އެމް.އެން.ޔޫ.އެސް.ޔޫ އިންޓަރ-ފެކަލްޓީ ވޮލީ މުބާރާތް ފަށައިފި

ދިވެހިރާއްޖޭގެ ޤައުމީ ޔުނިވަރސިޓިގެ ފެކަލްޓީތަކުގެ މެދުގައި ބާއްވާ އެމް.އެން.ޔޫ.އެސް.ޔޫ އިންޓަރ-ފެކަލްޓީ ވޮލީބޯޅަ މުބާރާތް ފަށައިފިއެވެ.

އެމް.އެން.ޔޫ. ދަރިވަރުންގެ ޔޫނިއަން އިން އިންތިޒާމުކޮށްގެން ބާއްވާ މި މުބާރާތް ފަށާފައިވަނީ ހުކުރު ދުވަހުގެ ރޭގައެވެ. މުބާރާތް ފެށުމުގެ ރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް ސްޓޭޓް ފޯރ ހޯމް އެފެއަރޒް މުޙައްމަދު މާހިރު ޢިސާއެވެ.

އަންހެން އަދި ފިރިހެން ޑިވިޝަނަށް ބަހާލައިގެން ކުރިއަށް ގެންދާ މި މުބާރާތުގައި ކޮންމެ ޑިވިޝަނަކުން 8 ޓީމު ބައިވެރިވެފައިވެއެވެ. މުބާރާތުގެ މެޗުތައް ކުޅޭނީ ތިން ސެޓަށެވެ. ސެމީ އަދި ފައިނަލް މެޗު ކުޅޭނީ ފަސް ސެޓަށެވެ.

ހުކުރު ދުވަހުގެރޭ ކުޅުނީ ކޮންމެ ޑިވިޝަނެއްގެ އެއް މެޗެވެ. މުބާރާތުގެ ފުރަތަމަ މެޗުގައި ވާދަކުރީ ފެކަލްޓީ އޮފް ޝަރީއާއިން ލޯ (އެފް.އެސް.އެލް) އާއި ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް (އެފް.އެޗް.ޓީ.އެސް) ގެ ފިރިހެން ޓީމެވެ. މި މެޗު ސީދާ ދެސެޓުން ކާމިޔާބު ކުރީ އެފް.އެޗް.ޓީ.އެސް.ގެ ޓީމުންނެވެ. ފުރަތަމަ ސެޓު 25-09 އިން އެފް.އެޗް.ޓީ.އެސް ކާމިޔާބުކުރިއިރު، ދެވަނަ ސެޓު ކާމިޔާބުކުރީ 25-14 ގެ ނަތީޖާއަކުންނެވެ. މި މެޗުގެ މޮޅު ކުޅުންތެރިއަކަށް ހޮވުނީ އެފް.އެޗް.ޓީ.އެސް.ގެ ޖާޒީ ނަންބަރު 12، އަލީ އާރިފްއެވެ.

އަންހެން ޑިވިޝަންގެ ފުރަތަމަ މެޗުގައި ބައްދަލުކުރީ ފެކަލްޓީ އޮފް އެޑިއުކޭޝަން (އެފް.އީ) އާއި ސްކޫލް އޮފް މެޑިސިން (މެޑިކޯސް) ގެ ޓީމެވެ. އެފް.އީ އިން މި މެޗު ކާމިޔާބުކުރީ 25-15 އަދި 25-19 ގެ ނަތީޖާއަކުންނެވެ. މި މެޗުގައި މޮޅު ކުޅުންތެރިޔާގެ މަގާމު ހޯދާފައިވަނީ އެފް.އީ ޓީމުގެ ޖާޒީ ނަންބަރު 2، މަރިޔަމް ނަޖާއެވެ.

މިއީ އެމް.އެން.ޔޫ.އެސް.ޔޫ.އިން ބާއްވާ ދެވަނައަށް އެންމެ ބޮޑު މުބާރާތެވެ. މި މުބާރާތް ކުރިއަށް ގެންދާތާ މިއީ 8 ވަނަ އަހަރެވެ.