ޓްރާންސްޕޯރޓް ކޯޕަރޭޝަން އަދި އެއާރކްރާފްޓް އެކްސިޑެންޓް އިންވެސްޓިގޭޝަން އާއި އިންސިޑެންޓް އިންވެސްޓިގޭޝަން ހަރުދަނާކުރަނީ
އެއްބަސްވުންތަކުގެ ދަށުން، ދިވެހިރާއްޖެއާއި ސިންގަޕޫރާއި ދެމެދު ދަތުރުފަތުރުގެ ދާއިރާގެގުޅުން އިތުރަށް ވަރުގަދަ ކުރެވިގެންދާނެ
ސިންގަޕޫރާއި ދިވެހިރާއްޖެއައި ދެމެދު ވެވުނު އެއްބަސްވުމުގައި ސޮއިކުރުމުގެ ތެރެއިން
ޓްރާންސްޕޯރޓް ކޯޕަރޭޝަން އަދި އެއާރކްރާފްޓް އެކްސިޑެންޓް އިންވެސްޓިގޭޝަން އާއި އިންސިޑެންޓް އިންވެސްޓިގޭޝަން ހަރުދަނާކުރުމަށް، ދިވެހިރާއްޖެއާއި ސިންގަޕޫރާ ދެމެދު، 2 މެމޮރެންޑަމް އޮފް އަންޑަސްޓޭންޑިންގ އެއްގައި ސޮއިކޮށްފިއެވެ.
ދިވެހިރާއްޖޭގެ ފަރާތުން މިއެއްބަސްވުމުގައި ސޮއި ކުރެއްވީ މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން ޢައިޝަތު ނަހުލާއެވެ. ސިންގަޕޫރު ސަރުކާރުގެ ފަރާތުން ސޮއި ކުރެއްވީ ސިންގަޕޫރުގެ މިނިސްޓަރ އޮފް ޓްރާންސްޕޯޓް އަދިމިނިސްޓަރ އިންޗާރޖް އޮފް ޓްރޭޑް ރިލޭޝަންސް މިނިސްޓަރ އެސް އިސްވަރަންއެވެ.
ސިންގަޕޫރުގައި ސޮއިކުރެވުނު މި އެއްބަސްވުންތަކުގެ ދަށުން، ދިވެހިރާއްޖެއާއި ސިންގަޕޫރާއި ދެމެދު ދަތުރުފަތުރުގެ ދާއިރާގެގުޅުން އިތުރަށް ވަރުގަދަ ކުރެވިގެންދާނެއެވެ. މިގެތެރޭގައި ރާއްޖޭގެ ވައިގެ ދަތުރުފަތުރާއި ބެހޭ ތަމްރީނާއި، ކަނޑުދަތުރުފަތުރުގެ ދާއިރާއިން ބޭނުންވާ ފަންނީ އެހީތެރިކަން ފޯރުކޮށް ދިނުމާއި، މަގުމަތީގެ ޓްރެފިކް މެނޭޖް ކުރުމާއި އަދި މަތިންދާބޯޓު ތަކަށް ދިމާވާ އެކްސިޑެންޓްތަކާއި ވައިގެ ދަތުރުފަތުރުގައި ހިނގާ ޙާދިސާތައް ތަޙުޤީޤު ކުރުން ހިމެނެއެވެ.
މިއެއްބަސްވުންތަކުގައި ސޮއިކުރި ބައްދަލްވުމުގައި ވާހަކަ ދައްކަވަމުން މިނިސްޓަރ ޢައިޝަތު ނަހުލާ ވިދާޅުވީ މިއެއްބަސްވުންތަކަކީ ރާއްޖެއާއި ސިންގަޕޫރާއި ދެމެދު އޮންނަ ގުޅުން އިތުރަށް ވަރުގަދަ ކުރުމަށް ދެގައުމުންވެސް ދޭއަހައްމިއްޔަތުކަން ރަމްޒުކޮށްދޭ ކަމެއް ކަމުގައެވެ. އަދި މިކަމުގެ ސަބަބުން ދެގައުމުގެ ދެމެދުގައި ދަތުރުފަތުރުގެ ދާއިރާ ތަރައްޤީކުރުމަށް ކުރެވޭ މަސައްކަތަށް އިތުރު ހިތްވަރު ލިބިގެންދާނެކަމަށެވެ.
މިބައްދަލްވުމުގައި ސިންގަޕޫރުގެ މިނިސްޓަރ އެސް.އިސްވަރަން ވިދާޅުވީ ސިންގަޕޫރަކީ ރާއްޖެއާ ވަރަށް ގާތް ގުޅުމެއް އޮންނަ ޤައުމެއް ކަމަށާއި މި އެއްބަސްވުންތަކުގައި ސޮއިކުރެވުމުން ދަތުރުފަތުރުގެ ދާއިރާއިން ދެޤައުމުގެ ދެމެދުގައި އޮތް ގުޅުން އިތުރަށް ބަދަހިވެގެންދާނެ ކަމަށެވެ.
