ހިޔާ ފްލެޓް ސަރަހައްދުގައި ތަރައްގީ ކުރަމުންދާ ''ހިޔާ ޕާކު'' ގެ ފުރަތަމަ ފިޔަވަހީގެ މަސައްކަތްތައް ނިންމާ ރޯދައަށް ހުޅުވާލާނެ ކަމަށް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ން ބުނެފިއެވެ.
އެޗްޑީސީން ބުނީ ހިޔާ ޕާކު ތަރައްގީ ކުރަމުންދަނީ ދެ ފިޔަވައްސަކަށް ބަހާލައިގެން ކަމަށެވެ. އެގޮތުން މިހާރު ފުރަތަމަ ފިޔަވަހީގެ 85 އިންސައްތަ މަސައްކަތް ނިމިފައިވާ ކަމަށް އެޗްޑީސީން ބުނެއެވެ.
އެޗްޑީސީން ބުނީ ހުޅުމާލޭގެ ދެވަނަ ފިޔަވަހީގައި ދިރިއުޅޭ އާއްމު ރައްޔިތުންނަށް ހިތް ފަސޭހަ މާހައުލެއް ގާއިމްކޮށް ދިނުމަށް ގިނަ މަސައްކަތްތައް ކުރަމުންދާ ކަމަށެވެ. އަދި ރޯދަ މަހަކީ ހުރިހާ ގޮތަކުން ޚާއްސަ މަހަކަށްވާއިރު، ބޭރަށް ނުކުމެ އުޅޭ އާއްމުންނަށް ތިބެވޭނެ ގޮތަށް ޕާކު ތަރައްގީކޮށް ނިންމުމަށް އަމާޒު ހިފާއިވާ ކަމަށާއި، ރޯދައަށް ޕާކު ހުޅުވާލާނެ ކަމަށް އެޗްޑީސީން ބުނެއެވެ.
މިއީ ހުޅުމާލޭގެ ދެވަނަ ފިޔަވަހީގައި އަޅަމުންދާ ފުރަތަމަ ޕާކެވެ.
މީގެ އިތުރުން ހިޔާގެ ބީޗް ސަރަހައްދުގައި ބެންޗު ޖަހާ އާއްމުންނަށް ފަސޭހައިން ބޭނުންކުރެވޭ ގޮތަށް އެޗްޑީސީން ދަނީ ތަރައްގީ ކުރަމުންނެވެ. އަދި އެޗްޑީސީން އިސްވެ ގަސް އިންދުމުގެ ޕްރޮގްރާމެއް ފަށައި ކުރިއަށް ގެންދާއިރު، ކުރިއަށް އޮތްތަނުގައި އެކި މައިޒާންތައް ގާއިމްކުރާނެ ކަމަށް އެކޯޕްރޭޝަނުން ބުނެއެވެ.
ފޭސް-2ގެ ހިޔާ ފްލެޓްތަކަށް ގިނަ ބަޔަކު ދަނީ ދިރިއުޅުން ބަދަލުކުރަމުންނެވެ. އެސަރަހައްދުގައި ގިނަ އަދަދެއްގެ ބަޔަކު އާބާދުވާނެ ކަމަށް ބެލެވެއެވެ. އެގޮތުން މިހާރު ވެސް 3000 އާއިލާ ފްލެޓްތަކަށް ބަދަލުވެފައިވާ ކަމަށް އަންދާޒާ ކުރެވޭ ކަމަށް އެޗްޑީސީން ބުނެއެވެ. އާބާދުވަމުންދާ ސަރަހައްދަކަށްވާތީ އަދިވެސް ބައެއް ޚިދުމަތްތައް ލިބުން ދައްޗެވެ. ނަމަވެސް މިހާރު އެސަރަހައްދުގައި ފިހަރާތަކާއި، ސެލޫންތަކާއި، ކްލިނިކްތައް ދަނީ ގާއިމްކުރަމުންނެވެ.
