ސްޕޯޓްސް އެވޯޑްސް 2022: ރީޑް، ގީބާ އަދި ފަޑީގާ ރާއްޖެއަށް

މޯލްޑިވްސް ސްޕޯޓްސް އެވޯޑްސް 2022 ގައި ބައިވެރިވުމަށް ވީލްޗެއަރ ޓެނިސް ކުޅުންތެރިޔާ ގޯޑަން ރީޑް، ބްރެޒިލްގެ ވޮލީ ލެޖެންޑް ގިލްބާޓޯ ގޮޑޯއި (ގީބާ) އަދި ސެނެގާލްގެ ކުރީގެ ފުޓްބޯޅަ ކުޅުންތެރިޔާ ހަލީލޫ ފަޑީގާ ރާއްޖެ އަތުވެއްޖެއެވެ.

ކުޅިވަރުގައި ފާހަގަކުރެވޭ މި ލެޖެންޑުން ރާއްޖެ އައިސްފައިވަނީ ހޯމަ ދުވަހުގެ ހެނދުނުއެވެ.

ދުނިޔޭގައި އުފެދުނު އެންމެ މޮޅު ވޮލީ ކުޅުންތެރިޔާކަމަށް ގިނަ ބަޔަކު އިއްތިފާގުވާ ގީބާވަނީ 3 ވޯލްޑް ޗެމްޕިއަންޝިޕާއި، 3 ވޯލްޑް ގްރޭންޑް ޗެމްޕިއަންސް ކަޕްގެ އިތުރުން 2 ވޯލްޑް ކަޕާއި 8 ވޯލްޑް ލީގު ކާމިޔާބުކޮށްފައެވެ. އަދި ސައުތު އެމެރިކަން ޗެމްޕިއަންޝިޕް 9 ފަހަރަށް ކާމިޔާބުކޮށްފައި ވާއިރު، އެއް އޮލިމްޕިކްސް ގޭމާއި 3 އެމެރިކާސް ކަޕްވެސް ބްރެޒިލްގެ ވޮލީ ޓީމް ވަނީ ގީބާގެ ކެޕްޓަންކަމުގެ ދަށުގައި ކާމިޔާބު ކޮށްފައެވެ. އެފް.އައި.ވީ.ބީ އެތުލީޓްސް ކޮމިޝަންގެ ސެކެޓްރީ ގީބާ ވަނި އޭނާގެ ވޮލީ ކެރިއަރގައި 30 އަށްވުރެ ގިނަ އިންޓަރނޭޝަނަލް ރަން މެޑަލް ކާމިޔާބު ކޮށްފައެވެ.

ރީޑްވަނީ ޕެރަލިމްޕިކް ގޭމްސްގެ ޑަބަލްސްގައި ރަން، ރިހި އަދި ލޯ މެޑަލްވެސް ކާމިޔާބުކޮށްފައެވެ. އަދި އޭނާ ވަނީ ގްރޭންޑް ސްލޭމް ސިންގަލްސް ޗެމްޕިއަންކަން ދެފަހަރު ކާމިޔާބުކޮށް، ގްރޭންޑް ސްލޭމް ޑަބަލްސް ޗެމްޕިއަންކަން 18 ފަހަރު ނަގާފައެވެ.

ފަޑީގާ ވަނީ 2002 ވަނަ އަހަރުގެ ވޯލްޑް ކަޕްގައި ސެނެގާލްގެ ޓީމުގެ ފުރަތަމަ 11 ގައި ހިމެނިގެން ހަތަރު މެޗު ކުޅެފައެވެ. އަދި އޭނާ ވަނީ ވޯލްޑްކަޕްގައި އެއް ގޯޯލު ކާމިޔާބުކޮށްފައެވެ.

ކުޅިވަރުގެ މި ލެޖެންޑޫންގެ އިތުރުން، މޯލްޑިވްސް ސްޕޯޓްސް އެވޯޑްސްގައި ބައިވެރިވުމަށް އޮލިމްޕިކްސްގެ ގޯލްޑް މެޑަލިސްޓް ސާރާ ޚޯސްޓްރޯމް އާއި، ދުނިޔޭގައި އުފެދުނު އެންމެ މޮޅު އެއް ފުޓްބޯޅަ ރެފްރީ މާކަސް މަރކް އާއި، ލަންކާގެ ކުރީގެ ނެޓްބޯޅަ ކުޅުންތެރިޔާ ތަރްޖީނީ ސިވަލިންގަމް (ޖެނީ) އަދި ދުނިޔޭގެ އެންމެ މޮޅު ޕޫލް އަދި ބިލިއާޑް ކުޅުންތެރިޔާ އަލްބިން އޮސްޗަން މިހާރު ވަނީ ރާއްޖެ އައިސްފައެވެ.

މޯލްޑިވްސް ސްޕޯޓްސް އެވޯޑްސް ބޭއްވުމަށް ހަމަޖެހިފައި ވަނީ މި ހަފްތާގެ ބުރާސްފަތި ދުވަހުއެވެ. މި ހަފްލާ އޮންނާނީ މާލޭ ސިންތެޓިކް ޓްރެކުގައެވެ.