ގަސްދުގައި ނުނިޔަތެއް ބާއްވައިގެން މަސައްކަތްކުރާ ބަޔަކު ފުލުހުންގެ ތެރޭގައި ނެތް - މިިނިސްޓަރު އިމްރާން
ބަންދު ރިވިއު ފިޔަވައި އެހެން މަރުހަލާއެއް ކުރިއަށް ނުދާ އެތައް މައްސަލައެއް އެބަހުރި
އިމްރާން އަބްދުﷲ - ހޯމް މިނިސްޓަރު
ގަސްދުގައި ނުނިޔަތެއް ބާއްވައިގެން މަސައްކަތް ކުރާބަޔަކު ފުލުހުންގެ ތެރޭގައި ނެތްކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
މިނިސްޓަރު މިހެން ވިދާޅުވީ، ފުލުހުންގެ ތެރޭގައި ނިޒާމު ރަނގަޅަށް އެނގި، ނިޒާމުގެ ތެރޭގައި ހުރި ލޫޕްހޯލްތައް ހޯދައިގެން ގޯސް ހަދައި، މީހުން އެކަން އެގޮތަށް ކުރަނީ ގަސްދުގައި "ނުނިޔަތެއް ބާއްވައިގެން" ކަމަށް ބަންޑާރަ ނައިބު އިޝާރާތް ކުރައްވާފައި ވާތީ، އެކަމާއި ގުޅިގެން ރައްޔިތުންގެ މަޖިލީހުގެ ހެންވޭރު ހުޅަނގު ދާއިރުގެ މެންބަރު ޙަސަން ލަޠީފް، ކުރެއްވި ސުވާލަށް ޖަވާބު ދެއްވަމުންނެވެ.
ލިޔުމުން މިނިސްޓަރު ފޮނުއްވި ޖަވާބުގައި ވިދާޅުވެފައިވަނީ، ފުލުހުންނަށް ހުށައެޅޭ މައްސަލަތައް ބަލައި ތަހުގީގުކޮށް ޕީޖީއަށް ފޮނުވުމަކީ ވަރަށް ގިނަ މަސައްކަތާއި، ވަގުތު އެކަމުގައި ފުލުހުން ހޭދަކުރާ ކަމެއް ކަމުގައެވެ. މަސައްކަތުގެ ޕާރފޯމެންސް ދަށްވެގެން ނުވަތަ ބެނުންވާ މިންވަރަަށް މަސައްކަތް ނުކުރެވިގެން އިދަރީ ގޮތުން އަޅަންޖެހޭ ފިޔަވަޅުތައް އަޅަމުން ގެންދާ ކަމަށެވެ.
މަސްތުވާތަކެއްޗާއި ބަނގުރަލާ ގުޅުން ހުރި 207 އޮޕަރޭޝަނެއް ފާއިތުވި 3 އަހަރުގެ ތެރެގައި ހިންގާފައިވަ ކަމަށާއި، 266ށްވުރެ ގިނަ މައްސަލަ ޝަރީއަތަށް ހުށަހެޅުމަށްޓަކައި ޕީޖީއަށް ފޮނުވާފައިވާކަމަށް ވިދާޅުވެފައިވެއެވެ. މަސްތުވާތަކެތި ބޭނުން ކުރުމުގެ 1،467ށްވުރެ ގިނަ މައްސަލަ ތަހުގީގުކޮށް ޕީޖީއަށް ފޮނުވާފައިވާކަމަށެވެ.
މައްސަލައެއްގައި ނުނިޔަތެއް ބާއްވައިގެން ތަހުގީގުކުރިކަމަށް ބުނެ މިހާތަނަށް އެއްވެސް މުވައްޒިފެއްގެ މައްސަލައެއް ހުށައެޅިފައި ނުވާކަމަށް މިނިސްޓަރު ވިދާޅުވިއެވެ. ނަމަވެސް ދާދިފަހުން ކުރިއަށްގެންދިޔަ މަސްތުވާތަކެތީގެ މައްސަލައެއްގައި ބަލައި ފާސްކުރެވުނު ތަކެތީގެ އިންވެންޓްރީ ހެދުމަށްފަހު މުވައްޒަފު ހަނދާން ނެތިގެން އިންވެންޓްރީ ނުދީ އޮތުމުން އެތަކެތި އެނަލައިޒް ކުރެވިފައި ނުވާތީ، އެތަކެތިން ލިބިދާނެކަމަށް ފުލުހުންގެ އިންޓެލިޖެންސަށް ބެލެވުނު މުހިންމު ހެކިތަކެއް ގެއްލިގެން ގޮސްފައިވާ ކަމަށް ބެލެވުނު މައްސަލައެއް ބަލައި ދިނުމަށް އެދި ޕީޖީ އޮފީހުން 26 ޖެނުއަރީ 2022 ގައި ފުލުހުންނަށް ހުށައަޅާފައިވާކަމަށް މިިސްޓަރު ވިދާޅުވިއެވެ. މި މައްސަލައިގައި ސުވާލުކުރަންޖެހޭ މީހުންނާއި ސުވަލުކުރެވުނު ނަމަވެސް މައްސަލައިގައި އަދި ވަކި ގޮތެއް ނިންމާފައި ނުވާކަމަށް ވިދާޅުވިއެވެ.
ދާދި ފަހުން އަތުލެވުނު 119 ކިލޯގެ މަސްތުވާތަކެތީގެ މައްސަލައިގައި ކޯޓުން ފޯނު އެކްސްޓްރެކްޓް ކުރުމުގެ އަމުރު ނުދިނުމުން ޕީޖީ އޮފީހުން އެދުނު ގޮތަށް އަމަލުކުރުމުންވެސް އަމުރު ލިބިފައި ނުވާކަމަށް މިނިސްޓަރު ފާހަގަ ކުރެއްވިއެވެ. މި މައްސަލަ ޕީޖީ އޮފީހުން ހައިކޯޓުގައި އިސްތިއުނާފް ކުރި ކަމަށާއި، ހައިކޯޓުން ނިންމީ ދަށު ކޯޓުގެ ނިންމުން ރަނގަޅު ނޫން ކަމުގައި ވަނީ ފަހަގަކޮށްފައެވެ.
މިނިސްޓަރު ވިދާޅުވީ، މަސްތުވާތަކެތީގެ ތަހުގީގު ކޮށްފައިވާ މައްސަލަތަކުގައި ފެންނަނީ، ކަމާއި ގުޅުންހުރި މުއައްސަސާތަކުން ދޭންޖެހޭ ސަމާލުކަން ދީގެން މި މަސައްކަތްތައް ނުކުރެވޭ ކަން ކަމުގައެވެ. މަސްތުވާތަކެތީގެ ވިޔަފާރިކުރާ މީހުންނަށް ފަހިވާ ގޮތަށް ހުރި ކަންކަން އަދިވެސް ބަދަލުވެފައި ނެތް ކަމަށް މިނިސްޓަރު ވިދާޅުވިއެވެ.
މަސްތުވާތަކެތީގެ އެތައް މައްސަލައެއް ކޯޓަށް ފޮނުވިފައިވީ ނަަމަވެސް ބަންދު ރިވިއު ފިޔަވައި އެހެން މަރުހަލާއެއް ކުރިއަށް ނުދާ އެތައް މައްސަލައެއް އެބަހުރި ކަމަށާއި، މީގެ ނަތީޖާއެއްގެ ގޮތުން މަސްތުވާތަކެތީގެ މައްސަލައިގައި ހައްޔަރު ކޮށްފައިވާ މީހުން ސިއްޙީ މައްސަލަތަކާއި ތަފާތު އުޒުރުތައް ދައްކައި ބަންދުން ދޫވެންދާތަން ފެންނަ ކަމަށެވެ. މިއީ ކަންބޮޑުވާކަމެއްކަމުގައި ވިދާޅުވިއެވެ.
ފާއިތުވި ތިން އަހަރު ކޯޓުން ނިންމާފައިވާ މައްސަލަތަކުގެ އިންޓަރނަލް އޮޑިޓެއް ހަދަމުންދާ ކަމަށާއި، އެއަށްފަހު މިނިވަން އޮޑިޓެއް ހަދައި ހުރިހާ މަރުހަލާއެއްގައި ކަން ހިނގާފައިވާ ގޮތް ބެލިގެންދާނެ ކަމަށް ވިދާޅުވިއެވެ. މިނިސްޓަރު ވިދާޅުވީ، އެއަށްފަހު ހުރި މައްސަލަތައް ހައްލު ކުރުމުގެ މަސައްކަތް ފެށިގެންދާނެކަމަށެވެ.
