ދިވެހި ދައުލަތުގެ ނަމުގައި ސަރުކާރުން ވެފައިވާ އަސްކަރީ ގުޅުން ގާއިމްކުރުމުގެ އެއްބަސްވުމާއި ގުޅޭ ގޮތުން ހަގީގަތާއި ޚިލާފު ވަހަކަދައްކާ ފެތުރުމަކީ، ރާއްޖޭގެ ގައުމީ ސަލާމަތަށް ނުރައްކާ ވެދާނެ ކަމެއް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ އަސްކަރީ ގުޅުން ގާއިމްކުރުމުގެ އެއްބަސްވުމާއި ގުޅޭ ގޮތުން ކުރީގެ ރައީސް އަބްދުﷲ ޔާމީން ދައްކަވަމުން ގެންދަވާ ވާހަކަފުޅުތަކަށް އިޝާރާތްކުރައްވާއެވެ.

ރައީސް ނަޝީދު ވިދާޅުވީ، ހަގީގަތާއި ޚިލާފު ވާހަކަ ދެއްކުމަކީ ރާއްޖެއާއި ދޭދޭ ގައުމުތަކާއި އޮންނަ ގުޅުން ހީނަރުވެދާނެ ކަމެއް ކަމަށެވެ. އެއްބަސްވުމުގެ ދަށުން އިންޑިއާ ސިފައިންނަށް ހަތިޔާރު އެތެރެކުރަން ހުއްދަ ދީފައިވަކަމަށް ރައީސް ޔާމީން ދައްކަވަމުން ގެންދަވަނީ ކަނޑައެޅިގެން ހަގީގަތާއި ޚިލާފު ވާހަކަތަކެއް ކަމަށް ރައީސް ނަޝީދު ވިދާޅުވިއެވެ.

އުތުރު ތިލަފަޅު ތަރައްގީ ކުރުމާއި ބެހޭ މައްސަލަ 22 ސެޕްޓެމްބަރ 2021 ގައި ސިޓީއަކުން ރައްޔިތުންގެ މަޖިލީހަސް ހުށަހެޅުއްވީ މަޑުއްވަރީ ދާއިރަގެ މެމްބަރު އާދަމް ޝަރީފުއެވެ.

އޭރު އެދިވަޑައިގެންފައިވަނީ އެއްބަސްވުންތަކުގައި ގައުމީ ސަލަމަތާއި ގައުމުގެ ސިޔާދަތަށް ނުރައްކަވާ ކަމެއް ނެތްކަން ކަށަވަރު ކުރުމަށް އެއްބަސްވުންތަކުގެ އަސްލު ހޯދައި އެކަން ބަލައި ދިނުމަށެވެ. އަދި 241 ކޮމިޓީން ދިރާސަކޮށް ނިންމަފައިވަނީ، އެފަދަ ކަމެއް އެއްބަސްވުންތަކުގައި ނެތް ކަމަށެވެ.

އެއްބަސްވުންތައް ކޮމިޓީން ދިރާސާކުރިއިރު، ސޮއިކޮށްފައިވާ އަސްލު އެއްބަސްވުންތަކުގެ ކޮޕީއެއް ސްކްރީން މެދުވެރިކޮށް ހިއްސާ ކުރެވުނެވެ. އަދި އެއީ ސޮއިކޮށްފައިވާ އެއްބަސްވުންތައް ކޮމިޓީގެ މުގައްރިރު ކަށަވަރު ކޮށްދެއްވާފައިވެއެވެ.

އެއްބަސްވުންތަކުގެ ހާޑް ކޮޕީ ހިއްސާކޮށްފައި ނުވަނީ ދޭދޭ ގައުމުތަކުގައި ވެފައިވާ އެއްބަސްވުންތަކަށް ކަމަށްވުމާއެކު، އޭގެ އެއްވެސް ބައެއް ސޯޝަލް މީޑިއާގައި އާންމު ވެއްޖެނަމަ، ދެ ގައުމުގެ މަސްލަހަތަށް ބުރޫ އަރަފާނެ ކަމަށް ކޮމިޓީއަށް ފެންނާތީ ކަމުގައި ރައީސް ނަޝީދު ވިދާޅުވިއެވެ. 

އެހެންނަމަވެސް ކުރީގެ ރައީސް ޔާމީން، އެއްބަސްވުންތަކުގެ މަގްސަދާއި، އޭގައި ބަޔާން ކޮށްފައިވާ ކަންކަމާއި ގުޅޭ ގޮތުން އާންމުންގެ ތެރޭގައި، ހަގީގަތާއި ޚިލާފު ވާހަކަދައްކަވަމުން ދާކަން އެމަނިކުފާނަށް ކަށަވަރުވެފައިވާ ކަމަށް ރައީސް ނަޝީދު ވިދާޅުވިއެވެ. ރައީސް ނަޝީދު ވިދާޅުވީ، އުތުރު ތިލަފަޅު އެއްބަސްވުން ދެމި އޮތްހާހިނދަކު އެތަނުގެ މިލްކުވެރި ފަރާތަކީ އިންޑިއާ ކަމާއި، އެތަނުގައި ކަނޑުގެ އަސްކަރީ މަރުކަޒަކާއި، ވައިގެ އަސްކަރީ މަރުކަޒެއް ތަރައްގީ ކުރުމަށް ނިންމާފައިވާ ކަމަށް ރައީސް ޔަމީން ވިދާޅުވަމުން ގެންދަވާ ކަމަށެވެ. އަދި އިންޑިއާގެ މަނަވަރުތައް ބަނދަރުކުރުމަށް އެއްވެސް ހުއްދައެއް ހޯދަން ނުޖެހޭ ކަމަށާއި، އެތަން ތަރައްގީ ކުރުމަށް މަސައްކަތްކުރާ އިންޑިއާ ސިފައިން ބޭނުންވާ ކޮންމެ ހަތިޔާރެއް އެތެރެ ކުރުމުގެ ހުއްދަ ދީފައިވާ ކަމަށްވެސް ރައީސް ޔާމީން ވިދާޅުވަމުން ގެންދަވާ ކަމަށެވެ.

އެހެންނަމަވެސް 241 ކޮމިޓީން ކޮށްފައިވާ ދިރަސާއިން އެނގުނު ގޮތުގައި ޔޫޓީއެފް އެއްބަސްވުމުގެ ދަށުން ގާއިމް ކުރާ ތަންތަނަކީ ދިވެހި ދައުލަތުގެ މިލްކެއް ކަމުގައި އެގްރިމެންޓުގައި ބަޔާންކޮށްފައިވާކަމަށް ރައީސް ނަޝީދު ވިދާޅުވިއެވެ. ޑިފެންސް އެކްޝަން ޕްލޭންގެ ދަށުން ގާއިމްކުރާ ތަންތަން ބޭނުން ކުރެވެނީ ތަމްރީނުތަކާއި، އީއީޒެޑް ހިމާޔަތް ކުރުމަށާއި، ރާއްޖޭގެ ސަރަހައްދަށް ވަދެވެނީ ރާއްޖޭގެ ހުއްދަ ހޯދައިގެން ކަމަށެވެ. އަދި ރާއްޖޭގެ ހުއްދައަކާއި ނުލައި އިންޑިއާގެ މަނަވަރަކަށް ރާއްޖޭގެ ކަނޑުގެ ސަރަހައްދަށް ވަދެވޭނެ ކަމަށް ބަޔާންކޮށްފައި ނުވާ ކަމަށްވެސް ރައީސް ނަޝީދު ވިދާޅުވިއެވެ.