ޖަލު އޮފިސަރުންނަށް އަމާޒުކޮށް ޔޫއެންއޯޑީސީއިން މާފުށީ ޖަލުގައި ތަމްރީން ޕްރޮގްރާމެއް ފަށައިފި
ސްރީލަންކާގެ 09 ޕްރިޒަން އޮފިސަރުންނާއި ރާއްޖޭގެ 08 ޕްރިޒަން އޮފިސަރުން ވަނީ ބައިވެފައި
ޖަލު އޮފިސަރުންނަށް އަމާޒުކޮށް ޔޫއެންއޯޑީސީއިން މާފުށީ ޖަލުގައި ތަމްރީން ޕްރޮގްރާމެއް ފެށުން
ޖަލު އޮފިސަރުންނަށް އަމާޒުކޮށް ޔުނައިޓެޑް ނޭޝަންސް އޮފިސް އޮން ޑްރަގްސް އެންޑް ކްރައިމް (ޔޫއެންއޯޑީސީ)ގެ ގްލޯބަލް މެރީޓައިމް ކްރައިމް ޕްރޮގްރާމް (ޖީއެމްސީޕީ) އިން ސްރީ ލަންކާގެ ޕްރިޒަން އޮފިސަރުންނަށާއި މޯލްޑިވްސް ކަރެކްޝަނަލް ސަރވިސްގެ ޕްރިޒަން އޮފިސަރުންނަށް ޚާއްސަ ތަމްރީން ޕްރޮގްރާމެއް މާފުށީ ޖަލުގައި ފަށައިފިއެވެ.
އާދިއްތަ ދުވަހު ފެށި މި ޓްރެއިނިންގ އާއި ގުޅޭގޮތުން ކަރެކްޝަންސްއިން މައުލޫމާތުދޭ ގޮތުގައި 05 ދުވަހަށް ކުރިއަށް ގެންދާ މި ޓްރޭނިންގ ޕްރޮގްރާމް ހިންގުމުގެ ބޭނުމަކީ ޕްރިޒަން އޮފިސަރުން ތަމްރީން އަދި ތަރައްޤީކޮށް "މަންޑޭލާ ރޫލްސްއަށް" އަހުލުވެރި ކުރުވުމެވެ. ހަމައެއާއެކު، ކޯވިޑް-19 ފަދަ ބަލިތައް ފެތުރުމުގެ ސަބަބުން ދިމާވެދާނެ މައްސަލަތަކާއި ގޮންޖެހުންތަކަށް ތައްޔާރުވެ، އެކަންކަން ޙައްލުކުރާނެ އުކުޅުތައް ދަސްކޮށްދިނުންވެސް މި ތަމްރީނުގެ މަޤްސަދުތަކުގެ ތެރޭގައި ހިމެނޭކަމަށް ކަރެކްޝަންސްއިން މައުލޫމާތު ދެއެވެ.
މި ޓްރޭނިންގ ޕްރޮގްރާމްގައި ސްރީލަންކާގެ 09 ޕްރިޒަން އޮފިސަރުންނާއި ރާއްޖޭގެ 08 ޕްރިޒަން އޮފިސަރުން ވަނީ ބައިވެފައެވެ.
މި ޓްރޭނިންގ ޕްރޮގްރާމް އިފްތިތާޙްކޮށްދެއްވީ ކޮމިޝަނަރ އޮފް ޕްރިޒަންސް (ސީ]ީ) އަޙްމަދު މުޙައްމަދުފުޅުއެވެ. އެކަމަށް ބޭއްވި ޚާއްސަ ރަސްމިއްޔާތުގައި ވާހަކަދައްކަވަމުން ސީޕީ ވަނީ ކޯވިޑް-19 އާ ގުޅިގެން ދިވެހި ސަރުކާރުން ކުއްލި ނުރައްކަލުގެ ޙާލަތު އިޢުލާންކޮށް އަދި ލޮކްޑައުންއަށް ދިއުމުގެ ސަބަބުން އެމްސީއެސްއަށް ކުރިމަތިވި ގޮންޖެހުންތައް ހިއްސާ ކުރައްވާފައެވެ.
ސީޕީ ވިދާޅުވި ގޮތުގައި ޤައިދީންނާއި ބަންދު މީހުންގެ %84 ކޯވިޑް-19 ވެކްސިންގެ ފުރަތަމަ ޑޯޒް އަދި %73 ވެކްސިންގެ ދެވަނަ ޑޯޒް ވަނީ ފުރިހަމަ ކޮށްފައެވެ. އަދި އޮފިސަރުންނާއި މުވައްޒަފުންގެ ތެރެއިން %94 ވެކްސިންގެ ފުރަތަމަ ޑޯޒް އަދި %91 ދެވަނަ ޑޯޒް ފުރިހަމަ ކޮށްފައިވާކަމަށް ސީޕީ ފާހަގަކުރެއްވިއެވެ.
ކޮމިޝަނަރުގެ ވާހަކަފުޅު ނިންމާލައްވަމުން އެމްސީއެސްގެ އޮފިސަރުން ލޮކްޑައުންތެރޭގައި ޢާއިލާއާ ދުރުގައި ޖަލުގައި ބަންދުވެ ތިބެ ވީ ޤުރުބާނީ އާއި ކުރި މަސައްކަތްތައް ފާހަގަކުރެއްވިއެވެ. އަދި ޔޫއެންއޯޑީސީއިން ދެއްވަމުންގެންދާ އެހީތެރިކަމާއި އެއްބާރުލުމަށް އަލިއަޅުއްވާލައްވައި، ޔޫއެންއޯޑީސީއަށް އިޚްލާސްތެރިކަމާއެކު ޝުކުރުއަދާކުރެއްވިއެވެ.
މި ޓްރޭނިންގ ޕްރޮގްރާމްގެ ބައިވެރިންނަށް ޑައިނަމިކް ސެކިއުރިޓީ އެޕްލިކޭޝަން، ހިއުމަން ރައިޓްސް، މަންޑޭލާ ރޫލްސް، ކޯޑް އޮފް އެތިކްސް، ކޮންޓިންޖެންސީ ޕްލޭނިންގ، ޔޫސް އޮފް ފޯސް ކޮންޓިނުއަމް، އިންސިޑަންޓް މެނޭޖްމަންޓް، ޕްރޮސީޖުރަލް ސެކިއުރިޓީ – އެސްކޯޓްސް، ކަރެކްޝަންސް ލެވެރޭޖް އޮން ޓެކްނޮލޮޖީ – ޕޯސްޓް ޕެންޑެމިކް ފަދަ މޮޑިއުލްތައް ކިޔަވާދޭނެކަމަށް ކަރެެކްޝަންސްއިން ބުނެއެވެ.
