މޯލްޑިވްސް ރިފޯމް މޫވްމަންޓް (އެމްއާރްއެމް) ގެ 500ށްވުރެ ފޯމް އިލެކްޝަންސް ކޮމިޝަން (އީސީ) އިން ޕްރޮސެސް ނުކުރެވިވާކަމަށް އެ ޕާޓީން ބުނެފިއެވެ.

އެމްއާރްއެމުން ބުނީ އާދިއްތަ ދުވަހު ވެސް ފޯމުތައް ހުށަހަޅާފައިވާ ކަމަށެވެ. އަދިވެސް ގިނަ އަދަދެއްގެ ފޯމް ފޮނުވުމުގެ މަސައްކަތް ކުރަމުންދާ ކަމަށެވެ.

އެމްއާރްއެމުން މިހެން ބުނެފައިވަނީ ރާއްޖޭގައި ގާއިމްކޮށްފައިވާ ސިޔާސީ ޕާޓީތަކުގެ ތެރެއިން 3،000 މެމްބަރުން ހަމަނުވާ ޕާޓީތަކަށް ނޯޓިސްދޭން އީސީން ނިންމާފައިވަނިކޮށެވެ.

އެގޮތުން އިލެކްޝަންސް ކޮމިޝަންގެ ނާއިބު ރައީސް އިސްމާއިލް ވަނީ ސިއްހީ ކުއްލި ނުރައްކަލުގެ ހާލަތު ނިމުމާއި ގުޅިގެން ގާނޫނާ އެއްގޮތަށް 3،000 މެމްބަރުން ހަމަނުވާ ޕާޓީތަކަށް މެމްބަރުން ހަމަކުރުމަށް މުއްދަތު ދޭން ނިންމާފައިވާ ކަމަށް ވިދާޅުވެ ޓުވީޓް ކުރައްވާފައެވެ. މިގޮތުން 3،000 މެމްބަރުން ހަމަނުވާ 4 ޕާޓީއަކަށް ޤާނޫނުގައިވާ ގޮތުގެމަތިން، 3 މަސްދުވަހުގެ ނޯޓިސް ދޭން ނިންމާފައިވާ ކަމަށް ހަބީބު ވިދާޅުވިއެވެ.

2021 ވަނަ އަހަރު ނިމުނު އިރު 10،000 މެމްބަރުން ހަމަވެފައިވަނީ 4 ޕާޓީއެއްގައި ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވަނީ މީގެ ކުރިން ވިދާޅުވެފައެވެ. އެއީ އެމްޑީޕީ، ޕީޕީއެމް، ޖުމްހޫރީ ޕާޓީ އަދި އަދާލަތު ޕާޓީގައި ކަމަށް ފުއާދު ވިދާޅުވިއެވެ. އަދި އެމްއެންޕީއާއި، އެމްޑީއޭގައި 10،000 މެމްބަރުން ހަމަވާން ކައިރިވެފައިވާކަމަށް ފުއާދު ވިދާޅުވިއެވެ.

ރާއްޖޭގެ ސިޔާސީ ޕާޓީތަކުގެ ގާނޫނުގައި ވާގޮތުން ކޮންމެ ޕާޓީއެއްގައިވެސް މަދުވެގެން 3،000 މެމްބަރުން ހަމަވާންޖެހެއެވެ. މެމްބަރުން ހަމަނުވާނަމަ އެ އަދަދު ހަމަކުރުމަށް ވަކި މުއްދަތެއް ދެވެއެވެ. އެ މުއްދަތުގެ ތެރޭގައި މެމްބަރުން ހަމަނުކުރާނަމަ އެ ޕާޓީއެއް އުވިގެންދާނެއެވެ. އެހެންނަމަވެސް ސިއްހީ ކުއްލި ނުރައްކަލުގެ ހާލަތާއި ގުޅިގެން މިގޮތަށް މެމްބަރުން ހަމަކުރުމަށް މުއްދަތު ދިނުމާއި، ޕާޓީ އުވާލުން ވަނީ މެދުކަނޑާލާފައެވެ.