އުތުރު ކޮރެއާ އިން ކުރި މިސައިލް ޓެސްޓާ ގުޅިގެން ޖަޕާނުން އެކަމަށް ފިޔަވަޅު އަޅާނެ: ބޮޑު ވަޒީރު އަބޭ
އުތުރު ކޮރެއާގެ މިސައިލް ޖަޕާނުގެ ކަނޑުގެ ސަރަހައްދުގެ 450 ކިލޯމީޓަރަށް ދަތުރުކުރި
އުތުރު ކޮރެއާ އިން ދަނީ ގާތްގަތުގައި ގިނަ މިސައިލް ޓެސްޓްތަކެއް ކުރަމުން
އެންމެ ފަހުން ކުރި މިސައިލް ޓެސްޓާ ގުޅިގެން އުތުރު ކޮރެއާއާ ދެކޮޅަށް ފިޔަވަޅު އަޅާނެ ކަމަށް ޖަޕާނުން ބުނެފިއެވެ.
ބެލިސްޓިކް މިސައިލްގެ ވައްތަރެއް ކަމަށްވާ ސްކަޑް މިސައިލެއް އުތުރު ކޮރެއާ އިން ޓެސްޓް ކުރިއިރު، ޖަޕާނުގެ ކަނޑުގެ ސަރަހައްދުގެ 450 ކިލޯމީޓަރަށް ދަތުރު ކުރުމަށް ފަހު މިސައިލް ވަނީ ވެއްޓިިފައެވެ.
ޖަޕާނުގެ ބޮޑު ވަޒީރު ޝިންޒޯ އަބޭ ވިދާޅުވީ އުތުރު ކޮރެއާއާ ދެކޮޅަށް މަސައްކަތް ކުރުމަށް ޖަޕާނު ސިފައިން އެމެރިކާ ސިފައިނާ ގުޅޭނެ ކަމަށެވެ. ބޮޑު ވަޒީރު އަބޭ ނޫސްވެރިންނަށް ވިދާޅުވީ ދާދިފަހުން ބޭއްވި ޖީ7 ގެ ސަމިޓުގައި، ހުރިހާ ގައުމަކަށް ވެސް އެއްބަސްވެވުނު ފަދައިން އުތުރު ކޮރެއާގެ މައްސަލައަކީ ބައިނަލްއަގްވާމީ މުޖުތަމައަށް ވަރަށް މުހިންމު މައްސަލައެއް ކަމަށެވެ. އެހެން ކަމުން އެމެރިކާއާ ގުޅިގެން އުތުރު ކޮރެއާއާ ދެކޮޅަށް މަސައްކަތް ކުރާނެ ކަމަށެވެ.
ވޯހެޑް އުފުލޭވަރުގެ މިސައިލްތައް ޓެސްޓް ކުރުމުގައި ކާމިޔާބުތަކެއް އުތުރު ކޮރެއާއިން ހޯދާ ކަމަށް އޮބްޒާވަރުން ބުނެއެވެ.
އުތުރު ކޮރެއާއިން ނިއުކްލިއާ ހަތިޔާރުގެ އެއްވެސް ހަރަކާތެއް ހިންގުމާއި އަދި އެއްވެސް މިސައިލެއް ޓެސްޓްތަކެއް ކުރުން އދ. އިން ވަނީ މަނާކޮށްފައެވެ. އެހެން ނަމަވެސް އދ. ގަރާރުތަކަށް އުތުރު ކޮރެއާ އިން މިހާތަނަަށް ބޯލަނބާފައެއް ނުވެއެވެ.
