އެޓޯލް ވޮލީބޯލް ޗެމްޕިއަންޝިޕް: ވާދޫއަށް ޗެމްޕިއަންކަން

ރާއްޖެ އެޓޯލް ވޮލީބޯލް ޗެމްޕިއަންޝިޕްގައި ގދ އަތޮޅުގެ ފިރިހެން ޑިވިޝަންގެ ޗެމްޕިއަންކަން ސޮސައިޓީ ފޯ ވާދޫ ޔޫތު (އެސްވީވައި) އިން ކާމިޔާބުކޮށްފިއެވެ.

ވާދޫން މުބާރާތް ކާމިޔާބުކުރީ އާދީއްތަ ދުވަހުގެރޭ ސޮސައިޓީ ފޯ ފިޔޯރީ ޔޫތު އެންޑް ކޮމިއުނިޓީ އެމްޕަވަމަންޓް (އެސްއެފްއީ) ބަލިކޮށްގެންނެވެ. ވާދޫން މެޗު ކާމިޔަބުކުރީ ސީދާ ތިން ސެޓުންނެވެ. މެޗުގެ ސެޓުތައް ގެންދިޔައީ 25-20، 25-22 އަދި 25-17 އިންނެވެ.

މުބާރާތުގައި ގދ އަތޮޅުގެ ފިރިހެން ޑިވިޝަނުން ބައިވެރިވީ ވާދޫ އާއި ފިޔޯރީގެ ޓީމު އެކަންޏެވެ. އެހެންކަމުން ޗެމްޕިއަން ޓީމު ހޮވާނީ ދެޓީމުގެ މެޗުގައި ތިން މެޗު ކުޅުމަށްފަހު ދެމެޗު ކާމިޔާބުކުރާ ޓީމަކުންނެވެ. އާދީއްތަ ދުވަހު ކުޅުނު މުބާރާތުގެ ދެވަނަ މެޗެވެ. ހުކުރު ދުވަހުގެރޭ ކުޅުނު ފުރަތަމަ މެޗުވެސް ވާދޫން ކާމިޔާބުކުރީ ސީދާ ތިން ސެޓުންނެވެ. އެހެންވެ އެޓީމު ރޭގެ މެޗުން މޮޅުވުމާއެކު ޗެމްޕިއަންކަން ކަށަވަރުވީއެވެ.

ފިރިހެން ޑިވިޝަނުގައި ވަނަތައް ހޯދި ފަރާތްތަކަށް އިނާމުދިނުން އޮންނާނީ އަންހެން ޑިވިޝަނުގެ ފައިނަލަށްފަހު އޮންނަ ނިންމުމުގެ ރަސްމިއްޔާތުގައެވެ. އަންހެން ޑިވިޝަންގެ ފައިނަލް އޮންނާނީ އަންގާރަ ދުވަހުގެ ހަވީރު 16:15 ގައެވެ. މި މެޗުގައި ބައްދަލުކުރާނީ ކާއްޑޭ ސްޕޯޓްސް އެކަޑަމީ (ކޭއެސްއޭ) އާއި ސޮސައިޓީ ފޯ ފިޔޯރީ ޔޫތު އެންޑް ކޮމިއުނިޓީ އެމްޕަވަމަންޓް (އެސްއެފްއީ) އެވެ.

މިއީ ރާއްޖޭގެ ވޮލީބޯޅައިގެ ފޯރި އަތޮޅުތަކުގައި ގަދަކުރުމަށް ވޮލީބޯޅަ އެސޯސިއޭޝަން އާއި ޔޫތު މިނިސްޓްރީ ގުޅިގެން ކުރިއަށް ގެންދާ މުބާރާތެކެވެ.