ވޮލީކޯޗު މުޙައްމަދު ނަދީމް (ނަދީމްބެ) ފ.މަގޫދޫ ވޮލީޓީމާއި ހަވާލުވެ, އެރަށުގައި މަސައްކަތް ފަށައިފިއެވެ. ފ.އަތޮޅުގައި ފެށި ރާއްޖެ އެޓޯލް ވޮލީބޯލް ޗެމްޕިއަންޝިޕްގައި މަގޫދޫގެ ދެޓީމަށްވެސް އިރުޝާދުދެނީ ކުރިން ޤައުމީ ވޮލީބޯޅަ ޓީމާއި, ފުޓްބޯޅަ ޓީމަށްވެސް ކުޅުނު ނަދީމްއެވެ.
ދެ ކުޅިވަރުގެވެސް ކޯޗު, ނަދީމްގެ އިރުޝާދުގެ ދަށުން މަގޫދޫ އަންހެން ޓީމް ވަނީ މުބާރާތް ހުޅުވަން ކުޅުނު ފުރަތަމަ މެޗު ކާމިޔާބުކޮށްފައެވެ. މަގޫދޫ އަންހެން ވޮލީބޯޅަ ޓީމް ފުރަތަމަ މެޗު ކާމިޔާބުކުރީ ދަރަނބޫދޫ ޕާޕަލް ޕަވަރ ޕާޕަލްސް އާއި ވާދަކޮށް ސީދާ ތިން ސެޓުންނެވެ. ކޯޗު ނަދީމް ބުނީ ފ.އަތޮޅުގައި ޚާއްޞަކޮށް މަގޫދޫގައި ހުނަރުވެރި މޮޅު ކުޅުންތެރިން އެބަތިބިކަމަށެވެ. އެކުޅުންތެރިންނަށް ތަމްރީނު ދީގެން ވަރަށް ބޮޑަށް ކުރިއެރުވޭނެކަމަށް އޭނާ ބުނިއެވެ.
ނަދީމް ބުނީ އެކުޅުންތެރިން ޚާއްޞަކޮށް ޑިފެންނަށް ވަރަށް މޮޅުކަމަށާއި, އެޓޭކްގައި ރަނގަޅުކުރަން އަދި ޖަމްޕްއާއެކު އެޓޭކްކުރުމާއި, ބްލޮކަށްވެސް ތަމްރީނުތަކާއެކު ކުރިއެރުން ހޯދާ ޤައުމީ ޓީމަށް ކުޅެވޭނެ ކުޅުންތެރިން އެބަތިބިކަމަށެވެ. ނަދީމް މިވަގުތު ހުރީ މަގޫދޫގައެވެ. އެރަށުގެ އަންހެން އަދި ފިރިހެން ޓީމަށްވެސް އިރުޝާދު ދެނީ ކޯޗު މުޙައްމަދު ނަދީމްއެވެ.
