ފ.އަތޮޅު ޗެމްޕިއަންކަން ބިލެތްދޫ އާއި މަގޫދޫއަށް

ރާއްޖެ އެޓޯލް ވޮލީބޯލް ޗެމްޕިއަންޝިޕްގައި ފ. އަތޮޅުގެ ޗެމްޕިއަންކަން ބިލެތްދޫ އާއި މަގޫދޫއިން ކާމިޔާބުކޮށްފިއެވެ.

އަތޮޅު ޗެމްޕިއަންޝިޕްގެ ފިރިހެން ޑިވިޝަން ޗެމްޕިއަންކަން ބިލެތްދޫ ރައިސިންގ ސްޓާ (ބީއާރުއެސް)ން ކާމިޔާބުކުރީ މަގޫދޫ ޒުވާނުންގެ ކްލަބް (އެމްޒެޑްސީ) އާއި ވާދަކޮށް ތިން ސެޓު އެއް ސެޓުންނެވެ.

މަގޫދޫގެ ރަސްމީ ވޮލީކޯޓުގައި ކުޅުނު މި މެޗުގެ ފުރަތަމަ ސެޓު 25-17 ން ބިލެތްދޫ ކާމިޔާބު ކުރިއިރު، މަގޫދޫއިން ވަނީ 26-24 ގެ ނަތީޖާއަކުން ދެވަނަ ސެޓު ކާމިޔާބުކޮށްފައެވެ. ބާކީ ދެ ސެޓު ބިލެތްދޫއިން ހޯދީ 25-15 އަދި 25-19 އިންނެވެ. މެޗުގެ މޮޅު ކުޅުންތެރިއަކަށް ހޮވުނީ ބިލެތްދޫ ޓީމުގެ ޖާޒީ ނަންބަރު 17، އަހްމަދު ނާފިއުއެވެ.

އަންހެން ޑިވިޝަނުގެ ފައިނަލުގައި ބައްދަލުކުރީ މަގޫދޫ ޒުވާނުންގެ ކުލަބް (އެމްޒެޑްސީ) އާއި ދަރަނބޫދޫ ޕާޕަލް ޕަވާސް (ޑީޕީޕީ) އެވެ. މި މެޗު މަގޫދޫ ޓީމުން ކާމިޔާބުކުރީ ސީދާ ތިން ސެޓުންނެވެ. މެޗުގެ ސެޓުތައް މަގޫދޫއިން ކާމިޔާބުކުރީ 25-23، 25-08 އަދި 25-11 ގެ ނަތީޖާއަކުންނެވެ. މި މެޗުގެ މޮޅު ކުޅުންތެރިއަކަށް ހޮވުނީ މަގޫދޫ ޓީމުގެ ޖާޒީ ނަންބަރު 10، އައިޝަތު ރީމާއެވެ.