ގދ އަތޮޅުގެ އަންހެން ޗެމްޕިއަންކަން ފިޔޯރީއަށް

ރާއްޖެ އެޓޯލް ވޮލީބޯލް ޗެމްޕިއަންޝިޕްގައި ގދ އަތޮޅުގެ އަންހެން ޑިވިޝަންގެ ޗެމްޕިއަންކަން ސޮސައިޓޯ ފޯރ ފިޔޯރީ ޔޫތު އެންޑް ކޮމިއުނިޓީ އެމްޕަވަރމެންޓް (އެސްއެފްއީ) އިން ކާމިޔާބުކޮށްފިއެވެ.

އަންގާރަ ދުވަހުގެ ހަވީރު އެސްއެފްއީ އިން މުބާރާތް ކާމިޔާބުކުރީ ކާއްޑޭ ސްޕޯޓްސް އެކަޑަމީ (ކޭއެސްއޭ) އާއި ވާދަކޮށް ސީދާ ތިން ސެޓުންނެވެ. މެޗުގެ ފުރަތަމަ ސެޓު ހޯދީ 26-16 އިންނެވެ. ބާކީ ދެސެޓު ކާމިޔާބުކުރީ 25-21 ގެ ނަތީޖާއަކުންނެވެ.

ގދ އަތޮޅުގެ ފިރިހެން ޑިވިޝަންގެ ޗެމްޕިއަންކަން ހޯދީ ސޮސައިޓީ ފޯ ވާދޫ ޔޫތު (އެސްވީވައި) އިންނެވެ. ވާދޫން މުބާރާތް ކާމިޔާބުކުރީ އާދީއްތަ ދުވަހުގެ ރޭ ސޮސައިޓީ ފޯ ފިޔޯރީ ޔޫތު އެންޑް ކޮމިއުނިޓީ އެމްޕަވަމަންޓް (އެސްއެފްއީ) ބަލިކޮށްގެންނެވެ. ވާދޫން މެޗު ކާމިޔަބުކުރީ ސީދާ ތިން ސެޓުންނެވެ. މެޗުގެ ސެޓުތައް ގެންދިޔައީ 25-20، 25-22 އަދި 25-17 އިންނެވެ. މި މެޗުގެ މޮޅު ކުޅުންތެރިއަކަށް ހޮވުނީ މުބާރާތުގެ އެންމެ މޮޅު ކުޅުންތެރިއަކަށް ވެސް ހޮވުނު އެސްއެފްއީގެ ޖާޒީ ނަންބަރު 10 އާމިނަތު އިބްރާހިމްއެވެ.

މުބާރާތުގައި ގދ އަތޮޅުގެ ފިރިހެން ޑިވިޝަނުން ބައިވެރިވީ ވާދޫ އާއި ފިޔޯރީގެ ޓީމު އެކަންޏެވެ. އެހެންކަމުން ޗެމްޕިއަން ޓީމު ހޮވާނީ ދެޓީމުގެ މެޗުގައި ތިން މެޗު ކުޅުމަށްފަހު ދެމެޗު ކާމިޔާބުކުރާ ޓީމަކުންނެވެ. އާދީއްތަ ދުވަހު ކުޅުނު މުބާރާތުގެ ދެވަނަ މެޗެވެ. ހުކުރު ދުވަހުގެރޭ ކުޅުނު ފުރަތަމަ މެޗުވެސް ވާދޫން ކާމިޔާބުކުރީ ސީދާ ތިން ސެޓުންނެވެ. އެހެންވެ އެޓީމު ދެވަނަ މެޗުން މޮޅުވުމާއެކު ޗެމްޕިއަންކަން ކަށަވަރުވީއެވެ.

މިއީ ރާއްޖޭގެ ވޮލީބޯޅައިގެ ފޯރި އަތޮޅުތަކުގައި ގަދަކުރުމަށް ވޮލީބޯޅަ އެސޯސިއޭޝަން އާއި ޔޫތު މިނިސްޓްރީ ގުޅިގެން ކުރިއަށްގެންދާ މުބާރާތެކެވެ.