ސްޕޯޓްސް އެވޯޑްސް 2022: ސާރާ، މާކަސް އަދި އަލްބިން ރާއްޖެއަށް
14 މާރިޗު 2022 | ހޯމަ 10:13ދުނިޔޭގެ އެހާރާއި މިހާރުގެ މަޝްހޫރު 15 ކުޅުންތެރިން ނޫނީ ކުޅިވަރުގެ ޝަހުސިއްޔަތުން ރާއްޖެ އައުމަށް ހަމަޖެހިފައިވާ
މޯލްޑިވްސް ސްޕޯޓްސް އެވޯޑްސްގައި ބައިވެރިވުމަށް ސާރާ، މާކަސް އަދި އަލްބިން ރާއްޖެ އައުން
މިހަފްތާގެ ބުރާސްފަތި ދުވަހު ރާއްޖޭގައި ބޭއްވުމަށް ހަމަޖެހިފައިވާ މޯލްޑިވްސް ސްޕޯޓްސް އެވޯޑްސްގައި 2022 ގައި ބައިވެރިވުމަށް އޮލިމްޕިކްސްގެ ގޯލްޑް މެޑަލިސްޓް ސާރާ ޝިޔޯސްޓްރޯމް، ދުނިޔޭގައި އުފެދުނު އެންމެ މޮޅު އެއް ފުޓްބޯޅަ ރެފްރީ ޖަރުމަނުގެ މާކަސް މަރކް އަދި ދުނިޔޭގެ އެންމެ މޮޅު ޕޫލް އަދި ބިލިއާޑް ކުޅުންތެރިޔާ އަލްބިން އޮސްޗަން ރާއްޖެއަށް އަތުވެއްޖެއެވެ.
ދުނިޔޭގެ ކުޅިވަރގެ ދާއިރާގައި ފާހަގަކުރެވޭ މި އެތުލީޓުން ރާއްޖެއައީ ހޯމަ ދުވަހުގެ މެންދުރުއެވެ. އެވޯޑުގައި ބައިވެރިވާން ރާއްޖެ އަންނަ ޚާއްސަ މެހެމާނުން މަޑުކުރާނީ ކްރޮސް ރޯޑް ރިސޯޓުގައެވެ.
ސްވިޑްންގެ ފެތުންތެރިޔާ ސާރާއަކީ ދުނިޔޭގެ ފެންވަރުގައި ބާއްވާ ފެތުމުގެ ބޮޑެތި މުބާރާތްތަކުގައި ރަންވަނަ ހާސިލްކޮށްފައިވާ ކާމިޔާބު އެތުލީޓެކެވެ. އެގޮތުން ސާރާ ވަނީ ވޯލްޑް ޗެމްޕިއަންޝިޕްގައި 14 ރަން މެޑަލް ކާމިޔާބު ކުރުމުގެ އިތުރުން ޔޫރަޕިއަން ޗެމްޕިއަންޝިޕްގައި 26 ރަން މެޑަލް ހާސިލްކޮށްފައެވެ. މިވަގުތު 50 މީޓަރު އަދި 100 މީޓަރުގެ ފްރީސްޓައިލް އާއި ބަޓަފްލައި ކެޓަގަރީގެ ދުނިޔޭގެ ރެކޯޑުވެސް އޮތީ ސާރާ އަތުގައެވެ.
މާކަސްއަކީ ފީފާއިން ހޮވާ އެންމެ މޮޅު ރެފްރީގެ މަޤާމް ތިންފަހަރު ހޯދާފައިވާ ރެފްރީއެކެވެ. އަދި ބުންޑަސްލީގުގެ އެންމެ ގިނަ މެޗަށް އިންސާފްކުރި ރެފްރީއަކީވެސް މާކަސްއެވެ. އޭނާ ވަނީ ޖަރުމަނުގެ އެންމެ މޮޅު ރެފްރީގެ އެވޯޑް ހަ ފަހަރު ހޯދާފައެވެ.
މިހާރު ދުނިޔޭގެ އެންމެ މޮޅު ޕޫލް ބިލިއާޑް ކުޅުންތެރިޔާ އަލްބިން ވަނީ ދުނިޔޭގެ ޗެމްޕިއަންކަން ދެފަހަރު ނަގާފައެވެ. އެއީ 2016 އަދި 2021 ވަނަ އަހަރުއެވެ. ވޯލްޑްކަޕް އޮފް ޕޫލް ޗެމްޕިއަންކަންވެސް ދެފަހަރު ނަގާފައިވާ އަލްބިން ވަނީ ޗައިނާ އޯޕަން ޗެމްޕިއަންކަންވެސް ކާމިޔާބުކޮށްފައެވެ. 2021 ވަނަ އަހަރުގެ އެންމެ މޮޅު ކުޅުންތެރިއަކަށް ހޮވިފައިވަނީވެސް އޭނާއެވެ.
