ކޯޗު އިހުސާން ޢަބްދުލްޣަނީ (ސާންތި) ކޯޗާއެކު ފުޓްބޯޅަ ކުޅުމުގެ ތެރެއަށް އަލަށް ނިކުންނަން ޔުނައިޓެޑް ވިކްޓްރީ އިން ޒުވާން ކުދިންނަށް ފުރުޞަތު ހުޅުވާލައިފިއެވެ. މިފަހަރު ޔޫވީ އިން ފުރުޞަތު ހުޅުވާލީ 16 އަހަރުން ދަށުގެ ކުޅުންތެރިންނަށެވެ.

ޔުނައިޓެޑް ވިކްޓްރީ އިން ޓްރަޔަލް އަށް ހުޅުވާލީ 15 އަހަރާއި 16 އަހަރުގެ ކުޅުންތެރިންނަށެވެ. ކޯޗު ސާންތިގެ މައިގަނޑު އަމާޒަކީ ކުޅުމުގެ ފުރުޞަތަށް އެދިގެން ތިބި ކުޅުންތެރިންނަށް ފުރުޞަތު ދީގެން މިއަހަރު އެފްއޭއެމްއިން ބާއްވާ ޔޫތް މުބާރާތަށް ތައްޔާރުވުމެވެ. 16 އަހަރުން ދަށަށް އަމާޒުކޮށްގެން ޖޫން މަހު މުބާރާތެއް ބޭއްވުމަށް އެފްއޭއެމްއިން ވަނީ ނިންމާފައެވެ. ޔުނައިޓެޑް ވިކްޓްރީގެ ޓްރަޔަލްސް މިރޭ ފަށާއިރު، މިމަހުގެ ނިޔަލަށް ކުރިއަށްގެންދާނެކަމަށް ޔުނައިޓެޑް ވިކްޓްރީ އިިން ސޯޝަލް މީޑިޔާ މެދުވެރިކޮށް ޢާއްމުކޮށްފައިވެއެވެ. ޓްރަޔަލްސް އޮންނާނީ އާދިއްތަ, އަންގާރަ އަދި ބުރާސްފަތި ދުވަހުގެރޭ 07:00ން 09:00 އަށް ޓާފް ދަނޑުގައެވެ.

ކޯޗު ސާންތި ބުނީ ޔުނައިޓެޑް ވިކްޓްރީގެ އާއިލާގެ ތެރެއިން ކުޅުމުގެ ފުރުޞަތު ހޯދަން ބޭނުންވާ ކުޅުންތެރިން ޓްރަޔަލްސް ގައި ބައިވެރިވާން ހުޅުވާލާފައިވާކަމަށެވެ. ކޮންމެ ކުޅުންތެރިއަކަށްވެސް މަރުހަބާ ކިޔާނެކަމަށާއި, ފުރުޞަތު ދޭނެކަމަށް ސާންތި ބުނެފައި ވެއެވެ. 19 އަހަރުން ދަށުގެ ޔޫތް ޗެމްޕިއަންޝިޕަށްވެސް ޔުނައިޓެޑް ވިކްޓްރީން ޓީމް އެކުލަވާލާ މުބާރާތުގައި ވާދަކުރީ ހަމަ މިގޮތަށް ޓްރަޔަލް އަށް ހުޅުވާލައިގެން, އާ ކުޅުންތެރިންނަށް ފުރުޞަތު ދީގެންނެވެ. އަދި ޔޫވީގެ ސީނިއަރ ޓީމްގައިވެސް އެފަދަ ކުޅުންތެރިން އެބަތިއްބެވެ. އީގަލްސްގައި މަސައްކަތްކުރިއިރުވެސް ސާންތި ވަނީ ޒުވާން ކުޅުންތެރިންނަށް ފުރުޞަތު ދީފައެވެ.