ޖަޕާނުން އިންޑިޔާގައި 42 ބިލިއަން ޑޮލަރުގެ އިންވެސްޓްމެންޓެއް ކުރަނީ
20 މާރިޗު 2022 | އާދީއްތަ 02:05ދެ ގައުމުގެ ލީޑަރުން ވަނީ ސަލާމަތީ ކަންކަން ވަރުގަދަކުރުމާއި ޔޫކްރެއިން ހަނގުރާމައާއި އިގްތިޞާދީ ގޮތުން ދެގައުމުގެ ދެމެދުގައި ގުޅުން ބަދަހިކުރެވޭނެ ގޮތްތަކާއި ގުޅޭގޮތުން މަޝްވަރާކުރައްވާފައި
ޖަޕާންގެ ބޮޑުވަޒީރު ފުމިއޯ ކިޝިޑާ އާއި އިންޑިޔާގެ ބޮޑުވަޒީރު ނަރެންދްރަ މޯދީ
ޖަޕާނުން ކުރިޔަށް އޮތް 5 އަހަރު ތެރޭގައި އިންޑިޔާގައި 42 ބިލިއަން ޑޮލަރުގެ އިންވެސްޓްމެންޓެއް ކުރާނެކަމަށް އެގައުމުގެ ބޮޑުވަޒީރު ފުމިއޯ ކިޝިޑާ ވިދާޅުވެއްޖެއެވެ.
ޖަޕާނުގެ ބޮޑުވަޒީރު މިކަން ހާމަކުރެއްވީ އިންޑިޔާއަށް މިހާރު ކުރައްވަމުންގެންދަވާ ދަތުރުފުޅުގައި އިންޑިޔާގެ ބޮޑުވަޒީރު ނަރެންދްރަ މޯދީ އާއި ބައްދަލުކުރައްވައެވެ. ދެ ގައުމުގެ ލީޑަރުން ބައްދަލުކުރައްވާ ސަލާމަތީ ކަންކަން ވަރުގަދަކުރުމާއި ޔޫކްރެއިން ހަނގުރާމައާއި އިގްތިޞާދީ ގޮތުން ދެގައުމުގެ ދެމެދުގައި ގުޅުން ބަދަހިކުރެވޭނެ ގޮތްތަކާއި ގުޅޭގޮތުން މަޝްވަރާކުރައްވާފައިވެއެވެ.
ދެބޭފުޅުންގެ މަޝްވަރާތަކަށްފަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މޯދީ ވިދާޅުވީ ޖަޕާނަކީ އިންޑިޔާގެ ގާތް ރަހުމަތްތެރިއެއް ކަމަށެވެ. އިންޑިޔާ އާއި ޖަޕާނާ ދެގައުމަށްވެސް ދެމެހެއްޓެނެވި ގޮތެއްގައި ހަކަތަ ސަޕްލައިކުރުމުގެ މުހިންމުކަން އެނގޭކަމަށް ވިދާޅުވިއެވެ. މީގެއިތުރުން އިންޑިޔާ އާއި ޖަޕާނާ ދެމެދު އޮތް ގުޅުމުގެ ސަބަބުން އިންޑޯ ޕެސިފިކް ސަރަހައްދާއި މުޅި ދުނިޔޭގައިވެސް ސުލްހައާއި އަމާންކަމާއި ހަމަޖެހުން ގާއިމުކުރުމަށް މަގުފަހިވާކަމަށް މޯދީ ވިދަޅުވިއެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ފުމިއޯ ކިޝިޑާ ވިދާޅުވީ ވީއެންމެ އަވަހަކަށް ޖަޕާނާއި އިންޑިޔާ އާއި ދެމެދު އިތުރު ބައްދަލުވުމެއް ބާއްވާނެކަމަށެވެ. ފުމިއޯ ކިޝިޑާ އިތުރަށް ވިދާޅުވީ މިވަގުތު ދުނިޔެއަށް ވަނީ ބޮޑެތި ކަންތައްތަކާއި ކުރިމަތިވެފައިކަމަށެވެ. އަދި މިހާރު ރަޝިޔާއިން ޔޫކްރެއިންއަށް ދެމުންދާ ހަމަލާތަކާއި ގުޅޭގޮތުންވެސް ދެ ބޭފުޅުން ވަނީ މަޝްވަރާކުރައްވާފައެވެ.
ސާފު ހަކަތަ ފޯރުކޮށްދިނުމާއި ގުޅޭގޮތުން ދެގައުމުން އެއްބަސްވުމަކާއި ހަމައަށް އައިސްފައިވާއިރު ހަ އެއްބަސްވުމެއްގައި ސޮއިކޮށްފައިވެއެވެ.
ޖަޕާނަކީ އިންޑިޔާއަށް އެންމެ ބޮޑަށް އިންވެސްޓްކުރާ ގައުމެވެ.
ޖަޕާނުން ވަނީ ފާއިތުވި ދުވަސްތަކުގައި އިންޑިޔާގެ އެކި ސިޓީތަކުގެ އިންފްރާސްޓަރަކްޗަރ ތަރައްގީކުރުމާއި ހައި ސްޕީޑް ރެއިލްވޭ އާއި ޓްރެއިން ޓެކްނޮލޮޖީ ތަރައްގީކުރުމަށް އެހީތެރިކަން ފޯރިކޮށްދީފައެވެ.
2014 ވަނަ އަހަރު ޖަޕާނުގެ އޭރުގެ ބޮޑުވަޒީރު ޝިންޒޯ އަބޭ ވަނީ އިންޑިޔާއަށް ކުރެއްވި ދަތުރުފުޅުގައި އެގައުމަށް 3.5 ޓްރިލިއަލް ޔެންގެ އިންވެސްޓްމެންޓްތައް އިއުލާންކުރައްވާފައެވެ. އެފަހަރުވެސް އިންވެސްޓްމަންޓް އިއުލާންކޮށްފައިވަނީ 5 އަހަރުގެ މުއްދަތަށެވެ.
