ވަރލްޑްކަޕް 2022 ގެ ޓިކެޓް ގަތުމުގެ ފުރުސަތު މިމަހުގެ 29 އާއި ހަމައަށް ހުޅުވާލައިފި
ވަރލްޑްކަޕް 2022 މުބާރާތް ފަށާނީ ނޮވެމްބަރ 21 ވަނަ ދުވަހު
ފީފާ ވޯލްޑްކަޕް، ސަޕޯޓަރުން
ފީފާ ވަރލްޑްކަޕް 2022 ގެ މެޗުތަކުގެ ޓިކެޓް ގަތުމުގެ ފުރުސަތު މި މަހުގެ 29 ވަނަ ދުވަހާއި ހަމައަށް ހުޅުވާލައިފިއެވެ.
ޓިކެޓް ގަތުމުގެ ފުރުސަތު ހުޅުވާލާފައިވަނީ މާޗް 29 ވަނަ ދުވަހު ރާއްޖެ ގަޑިން 15:00 އާއި ހަމައަށެވެ. ޓިކެޓް ވިއްކުމުގައި ފުރަތަމަ ގަންނަ ފަރާތްތަކަށް އިސްކަން ދެވޭނެއެވެ. ޓިކެޓް ލިބެން ހުންނާނީ ފީފާގެ ޓިކެޓް ޕޯޓަލްhttps://www.fifa.com/ticketsއިންނެވެ.
މުބާރާތުގައި ބައިވެރިވާ ޓީމުތަކުގެ މެދުގައި ގުރުއަތުނެގި، ބައްދަލުކުރާނެ ޓީމުތައް ޔަގީންވުމާއެކު ޓިކެޓް ގަތުމަށް ޑިމާންޑް ބޮޑުވާނެއެވެ. ވީއިރު، މިއީ މުބާރާތުގެ ފައިނަލް ޑްރޯ ނެގުމުގެ ކުރިން ޓިކެޓް ގަތުމަށް ލިބޭނެ އެންމެ ފަހު ފުރުސަތެވެ. މުބާރާތް ފަށާ މެޗާއި ފައިނަލް މެޗު ފިޔަވާ އެހެން ހުރިހާ މެޗަކަށް ޓިކެޓު ގަތުމުގެ ފުރުސަތު މިހާރު ވަނީ ހުޅުވާލާފައެވެ.
ވަކި ޚާއްސަ މެޗުތަކަށް ޓިކެޓު ގަތުމާއި، ވަކި ޓީމެއް ކުޅޭ މެޗުތަކަށް ޓިކެޓު ގަތުމުގެ ފުރުސަތުވެސް މިހާރު ވަނީ ހުޅުވާލާފައެވެ. މީގެ އިތުރުން ސަޕޯޓަރުން ބޭނުންވާ ސްޓޭޑިއަމްއެއްގައި ކުޅޭ މެޗުތަކާއި ޚާއްސަ އެހީއަށް ބޭނުންވާ ފަރާތްތަކަށް ކަނޑައެޅިފައިވާ ޓިކެޓް ގަތުމަށްވެސް މިހާރު ވަނީ ހުޅުވާލާފައެވެ.
ޓިކެޓް ގަތުމުގެ ފުރުސަތު ދެން ހުޅުވާލާނީ އޭޕްރީލް މަހުގައި އޮންނަ ގުރުއަތު ނެގުމަށްފަހުއެވެ. ފީފާ ވަރލްޑްކަޕް 2022 އޮންނާނީ މިއަހަރުގެ ނޮވެމްބަރ 21 ން ޑިސެމްބަރ 18 ށް ގަތަރުގައެވެ.
