ކޮވިޑްގެ ވޭރިއެންޓްތައް ދެނެގަތުމަށް ހަދާ ލެބޯޓްރީ މެއި މަހުގެ ފަހުކޮޅު ހުޅުވާނެ

ކޮވިޑް-19ގެ ވޭރިއެންޓްތައް ދެނެގަތުމަށް ޖެނެޓިކް ސީކުއެންސް ޓެސްޓުތައް ހަދާ ލެބޯޓްރީ މެއި މަހުގެ ފަހުކޮޅު ހުޅުވާނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

ރާއްޖޭގައި މީގެ ކުރިން ކޮވިޑް-19ގެ ވޭރިއެންޓްތައް ދެނެގަތުމަށް ހަދާ ޓެސްޓުތަކުގެ ސާމްޕަލްތައް ފޮނުވަނީ ރާއްޖެއިން ބޭރަށެވެ. އޮމިކްރޯން ވޭރިއެންޓް ވެސް ރާއްޖޭގައި ފެތުރެމުންދިޔަ ކަން ހާމަވެގެން ދިޔައީ ރާއްޖެއިން ބޭރަށް ސާމްޕަލް ފޮނުވައިގެން ހެދި ޓެސްޓުތަކުންނެވެ. މިއީ މަސައްކަތްތަކަށް ލިބޭ ލަސްކަމެއްގެ ގޮތުގައި އޭރު ސިއްހީ ޚިދުމަތްތެރިންނާއި ޑޮކްޓަރުން ފާހަގަކުރެއްވިއެވެ. މިމައްސަލަ ހައްލު ގެނައުމަށް ކޮވިޑަށް ޓެސްޓް ކުރާ ސާމްޕަލްތަކުގެ ވޭރިއެންޓް ދެނެގަތުމަށް ބޭނުންވާ ސާމާނު 28 ނޮވެމްބަރު 2021ގައި ރާއްޖެ ގެނެސްފައިވެއެވެ. އަދި ފުޑް އެންޑް ޑްރަގް އޮތޯރިޓީގެ ނޭޝަނަލް ހެލްތު ލެބޯޓަރީގައި ޖެންސް ޓެސްޓް ހަދާ ލެބޯޓްރީ މިހާރު ވަނީ ގާއިމްކޮށްފައެވެ.

ރާއްޖެއެމްވީއަށް އެޗްޕީއޭގެ އޮފިޝަލަކު ވިދާޅުވީ, ކޮވިޑް-19ގެ ވޭރިއެންޓްތައް ދެނެގަތުމަށް ޖެނެޓިކް ސީކުއެންސް ޓެސްޓުތައް މިހާރު ވެސް ހަދަމުންދާ ކަމަށެވެ. ނަމަވެސް އަދި އާއްމުކޮށް ހުޅުވާލައިގެން އެމަސައްކަތް ކުރަމުން ނުދާ ކަމަށް އޮފިޝަލް ވިދާޅުވިއެވެ.

މީގެ އިތުރުން އޮފިޝަލް ވިދާޅުވީ ޖެނެޓިކް ސީކުއެންސް ޓެސްޓުތައް ހަދާ ލެބޯޓްރީގެ މަސައްކަތް ގާތްގަނޑަކަށް ނިމިފައިވާ ކަމަށާއި، މެއި މަހުގެ ފަހުކޮޅު ހުޅުވާނެ ކަމަށެވެ.

ރާއްޖޭގައި ފެތުރެމުން އަންނަނީ ކޮވިޑްގެ ކޮން ވައްތަރެއްކަން ދެނެގަތުމަށް ހަދާ ޖެންސް ޓެސްޓްތައް ހެދޭނެ ނިޒާމެއް ގާއިމުކޮށްފައިވާ އިއުލާންކުރެއްވީ މިމަހުގެ 13 ވަނަ ދުވަހު ރައީސް އިބްރާހިމް މުހައްމަދު ސޯލިހެވެ.