އިދިކޮޅު ކޯލިޝަނުން "ނޭވާ ހޮޅިޔަށް" ނަމުގައި ހުކުރު ދުވަހު ކުރިއަށް ގެންދިޔަ މުޒާހަރާއިން ކުރީގެ ރައީސް ޔާމީން ފިއްލަވައިފިއެވެ.
ރާއްޖެއެމްވީއަށް މައުލޫމާތުދެމުން އިތުބާރު ހުރި ފަރާތަކުން ބުނީ ރައީސް ޔާމީން މި މުޒާހަރާގައި ބައިވެރިވެވަޑައިނުގެންނެވީ ސެކިއުރިޓީ ސަބަބުތަކާއި ހުރެ ކަމަށެވެ. ނަމަވެސް މީގެ ކުރިން ވެސް އެމަނިކުފާނު ވަނީ އިންޑިއާ އައުޓް ކެމްޕެއިންގައި ރަށްރަށަށް ކުރި ދަތުރުތަކުގައި ބައިވެރިވެވަޑައިގެންފައެވެ. އަދި އެމަނިކުފާނު ވަނީ މިފަދަ އެއްވުންތަކުގައިވެސް ބައިވެރިވެވަޑައިގެންފައެވެ.
ހުކުރު ދުވަހުގެ މުޒާހަރާ ކުރިއަށް ގެންދިޔަ ގޮތާމެދު ހިތްހަމަނުޖެހިގެން އެ ޕާޓީގެ އާންމު މެމްބަރުން ތިބީ ރުޅިގަދަވެފައިކަމަށާއި މި މުޒާހަރާއަށް ރަށްރަށުން ވެސް ބައެއް މީހުން މާލެ އައިސްފައިވާއިރު، މުޒާހަރާގެ އަމާޒަށް ވާސިލް ނުވެ އެމީހުން ފުރަން ޖެހުމުން ރުޅި އައިސް ތިބި ކަމަށް ވަނީ މައުލޫމާތު ލިބިފައެވެ. އަދި ޕާޓީއަށް ހެޔޮ އެދިގެން މަސައްކަތް ކުރާ މެމްބަރުން ދުރުކުރުމަށްފަހު، ރަނގަޅަށް އިރުޝާދު ނުދީ، މުޒާހަރާއަށް ނުކުމެފައިވާ ކަމަށާއި، އެ މެމްބަރުން ތިބީ އެކަމާމެދުވެސް ހިތްހަމަނުޖެހިފައިކަމަށް ވަނީ މައުލޫމާތު ލިބިފައެވެ.
ރާއްޖެއެމްވީއަށް މައުލޫމާތު ދިން ފަރާތުން ބުނީ ޕާޓީގެ ލީޑަރޝިޕާއި މެމްބަރުންގެ މެދުގައި ވެސް މައްސަލަތައް ޖެހިފައިވާ ކަމަށެވެ. ހުކުރު ދުވަހު އިދިކޮޅުން ބޭއްވި މުޒާހަރާ ވެސް ނިމިގެން ދިޔައިރު އިދިކޮޅުން ބޭއްވީ އެޕާޓީން ބުނި ފަދަ "ބޮޑު މުޒާހަރާ" އެއް ނޫންކަން ވަނީ ފެނިގެން ގޮސްފައެވެ.
ރައީސް ޔާމީނަކީ ރާއްޖޭގައި ތިބި ކަމަށް ބުނާ އިންޑިއާގެ ސިފައިން ބޭރުކުރުމަށް ފާޅުކަން ބޮޑު ގޮތެއްގައި ގޮވާލައްވަމުންދާ ބޭފުޅަކަށްވާއިރު މިފަދަ ބޮޑު މުޒާހަރާއަކުން އެމަނިކުފާނު ފެނިވަޑައިނުގެންނެވުމުން އާންމުންގެ ފާޑުކިޔުން ވަނީ އެމަނިކުފާނަށް އަމާޒުވެފައެވެ.
ނޭވާހޮޅިޔަށް މި ނަމުގައި އިދިކޮޅު ކޯލިޝަނުން ބޭއްވި މި މުޒާހަރާއިން 11 މީހުން ފުލުހުންގެ ބެލުމުގެ ދަށަށް ވަނީ ގެންގޮސްފައެވެ. ފުލުހުން ބުނީ މި 11 މީހުން ފުލުހުންގެ ބެލުމުގެ ދަށަށް ގެންދިޔައީ ފުލުހުންގެ ދައުރު އަދާ ކުރުމަށް ހުރަސް އެޅިކަމުގެ ތުހުމަތުގައި ކަމަށެވެ.
