ދިވެހި ޕްރިމިއަރ ލީގުގެ ދެވަނަ ބުރު ފަށާނީ އޭޕްރީލް 7 ވަނަ ދުވަހުގެރޭ

ދިރާގު ދިވެހި ޕްރިމިއަރ ލީގުގެ ދެވަނަ ބުރު އަންނަ އޭޕްރީލް މަހުގެ 7 ވަނަ ދުވަހުގެރޭ ފަށަން އެފްއޭއެމްއިން ނިންމައިފިއެވެ.

ލީގުގެ ދެވަނަ ބުރުގެ ފުރަތަމަ މެޗުގައި ވާދަކުރާނީ ފުރަތަމަ ބުރުގެ އެއްވަނަ މާޒިޔާއާއި, ދެވަނަ އީގަލްސްއެވެ. ދެވަނަ މެޗުގައި ޖެހިގެން އަންނަ އަށްވަނަ ދުވަހުގެރޭ ވާދަކުރާނީ ފުރަތަމަ ބުރުގެ ތިންވަނަ ވެލެންސިޔާއާއި ހަތަރުވަނަ ޓީސީއެވެ. ނުވަވަނަ ދުވަހުގެރޭ ވާދަކުރާނީ ޔުނައިޓެޑް ވިކްޓްރީއާއި ސުޕަރ ޔުނައިޓެޑް ސްޕޯރޓްސް (ސަސް) އެވެ. މިއީ ފުރަތަމަ ބުރުގެ ފަސްވަނަ ޓީމާއި ހަވަނަ ޓީމެވެ. ފުރަތަމަ ބުރުން ފުލަށް ދިޔަ ގްރީން ސްޓްރީޓްސްއާއި, ދަ ގްރާންޑޭ ވާދަކުރާނީ 10 ވަނަ ދުވަހުގެ ރެއެވެ.

ރޯދަމަހު މެޗުތައް ފަށާނީ ރޭގަނޑު 10:00 ގައެވެ. ފުރަތަމަ ބުރުން އެއްވަނަ މާޒިޔާ ހޯދީ ކުޅުނު ހަތް މެޗުންވެސް މޮޅުވެ 21 ޕޮއިންޓާއެކުއެވެ. މާޒިޔާއަކީ އެންމެ ފަހުގެ ޗެމްޕިއަން ޓީމެވެ. އީގަލްސް ދެވަނާގައި އޮތީ 16 ޕޮއިންޓާއެކުއެވެ, އީގަލްސްއާ ވެލެންސިޔާއާ ދެމެދު އޮތީ 4 ޕޮއިންޓްގެ ފަރަޤެކެވެ.