އިމިގްރޭޝަންގެ މާލީ ބަޔާނުގައި ފާހަގަކޮށްފައިވާ އަދަދު ސައްހައެއް ނޫން: އޮޑިޓް ރިޕޯޓު
17 މާރިޗު 2022 | ބުރާސްފަތި 07:29މާލީ ބަޔާންތަކުގައި ހިމެނޭ އަދަދާއި، އަހަރު ނިމުނުއިރު ބާކީހުރި ފައިސާގެ ސައްހަކަން ޔަގީނެއް ނުކުރެވޭ
ދައުލަތުގެ ގިނަ އިދާރާތަކެއް ހުންނަ ވެލާނާގެ
2018 ވަނަ އަހަރު ނިމުނުއިރު މޯލްޑިވްސް އިމިގްރޭޝަންގައި ބާކީ ހުރި ފައިސާގެ ގޮތުގައި މާލީ ބަޔާނުގައި ފާހަގަކޮށްފައިވާ އަދަދަކީ ސައްހަ އަދަދެއްކަން ޔަގީންކުރެވިފައިނުވާކަމަށް އިމިގްރޭޝަންގެ އޮޑިޓް ރިޕޯޓުން ހާމަވެއްޖެއެވެ.
އޮޑިޓް އޮފީހުން އާންމުކޮށްފައިވާ މޯލްޑިވްސް އިމިގްރޭޝަންގެ 2018 ވަނަ އަހަރުގެ އޮޑިޓް ރިޕޯޓުގައި ވާގޮތުން 2018 ވަނަ އަހަރު ނިމުނުއިރު މޯލްޑިވްސް އިމިގްރޭޝަންގައި ބާކީ ހުރި ފައިސާގެ ގޮތުގައި އިމިގްރޭޝަންގެ ރިކޯޑުތަކުން ދައްކާއަދަދަކީ 1,644,107,060 (އެއް ބިލިއަން ހަ ސަތޭކަ ސާޅީސް ހަތަރު މިލިއަން އެއް ސަތޭކަ ހަތް ހާސް ފަސްދޮޅަސް) ރުފިޔާއެވެ.
ނަމަވެސް، އިމިގްރޭޝަންގެ 31 ޑިސެންބަރ 2018 އަށް ނިމުނު މާލީ އަހަރުގެ މާލީ ބަޔާންތަކުގައި ހިމެނޭ "ފައިސާ ލިބުނު ގޮތާއިހޭދަކުރެވުނު ގޮތުގެ ބަޔާން"ގައި، އަހަރު ނިމުނުއިރު ބާކީހުރި ފައިސާގެ ގޮތުގައި ބަޔާންކޮށްފައިވަނީ 1,642,925,616 (އެއް ބިލިއަންހަ ސަތޭކަ ސާޅީސް ދެ މިލިއަން ނުވަ ސަތޭކަ ފަންސަވީސް ހާސް ހަ ސަތޭކަ ސޯޅަ) ރުފިޔާ ކަމަށް އޮޑިޓް ރިޕޯޓުގައި ފާހަގަކޮށްފައިވެއެވެ. މިއީ އަހަރު ނިމުނުއިރު ބާކީ ހުރި ފައިސާގެ ގޮތުގައި ރިކޯޑުތަކުން ދައްކާ އަދަދަށް ވުރެ 1,181,443 (އެއް މިލިއަން އެއް ސަތޭކަ އަށްޑިހަ އެއް ހާސް ހަތަރު ސަތޭކަސާޅިސް ތިނެއް) ރުފިޔާ މަދު އަދަދެއްކަމަށް އޮޑިޓް ރިޕޯޓުގައި ބުނެފައިވެއެވެ.
އެހެންކަމުން، އިމިގްރޭޝަންގެ 31 ޑިސެންބަރ 2018 އަށް ނިމުނު މާލީ އަހަރުގެ މާލީ ބަޔާންތަކުގައި ހިމެނޭ "ފައިސާ ލިބުނު ގޮތާއި ހޭދަކުރެވުނު ގޮތުގެ ބަޔާން"ގައި އަހަރު ނިމުނުއިރު ބާކީހުރި ފައިސާގެ ގޮތުގައި ބަޔާންކޮށްފައިވާ 1,642,925,616 (އެއް ބިލިއަންހަ ސަތޭކަ ސާޅީސް ދެ މިލިއަން ނުވަސަތޭކަ ފަންސަވީސް ހާސް ހަ ސަތޭކަ ސޯޅަ) ރުފިޔާއަކީ ސައްހަ އަދަދު ކަމަށް ޔަޤީންކުރެވެން ނެތް ކަމަށް އޮޑިޓް އޮފީހުން ބުނެފައިވެއެވެ.
މިކަން އިސްލާހުކުރުމަށް އޮޑިޓް ރިޕޯޓުގައި ލަފާދީފައިވާއިރު މި ރިޕޯޓުގައި ވަނީ މާލީ ބަޔާންތަކުގައި ހިމެނޭ ފައިސާ ލިބުނު ގޮތާއި ހޭދަކުރެވުނު ގޮތުގެ ބަޔާނުގައި އެ އަހަރުގެ ނިޔަލަށް ބާކީ ހުރި ފައިސާގެ ގޮތުގައި ބަޔާންކޮށްފައިވާ އަދަދާއި އިދާރާގެ ރިކޯޑުތަކުން އަހަރު ނިމުނުއިރު ހުރި ފައިސާގެ ގޮތުގައި ދައްކާ ބާކީ އާއި ރިކޮންސައިލްކޮށް މާލީ ބަޔާންތަކާއި އަދި އިދާރާގެ ރިކޯޑްތައް އިސްލާހުކުރުމަށް އިމިގްރޭޝަނަށް އަންގާފައެވެ.
މީގެ އިތުރުން ލިބެން ޖެހޭ އާމްދަނީއާއި އެނޫން ގޮތްގޮތުން ލިބެން ޖެހޭ ފައިސާގެ ތެރެއިން ނުލިބިހުރި ފައިސާގެ މައުލޫމާތުތައް ފުރިހަމައަށް އަދާހަމަކޮށް، އެކަށީގެންވާ ގޮތެއްގައި ރިކޯޑުކޮށް ބަލަހައްޓާފައި ނުވާކަމަށް އޮޑިޓް ރިޕޯޓުން ފާހަގަކޮށްފައިވެއެވެ. އޮޑިޓް އޮފީހުން ބުނީ ދައުލަތުގެ އޮފީސްތަކުން އަހަރު ނިމުމުން، އެއޮފީހެއްގެ އަހަރީ މާލީބަޔާން ތައްޔާރުކޮށް، ހިނގާ އަހަރުގެ މާރޗު މަހުގެ 15 ވަނަ ދުވަހުގެ ނިޔަލަށް މިނިސްޓްރީ އޮފް ފިނޭންސްއަށް ހުށަހަޅަންވާނެކަމަށް ދައުލަތުގެ މާލިއްޔަތުގެ ގަވާއިދުގެ 15.02 ވަނަ މާއްދާގެ (ހ) ގައި ބަޔާންކޮށްފައިވާ ކަމަށެވެ. އަދި އަހަރީ މާލީ ބަޔާނުގައި ލިބެންޖެހޭ އާމްދަނީއާއި އެނޫން ގޮތްގޮތުން ލިބެންޖެހޭ ފައިސާގެ ތެރެއިން ނުލިބިހުރި ފައިސާގެ ތަފުސީލް ހިމަނަންވާނެކަމަށް އެމާއްދާގެ 9 ވަނަ ނަންބަރުގައި ބަޔާންކޮށްފައިވެއެވެ.
މީގެ އިތުރުން، 31 ޑިސެމްބަރު 2018 އަށް ނިމުނު މާލީ އަހަރުގެ މާލީ ބަޔާންތަކުގައި ހިމެނޭ "މިލްކިއްޔާތުގެ ބަޔާން"ގައި ނުލިބިހުރި އާމްދަނީ އާއި އެހެނިހެން ފައިސާގެ ގޮތުގައި ބަޔާންކޮށްފައިވާ 1,199,865 (އެއް މިލިއަން އެއް ސަތޭކަ ނުވަދިހަ ނުވަ ހާސް އަށްސަތޭކަ ފަސްދޮޅަސް ފަހެއް) ރުފިޔާގެ ތެރޭގައި ކުރީ އަހަރުތަކުގައި އިމިގްރޭޝަނުން ކްރެޑިޓަށް ފޯރުކޮށްދިން ޚިދުމަތްތަކަށް ލިބެންޖެހޭ ފައިސާ އާއި، ކުރީ އަހަރުތަކާ ގުޅޭ ޖޫރިމަނާގެ ގޮތުގައި ލިބެންޖެހޭ ފައިސާ ހިމަނާފައި ނުވާކަމަށް އޮޑިޓް ރިޕޯޓުގައި ބުނެފައިވެއެވެ.
މިކަމުގައި ގާނޫނުގައި ބަޔާންކޮށްފައިވާ ގޮތާ އެއްގޮތަށް އަމަލުކުރުމަށް ލަފާދީފައިވެއެވެ. އަދި 31 ޑިސެންބަރު 2018 އަށް ނިމުނު މާލީ އަހަރުގެ މާލީ ބަޔާންތަކުގައި ހިމެނޭ "މިލްކިއްޔާތުގެ ބަޔާން" ގައި އިމިގްރޭޝަނަށް ނުލިބި ހުރި އާމްދަނީ އާއި އެހެނިހެން ފައިސާގެ ސައްހަ އަދަދު ހިމެނުމަށް އޮޑިޓް އޮފީހުން ވަނީ އަންގާފައެވެ.
އޮޑިޓަރ ޖެނެރަލްސް އޮފީހުން އާންމުކޮށްފައިވާ އިމިގްރޭޝަންގެ އޮޑިޓް ރިޕޯޓުގައި ވަނީ މައިގަނޑު 6 ކަމެއް ފާހަގަކޮށްފައެވެ. އަދި އެކަންކަން އިސްލާހުކުރަން ލަފާވެސް ދީފައިވެއެވެ.
