ސިޔާސީ މަސްރަހު ހަލަބޮލި ކުރުމަށް ބަޔަކު ދަނީ މަސައްކަތްކުރަމުން: ސަލާމަތީ ބާރުތައް

ރައްޔިތުންގެ މަޖިލީހުގެ ރައީސް އަބްދުﷲ މަސީހްގެ އިތުބާރު ނެތްކަމުގެ ވޯޓް ބޯމަތިވެފައިވާއިރު، ރާއްޖޭގެ ސިޔާސީ މަސްރަހު ހަލަބޮލި ކުރުމަށް ބަޔަކު ދަނީ މަސައްކަތްކުރަމުންދާ ކަމުގެ މައުލޫމާތު ލިބިފައިވާ ކަމަށް ސަލާމަތީ ބާރުތަކުން ބުނެފި އެވެ.

އިސްކަންދަރުކޮށީގައި އާދިއްތަ ދުވަހުގެ ރޭ ކުއްލިގޮތަކަށް ބޭއްވި ނޫސްވެރިންގެ ބައްދަލުވުމުގައި ފުލުހުންގެ ޗީފް ސުޕްރިންޓެންޑެންޓް ހަމްދޫން ރަޝީދު ވިދާޅުވީ ރާއްޖޭގެ ހަމަޖެހުމާއި ސުލްހަމަސަލަސްކަން ނަގާލައި ރާއްޖޭގެ ސިޔާސީ މަސްރަހު ހަލަބޮލި ކުރުމުގެ ގޮތުން ހަމަނުޖެހުންތައް ހިންގުމަށް ބައެއް ފަރާތްތަކުން ރޭވުންތައް ރާވަމުންދާ ކަމުގެ މައުލޫމާތު ފުލުހުންނަށް ލިބިފައިވާ ކަމަށެވެ.

ހަމްދޫން ވިދާޅުވީ ގައުމުގައި ގާއިމްކުރެވިފައިވާ ސުލްހަވެރިކަމާއި އަމާންކަން ގާއިމްވެފައި އޮތީ ގިނަ ބައެއްގެ މަސައްކަތުން ކަމަށާއި އެކަމުގެ ފައިދާތައް ހުރިހާ ރައްޔިތުންނަށް ލިބެމުންދާ ކަމަށެވެ.

މިފަދަ ވަގުތެއްގައި ރަށުތެރޭގައި ހަލަބޮލިކަން އުފައްދައި ރައްޔިތުންނާއި ދައުލަތުގެ މުދަލަށް ގެއްލުންދިނުމުގެ އެއްވެސް ހަރަކާތެއް ހިންގަން އެއްވެސް ފަރާތަކަށް ނުދޭނެ ކަމަށް އޭނާ ވިދާޅުވި އެވެ. އަދި ގައުމުގެ އަމާންކަމާއި މަސްލަހަތު ހިމާޔަތްކުރުމަށް ފުލުހުންނަށް ލިބިދީފައިވާ ގާނޫނީ ބާރު އޭގެ އެންމެ މަތީ ދަރަޖައިގައި ބޭނުންކުރާނެ ކަމަށް ވެސް އޭނާ ވިދާޅުވި އެވެ.

އެމްއެންޑީއެފްގެ މީޑިއާ އޮފިސަރު، ކެޕްޓަން އިބްރާހިމް އާޒިމް ވިދާޅުވީ އެމްއެންޑީއެފް އޮތީ ފުލުހުން ބޭނުންވާ ކޮންމެ އެހީތެރިކަމެއް ފޯރުކޮށްދިނުމަށް ތައްޔާރަށް ކަމަށާއި ހުރިހާ ރައްޔިތުންގެ ވެސް ސުލްހަވެރިކަމާއި އެކުވެރިކަމާއެކު ތިބުމަށް އިލްތިމާސް ކުރާ ކަމަށެވެ.