ފުލުހުންގެ އަހަރީ ދުވަހުގެ މުނާސަބަތުގައި މިރޭ ހުޅުމާލޭގައި ހަވާ އަރުވަނީ

ފުލުހުންގެ އަހަރީ ދުވަހުގެ މުނާސަބަތުގައި މިރޭ ހުޅުމާލޭގައި ހަވާ އެރުވުމަށް ނިންމައިފިއެވެ.

ފުލުހުންގެ 89 ވަނަ އަހަރީ ދުވަސް ފާހަގަކޮށްފައިވަނީ އަންގާރަ ދުވަހުއެވެ. އެކަމަށްޓަކައި ޚާއްސަ ޖަލްސާއެއްވެސް އަންގާރަ ދުވަހުގެ ރޭ ވަނީ ބާއްވާފައެވެ. ހަމައެއާއެކު، އެކަމަށްޓަކައި ޚާއްސަ ދިދަ ނެގުމުގެ ރަސްމިއްޔާތެއްވެސް ބާއްވާފައިވެއެވެ.

ބުދަ ދުވަހު ފުލުހުން ކުރި ޓްވީޓެއްގައި ބުނެފައިވަނީ، ފުލުހުންގެ 89 ވަނަ އަހަރީ ދުވަހުގެ މުނާސަބަތުގައި 2022 މާރިޗު 30 ވަނަ ދުވަހުގެ ރޭ 23:00 ގައި، ހުޅުމާލެ ސެންޓްރަލް ޕާކްގައި ހަވާއެރުވުން ބޭއްވުމަށް ހަމަޖެހިފައިވާ ކަމަށެވެ.

ދިވެހި ފުލުހުންގެ ޚިދުމަތް ރަސްމީކޮށް ފެށިގެން ދިޔައީ 1933 މާރިޗު 29 ވަނަ ދުވަހުއެވެ.

ދިވެހިންގެ ފުލުހުންގެ ޚިދުމަތުން މައުލޫމާތުދޭ ގޮތުގައި މި ގާނޫނު އަސާސީގެ ދަށުން އެންމެ ފުރަތަމަ އުފެދުނު ފުލުހުންގެ ފައުޖުގައި ހިމެނެނީ 120 ފުލުހުންނެވެ. މި ފައުޖު ބެހިފައިތިބީ މާލޭގެ ހަތަރު އަވަށުގެ މައްޗަށެވެ. އެއީ މާފަންނު، މައްޗަންގޮޅި އަދި ހެންވޭރު، މިއިން ކޮންމެ އަވަށަކަށް 32 މީހުންނެވެ. ގަލޮޅަށް 24 މީހުންނެވެ.

ދިވެހި ފުލުހުންގެ ޚިދުމަތަށް 89 އަހަރު ވެފައިވާއިރު، ދާދި ފަހުން ވަނީ ދިވެހި ފުލުހުންގެ ޚިދުމަތުގެ އައު ގާނޫނަށް އަމަލުކުރަންވެސް ފަށާފައެވެ.