ބަދަލުހިފަން ނުކުމެ ރާއްޖެއިން ނަތީޖާ ނެރެފި
ރާއްޖެ މޮޅުވީ 2-0 ގެ ނަތީޖާއަކުން
ބަންގްލަދޭޝް އަތުން ރާއްޖެ މޮޅުވީ 2-0 އިން
ދިވެހިރާއްޖެއާއި ބަނގްލަދޭޝް ބައްދަލުކުރި އިންޓަރނޭޝަނަލް ފްރެންޑްލީ މެޗު ރާއްޖެއިން ކާމިޔާބުކޮށްފިއެވެ.
ލަންކާގައި ކުޅުނު ފޯނޭޝަންސް ކަޕުގައި ބަނގްލަދޭޝް އަތުން ރާއްޖެ ބަލިވުމާއެކު މި މެޗަށް ރާއްޖެ ޓީމުން ނުކުތީ ބަދަލު ހިފުމުގެ ރޫހުގައެވެ. ބަނގްލަދޭޝް އަތުން އެފަހަރު ރާއްޖެ ބަލިވީ 18 އަހަރަށްފަހުއެވެ.
ގަލޮޅު ދަނޑުގައި ބުރާސްފަތި ދުވަހުގެރޭ ކުޅުނު މި މެޗު ރާއްޖެއިން ކާމިޔާބުކުރީ 2-0 ގެ ނަތީޖާއަކުންނެވެ.
މެޗު ފެށިގެން ފުރަތަމަ ހާފުގައި ބަނގްލަދޭޝް ޓީމުން ރަނގަޅު ކުޅުމެއް ދައްކައި ރާއްޖޭގެ ގޯލަށް ނުރައްކާ ކުރަން މަސައްކަތް ކުރިއެވެ. އެގޮތުން އަރިމަތިން ރާއްޖޭގެ ޕެނަލްޓީ އޭރިއާގެ ތެރެއަށް ހުރަސް ނަގައިގެން ކައިރިކައިރީގައި ދެ ހަމަލާއެއް އުފެއްދި ނަމަވެސް ބަނގްލަދޭޝް ޓީމަށް ނަތީޖާ ނެރެެވޭ ގޮތެއް ނުވިއެވެ. ބަނގްލަދޭޝްގެ ޔާސިން އަރަފާތު އަރިމަތިން ނަގައިދިން ހުރަސް އެމްޑީ ސުމަން ގޯލުގެ ތެރެއަށް ފޮނުވާލަން މަސައްކަތް ކުރި ނަމަވެސް ބޯޅަ ދިޔައީ ގޯލުގެ އަރިމަތިން ބޭރަށެވެ.
ރާއްޖެ ޓީމުން ކުޅުން ރަނގަޅުކޮށް މެޗުގެ ލީޑު ނެގީ ފުރަތަމަ ހާފުގެ 38 ވަނަ މިނެޓިގައެވެ. މިއީ މުހައްމަދު އުމައިރު ދިން ޕާހެއް ގޯލުގެ ތެރެއަށް ފޮނުވާލައިގެން ހަސަން ރާއިފް އަހްމަދު ކާމިޔާބުކުރި ލަނޑެކެވެ. ފުރަތަމަ ހާފު ނިމުނީ 1-0 ގެ ނަތީޖާއަކުން ރާއްޖެ ކުރީގައި އޮވެގެންނެވެ.
ދެވަނަ ހާފު ފެށުމާއެކު ބަނގްލަދޭޝް ޓީމުން ލަނޑެއް ޖަހައި ނަތީޖާ އެއްވަރު ކުރުމަށް މަސައްކަތް ކުރިއެވެ. ކައުންޓަރ އެޓޭކެއްގައި ރާކިބް ހުސައިން އުފައްދަން މަސައްކަތް ކުރި ހަމަލާއަށް ރާއްޖޭގެ ޝިފާއު ހުރަސްއެޅިއިރު، ޔާސީންގެ ހަމަލާވެސް ދިފާއުކުރީ ޝިފާއުއެވެ.
ރާއްޖެއަށް ލީޑު ފުޅާކޮށްދިނީ އިބްރާހިމް މަހްދީ ހުސައިންއެވެ. މިއީ ބަނގްލަދޭޝްގެ ޑިފެންޑަރެއް ކައިރިން ބީޓުކޮށްލުމަށްފަހު ގޯލުގެ މަތީ ކަނަށް ފޮނުވާލައިގެން ކާމިޔާބުކުރި ހިތްގައިމު ލަނޑެކެވެ.
އޭގެ އިރުކޮޅެއް ފަހުން ބަދަލު ކުޅުންތެރިއެއްގެ ގޮތުގައި ކުޅެން ނުކުން ޔާމީނު ވެސް ޑިފެންޑަރެއް ބީޓު ކޮށްލުމަށްފަހު ލަނޑެއް ޖެހިއެވެ. ނަމަވެސް އެލަނޑަކީ އޮފްސައިޑު ޕޮސިޝަނެއްގައި ހުރި ރާއްޖެ ކުޅުންތެރިއެއްގެ ފައިގައި ޖެހިފައި ވަން ލަނޑެކެވެ.
އޭގެ ފަހުން ޔާނު ފޮނުވާލި ދެބޯޅަ ގޯލުގެ ހުރަސް ދަނޑި މަތިން ބޭރަށް ދިޔައިރު އަހްމަދު ރިޒްވާން (ރިޒޭ) ފޮނުވާލި ބާރު ހަމަލާވެސް ދިޔައީ ހުރަސް ދަނޑި މަތިން ބޭރަށެވެ.
