ކޮންމެ މީހަކީ ވަގެއްކަމަށް ބަލައިގެން ނުވާނެ: ރައީސް ޔާމީން

ކޮންމެ މީހަކީ ވަގެއްކަމަށް ބަލައިގެން ނުވާނެކަމަށް ކުރީގެ ރައީސް އަބްދުﷲ ޔާމީނު ވިދާޅުވެއްޖެއެވެ.

ހުކުރު ދުވަހު ކުރިޔަށްގެންދިޔަ މުޒާހަރާއަށްފަހު ޕްރޮގްރެސިވް ކޯލިޝަނުން ކުރިއަށް ގެންދިޔަ ޖަލްސާއެއްގައި ޔާމީނު ވަނީ، މުޒާހަރާގެ ތެރެއިން އިދިކޮޅު ބައެއް ފަރާތްތައް ފުލުހުންގެ ބެލުމުގެ ދަށަށް ގެންގޮސްފައިވާތީ އެކަމަށް ފާޑުވިދާޅުވެފައެވެ. ރައީސް ޔާމީނު ވިދާޅުވާ ގޮތުގައި މަގުތަކަށް ނުކުމެވަޑައިގެން ކުރައްވާ މަސައްކަތަކީ، ފުލުހުންނާއި ސަލާމަތީ ބާރުތަކުން އެ ފަރާތްތަކުގެ ޒިންމާ އަދާ ނުކުރާތީ ޕީޕީއެމްއިން ހިލޭ ކޮށްދޭ މަސައްކަތެކެވެ.

ރައީސް ޔާ،މީނު ވަނީ ތަހުގީގު ކުރާ ފުލުހުންނަށްވެސް މެސެޖެއް ދެއްވާފައެވެ. އެގޮތުން ކަންކަން ސިޔާސީ ނުކުރެއްވުމަށް އެމަނިކުފާނު ގޮވާލެއްވިއެވެ. އަދި ކޮންމެ މީހަކީ ވަގެއްކަމަށް ހެދުމަށް މަސައްކަތް ނުކުރެއްވުމަށްވެސް ރައީސް ޔާމީނު ވަނީ ގޮވާލައްވާފައެވެ.

ރައީސް ޔާމީނު ވަނީ އެއްވެސް މީހަކު ފިލައިގެން ދިއުމަށް މަސައްކަތް ނުކުރެއްވުމަށް ހަނދާންކޮށްދެއްވައި، ވެރިކަން ބަދަލުވުމުން އެކަމުގެ ބަދަލު ހިއްޕަވާނެކަމުގެ އިންޒާރު ދެއްވާފައެވެ. އެގޮތުން އެމަނިކުފާނުގެ ވެރިކަމެއްގައި ފުލުހުންގެ ޖަރީމާތައް ކޯޓާއި ހިސާބަށް ގެންދަވާނެކަމަށްވެސް ރައީސް ޔާމީނު ވިދާޅުވިއެވެ.

މީގެއިތުރުން، މި ސަރުކާރުން ވައްކަން ނޫން ކަމެއް ނުކުރާކަމަށް ވިދާޅުވެ ރައީސް ޔާމީނު ވަނީ ކޮންމެ ކަމަކުންވެސް މި ސަރުކާރުން ކުރަނީ ވައްކަންކަމަށް ތުހުމަތު ކުރައްވާފައެވެ.

ސިޔާސީ ލީޑަރުންނަކީވެސް ކޮންމެވެސް ވަރެއްގެ ހިތްވަރެއް ހުންނަ ބަޔަކަށް ވާން ޖެހޭނެކަން ފާހަގަކުރައްވާ ރައީސް ޔާމީނު އިތުރަށް ވިދާޅުވީ، ގޯސް ހަދާފައިވާ ސިޔާސީ ލީޑަރުން އެކަން ޤަބޫލުކޮށް، ގޯސް ހެދިފައިވާކަމަށް ވިދާޅުވާންވެއްޖެ ކަމަށެވެ. ރައީސް ޔާމީނު ވަނީ ސިޔާސީ ބޭފުޅުން ތިއްބަވަނީ އާންމު ރައްޔިތުންނަށްވުރެ ބޮޑު ގިލަންވެރިކަމެއްގެ ތެރޭގައިކަމަށްވެސް ވިދާޅުވެފައެވެ.