"މޯލްޑިވްސް ފޫޓްބޯލް އެވޯޑްސް" ޑިސެމްބަރުމަހު
މިއަހަރުގެ އިތުރު އެވޯޑް ތަކެއްވެސް ދޭން ވަނީ ނިންމާފައި
މޯލްޑިވްސް ފޫޓްބޯލް އެވޯޑްސް 2016 ގެ ތެރެއިން
ފޫޓްބޯލް އެސޯސިއޭޝަން އޮފްމޯލްޑިވްސް (އެފްއޭއެމް) އާއި ފުޓުބޯޅަ ހަބަރުތައް ގެނެސްދޭ މޯލްޑިވްސް ފުޓްބޯލް ޑޮޓްކޮމް އާ ގުޅިގެން ބާއްވާ މޯލްޑިވްސް ފުޓްބޯލް އެވޯޑްސް މިއަހަރުގެ ޑިސެމްބަރު މަހުގެ 16 ވަނަ ދުވަހު ބޭއްވުމަށް ނިންމައިފިއެވެ.
ފާއިތުވި އަހަރު މުޅިން އަލަށް ތައާރަފް ކޮށްގެން ދެމުން އަންނަ މި އެވޯޑްސް ގައި މިދިޔަ އަހަރު ހޮވާފައިވަނީ އަހަރުގެ އެންމެ މޮޅު ކުޅުންތެރިޔާ އާއި، އެންމެ މޮޅު ކޯޗާއި، އެންމެ އުންމީދީ ކުޅުންތެރިޔާ އާއި، އެންމެ ގިނަ ލަނޑުޖަހާ ކުޅުންތެރިޔާއެވެ. މި 4 އެވޯޑުގެ އިތުރަށް މިއަހަރު އެންމެ މޮޅު އަންހެން ކުޅުންތެރިޔާ އާއި، އެންމެ މޮޅު އަންހެން ކޯޗާއި، އެންމެ މޮޅު ކީޕަރާއި، އެންމެ މޮޅު ބިދޭސީ ކުޅުންތެރިޔާ އާއި، އެންމެ މޮޅު ގޯލް "ޖޫލޭ އެވޯޑް" އާއި، ފެއާޕްލޭ ޓީމު އިތުރުން އެންމެ ރަނގަޅަށް ސަޕޯޓުކުރާ ޓީމަކަށް ދެވޭ "ފޭން އެވޯޑް" ދެވިގެންދާނެއެވެ.
ފާއިތުވި އަހަރު މި އެވޯޑްސްގައި އެންމެ މޮޅު ކުޅުންތެރިޔާގެ މަގާމު ހޯދާފައިވަނީ މިހާރު ނިއުރޭޑިއަންޓަށް ކުޅެމުން އަންނަ ފޯވާޑް އަލީ ފާސިރު (ސެންޓޭ) އެވެ. އޭނާ މި އެވޯޑް ހާސިލްކުރީ 34 ގޯލާއި އެކުގައެވެ. އެންމެ ގިނަ ލަނޑުޖަހާ ކުޅުންތެރިޔާއަށްދޭ ރަން ބޫޓުވެސް ހާސިލް ކޮށްފައިވަނީ ސެންޓޭއެވެ. އެންމެ މޮޅު ކޯޗުގެ މަގާމު ޓީސީގެ ކޯޗް އަހުމަދު ނިޒާމް (ނިޒާމްބެ) ހޯދިއިރު، އެންމެ އުންމީދީ ކުޅުންތެރިއަކަށް ހޮވިފައިވަނީ ކްލަބް އީގަލްސްގެ އަހުމަދު ރިޒުވާން (ރިޒޭ) އެވެ.
