އިންޑިއާއިން ރާއްޖޭގެ އުތުރަށް ޑައިރެކްޓް ފްލައިޓުތައް ބާއްވަނީ

ރާއްޖޭގެ އުތުރަށް ފަތުރުވެރިކަން ފުޅާކުރުމަށް ކުރާ މަސައްކަތުގެ ތެރެއިން، އިންޑިއާގެ ޑައިރެކްޓް ފްލައިޓްތައް އެ ސަރަހައްދަށް ބާއްވަން ނިންމާފައިވާކަން ޓޫރިޒަމް މިނިސްޓަރު ޑރ. އަބްދުﷲ މައުސޫމް ހާމަކުރައްވައިފިއެވެ.

ދާދިފަހުން އިންޑިއާގެ މުމްބާއީގައި ކުރިއަށްދިޔަ އޯޓީއެމް ފެއާރގެ ތެރެއިން ހާސިލްކުރެވުނު ކަންކަމާއި ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން މިނިސްޓަރު މައުސޫމް ވިދާޅުވީ މި ފެއާރގެ ތެރެއިން ރާއްޖޭގެ އުތުރަށް ފަތުރުވެރިކަން ފުޅާކުރުމާއި ގުޅޭ ގޮތުން ގިނަ މަޝްވަރާތަކެއް ކުރެވިގެންދިޔަ ކަމަށެވެ. މިގޮތުން އެފެއާރގައި ބައިވެރިވި އެއާރލައިންތަކާއެކު ކުރެވުނު މަޝްވަރާއިން އިންޑިއާގެ ޑައިރެކްޓް ފްލައިޓުތައް އުތުރަށް ބޭއްވޭނެ ކަމަށް ނިންމިގެންދިޔަ ކަމަށް މިނިސްޓަރު ވިދާޅުވިއެވެ.

މި ދަތުރުތައް ބާއްވާނީ ކޮން ތާރީޚެއްގައިކަން އަދި ނިންމާފައެެއް ނުވެއެވެ. މިނިސްޓަރު ވިދާޅުވީ މިކަމުގެ ޕްރޮޕޯސަލްތައް އެ އެއާރލައިންތަކުގެ ފަރާތުން ހުށަހަޅާނެ ކަމަށެވެ. އަދި ޕްރޮޕޯސަލް ހުށަހެޅުމުން އެ ދިރާސާކޮށް ފުރަތަމަ ފަށާ ދަތުރުތަކަށް ކޮންމެވެސް ވަރެއްގެ ލުޔެއް ދިނުމަށް ނިންމާފައިވާކަމަށެވެ. މިއީ ރާއްޖޭގެ އުތުރަށް ގަބޫލުނުކުރެވޭ ވަރުގެ ބޮޑު ބަދަލެއް އަންނާނެ ކަމެއް ކަމަށް ޓޫރިޒަމް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ރާއްޖެ އާއި އިންޑިއާ އާއި ދެމެދު އޮންނަ ޑިޕްލޮމެޓިކް ގުޅުމަކީ ވަރަށް ވަރުގަދަ ގުޅުމެއް ކަމަށެވެ. އަދި މި ގުޅުން އެހާ ވަރުގަދައިރު ޓްރެވަލް ޓްރޭޑް ގުޅުންވެސް އިތުރަށް ވަރުގަދަ ކުރަން މަސައްކަތްކުރަން ޖެހޭ ކަމަށެވެ. އެހެންކަމުން އޯޓީއެމް ފެއަރގައި ކުރެވުނު މަޝްވަރާތަކުގެ މައިގަނޑު އަމާޒަކީ ރާއްޖެ އަންނަ އިންޑިއާގެ ފަތުރުވެރިން އިތުރުކުރުމަށާއި، އުތުރުގެ ފަތުރުވެރިކަން ފުޅާކުރުމަށް ކަމަށް މިނިސްޓަރު ވިދާޅުވިއެވެ.

ޓޫރިޒަމް މިނިސްޓަރު އިތުރަށް ވިދާޅުވީ 2021 ވަނަ އަހަރު އިންޑިއާއިން އައި ފަތުރުވެރިންގެ އަދަދު ވަރަށް ބޮޑަށް އިތުރުވެފައިވާކަމަށެވެ. މިހާރު އަނެއްކާވެސް ފަތުރުވެރިންގެ އަދަދު ދަށްވެފައިވާކަމަށާއި، އެހެންކަމުން މިއީ ފަތުރުވެރިން އަންނަ އަދަދު އިތުރުކުރެވޭނެކަމުގެ އުންމީދު އޮތް ވަރުގަދަ މާކެޓެއް ކަމަށް މިނިސްޓަރު ވިދާޅުވިއެވެ.