އަންހެން ފުލުސް އޮފިސަރުން ބާރުވެރި ކުރުވުމުގައި މިއަދު ނަމޫނާ ފެންނަމުންދޭ: އޭސީޕީ ރިޔާޒް
30 މާރިޗު 2022 | ބުދަ 08:21ފުލުހުންގެ ލީޑަރޝިޕުން ކުރަމުންދާ މަސައްކަތްތައްކަން ފާހަގަކުރެއްވި
ފުލުހުންގެ 89 ވަނަ އަހަރީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ރިޔާޒް ވާހަކަދައްކަވަނީ
އަންހެން ފުލުސް އޮފިސަރުން ބާރުވެރި ކުރުވުމުގައި މިއަދު ނަމޫނާ ފެންނަމުންދާކަމަށް އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ރިޔާޒް ވިދާޅުވެއްޖެއެވެ.
ފުލުހުންގެ 89 ވަނަ އަހަރީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަދައްކަވަމުން ރިޔާޒް ވިދާޅުވީ، ހޯމް މިނިސްޓަރުގެ ލަފަޔާއި އިރުޝާދާއެކު ފުލުހުން މިއަދު ހޯދަމުންދާ ކުރިއެރުންތަކަކީ ތާރީޚުގެ މުހިއްމު ސޮފްޙާތަކަކަށް ވެގެންދާނެ ކަމަށެވެ. އެގޮތުން ފުލުހުންގެ މަސައްކަތަކީ ޕްރޮފެޝަނަލް، އަދި ރައްޔިތުން ބަލައިގަންނަ ޚިދުމަތްތަކަށް ހެއްދެވުމަށް މިނިސްޓަރު ކުރައްވަމުން ގެންދަވާ މަސައްކަތް ފާހަގަކުރައްވައި މިނިސްޓަރަށް ޝުކުރު އަދާ ކުރައްވާފައިވެއެވެ.
ފުލުހުންގެ މުއައްސަސާއާމެދު ރައްޔިތުން އުއްމީދީ ނަޒަރަކުން ދެކޭ އެއް ސަބަބަކީ މިއަދުގެ ކޮމިޝަނަރ އޮފް ޕޮލިސްއާއި، ފުލުހުންގެ ލީޑަރޝިޕުން ކުރަމުންދާ މަސައްކަތްތައްކަން ފާހަގަކުރައްވައި ރިޔާޒް ވިދާޅުވީ، ފުލުހުންނަށް ބޭނުންވާ ވަސީލަތްތައް ޤާއިމުކުރުމާއި، މާލެއެކޭ އެއްފަދައިން މުޅި ރާއްޖޭގައިވެސް ފުލުހުންގެ ޚިދުމަތް ޕްރޮފެޝަނަލް ކޮށްދިނުމަށް ކޮމިޝަނަރު ކުރައްވާ މަސައްކަތްވެސް ފާހަގަކުރައްވާކަމަށް އޭނާ ވިދާޅުވިއެވެ.
މީގެއިތުރުން، ފުލުހުންގެ ތެރޭގައި ޤާބިލު އޮފިސަރުން ބިނާ ކުރުމަށްޓަކައި ދުނިޔޭގެ އެންމެ ޤާބިލު ޤައުމުތަކުން ފުލުހުންނަށް ތައުލީމާއި ތަމްރީނުގެ ފުރުސަތުތައް ހޯދައިދިނުމަށް މިއަދު ކުރަމުންދާ މަސައްކަތުންވެސް، ފުލުހުންގެ މުއައްސަސާ ޕްރޮފެޝަނަލް ކުރުމަށް އޮތް އަހައްމިއްޔަތުކަން ފެނިގެންދާކަމަށް ރިޔާޒް ވިދާޅުވިއެވެ.
ހަމައެއާއެކު، އެންމެން ގުޅިގެން ނަތީޖާ ނެރުމަށް މަސައްކަތް ކުރުމާއި، އަންހެން އޮފިސަރުން ބާރުވެރި ކުރުވުމާއި، ޖަވާބުދާރީވުމުގައި ހާމަކަން ބޮޑު ސިޔާސަތެއް ގެންގުޅުމުގައިވެސް މިއަދު ނަމޫނާ ފެންނަމުންދާކަން ރިޔާޒް ވިދާޅުވިއެވެ.
ފުލުުހުންނާމެދު މުޅި މުއައްސަސާވެސް ފަޚުރުވެރިވާކަން ފާހަގަކުރައްވައި ރިޔާޒް އިތުރަށް ވިދާޅުވީ، މިއީ ގޮންޖެހުން ބޮޑު މަސައްކަތެއް ކަމަށާއި، މިއީ މުސާރައާއި އިނާޔަތަށް ބަލައިގެން ކުރެވޭނެ މަސައްކަތެއް ނޫން ކަމަށެވެ. މިއީ އެއަށްވުރެ ބޮޑު ޤައުމީ ވާޖިބެެއް ކަމުގައި ދެކިގެން ކުރަންޖެހޭ މަސައްކަތެއް ކަމަށެވެ. އެކަމުގައި ދިވެހި ރައްޔިތުންނަށް އޮތް ހިތްހަމަޖެހުމަކީ، ފަސްޖެހުމެއް ނެތި ސާބިތުކަމާއެކު ފުލުހުން ކުރިޔަށްދާ ދިޔުންކަމަށްވެސް ވިދާޅުވިއެވެ.
ރިޔާޒް ވަނީ ދާދި ފަހުން ވައިރަލް ވެގެން ދިޔަ، ވައްކަމުގެ މައްސަލައެއްގައި ހިމެނޭ މީހަކު ފުލުހަކު އަތުލައިގަންނަ މަންޒަރު ދައްކުވައިދޭ ވީޑިއޯއަށް އަލިއަޅުވާލައްވާފައެވެ. އެގޮތުން ފުލުހުންގެ ފަރާތުން އަބަދުވެސް އެފަދަ ހިތްވަރު ފެންނަކަމަށް ރިޔާޒް ވިދާޅުވިއެވެ.
ދިވެހި ފުލުހުންގެ ޚިދުމަތް ރަސްމީކޮށް ފެށިގެން ދިޔައީ 1933 މާރިޗު 29 ވަނަ ދުވަހު، ރާއްޖޭގެ ކީރިތި މަހާރަދުން، އައްސުލްތާން މުޙައްމަދު ޝަމްސުއްދީން ތިނެއް، ''ފުލުހު މީހުންގެ ގާނޫނު'' ތަސްދީގު ކުރެއްވުމާއި ގުޅިގެންނެވެ. މި ގާނޫނަކީ 1932 ޑިސެންބަރު 22 ވަނަ ދުވަހު ދިވެހިންނަށް ލިބުނު ފުރަތަމަ ގާނޫނު އަސާސީ އެވެ.
