 ވަނަ އަހަރު ބްރެޒިލްގައި އޮތް ވޯލްޑް ކަޕެވެ. އެ އަހަރުގެ މުބާރާތުގައި ނެދަލޭންޑްސް އިން ވަނީ ތިން ވަނަ ހޯދާފައެވެ. އޭރުގެ ވެސް އެ ޓީމުގެ ކޯޗަކަށް ހުރީ ވެންހާލްއެވެ.

މިއަހަރުގެ މުބާރާތުގެ ގްރޫޕް ސްޓޭޖުގެ ފުރަތަމަ މެޗުގައި އެފްރިކާގެ ޗެމްޕިއަން ސެނެގާލާ ދެކޮޅަށް ނުކުންނަ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ވެންހާލް ބުނީ، ޓީމުގައި މިހާާރު ތިބި ކުޅުންތެރިންނަކީ ވަރަށް ގުޅުން ބަދަހި، އެކުގައި މަސައްްކަތް ކުރާ ކުޅުންތެރިންތަކެއް ކަމަށެވެ. އޭނާ ބުނީ ޤަބޫލު ކުރެވޭ ގޮތުގައި ޓީމުގެ ކުޅުންތެރިން އަބަދުވެސް ކާމިޔާބަށް ވާސިލްވުމަށް މަސައްކަތް ކުރާ ކަމަށެވެ.

ވެންހާލް ބުނީ މިހާރު ޓީމުގައި ތިބި ކުޅުންތެރިންނާމެދު އޭނާގެ އުންމީދު އޮތް ކަމަށެވެ. ވެންހާލް ބުނީ 2014 ވަނަ އަހަރުގެ މުބާރާތުގައި ނެދަލޭންޑްސް ތިން ވަނަ އަށް ދިޔައިރު، އޭރު ސްކޮޑުގައި ތިބީ ނިސްބަތުން ފެންވަރު އެހާ ރަނގަޅު ކުޅުންތެރިން ނޫން ކަމަށެވެ. ނަމަވެސް މިހާރު އޮތް ސްކޮޑާއެކު އޭރުގެ ނަތީޖާއަށްވުރެ މަތީ ނަތީޖާ އަކަށް އުންމީދުކުރާ ކަމަށް އޭނާ ބުންޏެވެ.

މީގެ އިތުރުން ވެންހާލް ބުނީ ޓެކްނިކަލް އަދި ޓެކްޓިކަލް ސްކިލް އަށް އެކަނި ބާރޯސާ ނުވެވޭނެ ކަމަށެވެ. އޭނާ ބުނީ ބައެއް ފަހަރު ނަސީބު ވެސް ދިމާވާން ޖެހޭނެ ކަމަށެވެ. ވެންހާލް ބުނީ އެގޮތަށް އެކަން ވާނީ މެޗުގެ އެންމެ ރަނގަޅު ވަގުތުގައި ލަނޑު ޖަހާ ނަތީޖާ ނެރެވިގެން ކަމަށާއި، އަދި އިދިކޮޅު ޓީމުން ލަނޑެއް ޖެހިޔަ ނުދީގެން ކަމަށެވެ. އޭނާ ބުނީ އެ މަގުން މަސައްކަތްކޮށްފި ނަމަ ދުނިޔޭގެ ޗެމްޕިއަނުންނަށް ވެވޭނެ ކަމަށެވެ. ނަމަވެސް ވެންހާލް ބުނީ އޭނާއާއެކު ނެދަލޭންޑްސްގައި އޮތް ސްކޮޑަށްވުރެ ވެސް މާ މޮޅެތި ކުޅުންތެރިން ހިމެނޭ ޓީމުތައް މުބާރާތުގައި އޮތް ކަމަށެވެ.

މެޗާ ގުޅޭ ގޮތުން ވާހަކަ ދައްކަމުން ނެދަލޭންޑްސްގެ ކެޕްޓަން ވާޖިލް ވެންޑައިކް ބުނީ އޭނާ ހުރީ ވަރަށް ހަމަޖެހިގެން ކަމަށާއި، ކުޅުންތެރިން ވެސް ތިބީ ހަމަޖެހިގެން ކަމަށެވެ. އޭނާ ބުނީ ވޯލްޑް ކަޕާ ކުރިމަތިލާއިރު އޭނާ ހުރީ ވަރަށް އުފަލުން ކަމަށެވެ. ވެންޑައިކް ވަނީ ސެނެގާލްގެ ފޯވާޑް ސަޑިއޯ މާނޭގެ ވާހަކަ ދައްކާފައެވެ. އޭނާ ބުނީ ކުރިން އެއް ޓީމަކަށް ކުޅުނު ރަހުމަތްތެރިޔާއާ އޭނާ ގުޅި ކަމަށެވެ. ވެންޑައިކް ބުނީ މާނޭ އަށް މުބާރާތުގައި ނުކުޅެވުމަކީ އޭނާ އަށް ވެސް ލިބޭ ހިތާމައެއް ކަމަށެވެ.

ނެދަލޭންޑްސް އާއި ސެނެގާލް ބައްދަލުކުރާ މެޗު އޮންނާނީ ހޯމަ ދުވަހުގެ ރޭ ރާއްޖެ ގަޑިން 21:00 ގައެވެ.