މާފަންނުގައި ހުރި ގެއެއްގެ ތަޅުންގަނޑު ދަށުގައި ވަޅުލާފައި ހުރި 42 ކިލޯގެ މަސްތުވާތަކެތީގެ މައްސަލައިގެ ތުހުމަތުގައި އިދިކޮޅު ކޯލިޝަންގެ ޕީއެންސީގެ ކައުންސިލް މެންބަރު އަހުމަދު ހުސައިން އެ މަޤާމުން ވަކިކޮށްފިއެވެ.
ޕީޕީއެމުން ނެރުނު ބަޔާނެއްގައި ބުނެފައިވަނީ އޭނާ ޕާޓީގެ ކައުންސިލު މެންބަރުކަމުން ވަކިކޮށް، ޕާޓީގެ އެއްވެސް ހަރަކާތެއްގައި ބައިވެރި ނުވެވޭ ގޮތަށް ސަސްޕެންޑުކޮށްފައިވާ ކަމަށެވެ. ޕީއެންސީގެ އަސާސީ ގަވާއިދުގައި ވާގޮތުން ބޮޑެތި ކުށްތަކަށް އަރައިގަންނަ މީހުންނަށް ފިޔަވަޅު އެޅުމުގެ ބާރު ޕާޓީއަށް ލިބޭ ކަމަށާއި، އަޙްމަދު ހުސައިނަށް އެޅި ފިޔަވަޅަކީ ވެސް އެ ބާރުގެ ދަށުން އެޅި ފިޔަވަޅެއް ކަމަށް އެ ޕާޓީން ވަނީ ބުނެފައެވެ.
ޕޮލިސް ކޮމިޝަނަރު މުހައްމަދު ހަމީދު ހުކުރު ދުވަހު ހެނދުނު ކުރެއްވި ޓުވީޓެއްގައި ވިދާޅުވީ، މަސްތުވާތަކެތި ފެނުނީ ފުލުހުންގެ ޑްރަގް އެންފޯސްމެންޓް އެންޑް ނާކޮޓިކްސް އިންޓެލިޖެންސުން ބުރާސްފަތި ދުވަހުން ފެށިގެން މާލޭގައި ކުރިއަށްގެންދާ އޮޕަރޭޝަނެއްގައި ކަމަށެވެ. އޮޕަރޭޝަނުގައި ފެނިފައި ވަނީ ގާތްގަނޑަކަށް 42 ކިލޯގެ ހެރޮއިނެވެ.
ސީޕީ ހަމީދު ހުކުރު ދުވަހުގެ ރޭ ކުރެއްވި އިތުރު ޓްވީޓެއްގައި ވިދާޅުވީ, މި މައްސަލާގައި ތުހުމަތުކުރެވޭ އިސް މީހާ މިހާރު ހައްޔަރުކުރެވިފައިވާ ކަމަށެވެ. މި މައްސަލާގައި އޭނާއާއެކު އިތުރު މީހަކު ވެސް ވަނީ ހައްޔަރުކޮށްފައެވެ.
މީގެ ކުރިން ވެސް ގިނަ އަދަދެއްގެ މަސްތުވާތަކެއްޗާއެކު ޕީއެންސީގެ ކައުންސިލް މެންބަރަކު ހައްޔަރުކޮށްފައިވެއެވެ. 2020 ވަނަ އަހަރުގެ އޮކްޓޯބަރު މަހުގެ ތެރޭގައި 130 ކިލޯއާއެކު ހައްޔަރުކޮށްފައިވަނީ އެ ޕާޓީގެ މެންބަރެއް ކަމަށްވާ ޝަހީބް އިބްރާހީމެވެ. މައްސަލަ ފެންމަތިވުމާއެކު އެ ޕާޓީން ވަނީ އޭނާ ސަސްޕެންޑުކޮށްފައެވެ.
ގެއެއްގެ ތަޅުންގަނޑު ދަށުގައި ރައްކާކޮށްފައި ހުރި ގިނަ އަދަދެއްގެ މަސްތުވާތަކެތި އަތުލައިގެންފައިވާއިރު، މިހާރު ފުލުހުން ގެންދަނީ މާލެސިޓީގެ އިތުރުން އަތޮޅުތެރޭގައިވެސް އޮޕަރޭޝަންތައް ހިންގަމުންނެވެ.
