ރޮނާލްޑޯގެ ހެޓްރިކުން ޔުނައިޓެޑް ހަތަރުވަނައަށް

އިނގިރޭސި ޕްރިމިއަރ ލީގުގައި މެންޗެސްޓަރ ޔުނައިޓެޑާއި ޓޮޓެންހަމް ހޮޓްސްޕަރސް ބައްދަލުކުރި މެޗުގައި ކްރިސްޓިއާނޯ ރޮނާލްޑޯ ހެދި ހެޓްރިކާއެކު ޔުނައިޓެޑުން މެޗު ކާމިޔާބުކޮށްފިއެވެ.

ޔުނައިޓެޑްގެ އޯލްޑް ޓްރެފޯޑް ސްޓޭޑިއަމްގައި ކުޅުނު މި މެޗު އެޓީމުން ކާމިޔާބުކުރީ 3-2 ގެ ނަތީޖާއަކުންނެވެ. ފޯރިގަދަ މި މެޗުގެ 12 ވަނަ މިނެޓުގައި ޔުނައިޓެޑުން ލީޑު ނެގީ އޭރިއާގެ ބޭރުން ރޮނާލްޑޯ ފޮނުވާލި ބާރު ހަމަލާ ގޯލުގެ މަތީކަނަށް ފޮނުވާލައިގެންނެވެ. ނަމަވެސް ފުލުފުލުގައި އެޓޭކުތައް އުފައްދާ ޓޮޓެންހަމުން ވަނީ ނަތީޖާ އެއްވަރުކޮށްފައެވެ. މެޗުގެ 35 ވަނަ މިނެޓުގައި ކޭން ގޯލުޖެހީ ޕެނަލްޓީ އޭރިއާ ތެރެއިން ޔުނައިޓެޑްގެ ވާތުބެކް އަލެކްސް ޓެލޭސްގެ އަތުގައި ބޯޅަޖެހުމުން ލިބުނު ޕެނަލްޓީއަކުންނެވެ. ފުރަތަމަ ހާފު ނިމުމުގެ ކުރިން ޔުނައިޓެޑަށް އަނެއްކާވެސް ލީޑު ނަގައިދިނީ ޖޭޑަން ސަންޗޯ ދިން ޕާހަކުން އެޓީމުގެ ތަރި ރޮނާލްޑޯއެވެ.

ވާދަވެރި ކުޅުމެއް ފެނުނު ދެވަނަ ހާފުގައި ޔުނައިޓެޑުގެ ލީޑު ގެއްލުނީ ޓީމުގެ ކެޕްޓަން ހެރީ މެގުއާ އަތުން ބައިކޮޅަށް ވަން ގޯލަކުންނެވެ. މެޗުން މޮޅުވި ލަނޑު ރޮނާލްޑޯ ކާމިޔާބުކުރީ މަތިމަތިން އައި ކޯނަރެއް ބޮލުންޖަހާ ގޯލުގެ ތެރެއަށް ފޮނުވާލައިގެންނެވެ. ކްލަބް ކެރިއަރުގައި ރޮނާލްޑޯ ހެދި 59 ވަނަ ހެޓްރިކާއެކު އޭނާ ވަނީ ފުޓްބޯޅަ ކެރިއަރުގައި 807 ގޯލުޖަހާފައެވެ.

މި ނަތީޖާއާއެކު ޔުނައިޓެޑުން ތާވަލުގެ ހަތަރުވަނައަށް އެރީ 29 މެޗު ކުޅެގެން ލިބުނު 50 ޕޮއިންޓުންނެވެ. މީގެ ކުރިން ހަތަރު ވަނައިގައި އޮތް އާސެނަލް މިހާރު ފަސްވަނައިގައި އޮތީ 25 މެޗު ކުޅެގެން ލިބުނު 48 ޕޮއިންޓާއެކުއެވެ. މިރޭ ލެސްޓަރ ސިޓީއާއި ވާދަކޮށް މޮޅުވެގެން ތާވަލުގެ ހަތަރު ވަނައަށް އެރުމުގެ ފުރުސަތު އާސެނަލްއަށް އެބައޮތެވެ.