ވޮލީބޯޅަ އެސޯސިއޭޝަންކަޕް މެއި މަހު ފަށަނީ
އެސޯސިއޭޝަން ކަޕް ފަށާނީ މެއި 24 ވަނަ ދުވަހު
ގައުމީ ވޮލީބޯޅަ ލީގުގެ މެޗެއްގައި ސިފައިންނާއި ޕޮލިސް ކުލަބު ވާދަކުރަނީ
ރޯދަމަހަށްފަހު މެއިމަހު ވޮލީބޯޅަ އެސޯސިއޭޝަންކަޕް ފަށަން ވޮލީބޯޅަ އެސޯސިއޭޝަނުން ނިންމައިފިއެވެ. އެސޯސިއޭޝަނުން ޢާއްމުކުރި އަހަރީ ކަލަންޑަރުގައިވާ ގޮތުން އެސޯސިއޭޝަންކަޕް ފަށާނީ މެއިމަހުގެ 24 ވަނަ ދުވަހުއެވެ. އެކަމަކު އޭގެކުރިން ޕްރިލިމިނަރީ ބުރު މެއި 15 ވަނަ ދުވަހު ފަށާނެއެވެ. ފައިނަލް ރައުންޑް ކުޅޭނީ މެއި ޖޫންގައެވެ.
އެސޯސިއޭޝަންކަޕް މިބާއްވަނީ ކޯވިޑާއި, އެސޯސިއޭޝަންގެ އެތެރޭގެ މައްސަލަތަކާއެކު ދެ އަހަރުގެ މެދުކެނޑުމަކަށްފަހުއެވެ.
އެސޯސިއޭޝަންކަޕްގެ ކުރިން ފުރަތަމަ ލޯކަލް މުބާރާތުގެ ގޮތުގައި ރާއްޖެ އެޓޯލް ވޮލީބޯލް ޗެމްޕިއަންޝިޕް މިހާރު ވަނީ ފަށާފައެވެ. މުޅި ރާއްޖެއަށް ހުޅުވާލާފައިވާ މުބާރާތުގެ ފ.އަތޮޅުގެ ބައި މިހާރު ވަނީ ނިމިފައެވެ. ރާއްޖެ އެޓޯލް ވޮލީބޯލް ޗެމްޕިއަންޝިޕް ޑިސެމްބަރު މަހާ ހަމައަށް ކުރިއަށްދާނެއެވެ. އެމުބާރާތުގެ ޒޯން ޗެމްޕިއަން ޓީމްތަކަށް އަންނަ އަހަރުގެ އެސޯސިއޭޝަންކަޕުން ފުރުޞަތު ލިބޭނެއެވެ.
އެސޯސިއޭޝަންކަޕަށްފަހު މިއަހަރުގެ ކަލަންޑަރުގައި އޮތީ ޤައުމީ ލީގާއި, ޤައުމީ މުބާރާތެވެ. އެދެމުބާރާތްވެސް އޮތީ ޖޫން މަހުއެވެ. އިންޓަރ ރިސޯރޓް ވޮލީބޯލް ޗެމްޕިއަންޝިޕް ފަށަން ތާވަލްކޮށްފައިވަނީ ޖުލައި ފަސްވަނަ ދުވަހަށެވެ. ސެޕްޓެމްބަރު މަހަށް ޝެޑިއުލްކޮށްފައިވަނީ ޔޫތް ޗެމްޕިއަންޝިޕްއާއި, އިންޓަރ އޮފީސް ކޮމްޕެނީ މުބާރާތެވެ. ބީޗް ވޮލީ އެސޯސިއޭޝަންކަޕާއި, ޤައުމީ ބީޗް ވޮލީ މުބާރާތް ތާވަލް ކޮށްފައިވަނީ އޮކްޓޯބަރު މަހަށެވެ.
