ރާއްޖޭގައި މިހާތަނަށް ބާއްވާ އެންމެ ބޮޑު ކުޅިވަރު އެވޯޑް "މޯލްޑިވްސް ސްޕޯރޓްސް އެވޯޑްސް" އަށް ސިންތެޓިކް ޓްރެކް ބަންދުކުރާނީ 4 ދުވަހަށް ކަމަށް ޔޫތު މިނިސްޓަރު އަހުމަދު މަޚުލޫފު ވިދާޅުވެއްޖެއެވެ.

ޓްރެކް ބަންދުކުރަނީ މިމަހުގެ 17 ވަނަ ދުވަހުގެ ރޭ އެވޯޑް ހަފްލާ ސިންތެޓިކް ޓްރެކްގައި ބޭއްވުމަށެވެ. މިނިސްޓަރު މަޚުލޫފް ވިދާޅުވީ އެތަނުގައި އެވޯޑް ބާއްވަނީ އެރަސްމިއްޔާތަށް އެކަށީގެންވާ އެހެންތަނެއް މާލޭގައި ނެތުމުންކަމަށެވެ. ކާނިވާ ސަރަހައްދާއި, ގަލޮޅު ރަސްމީ ސްޓޭޑިއަމްވެސް އެރަސްމިއްޔާތަށް ކުޑަކަމަށް މިނިސްޓަރު ވިދާޅުވިއެވެ. ސިންތެޓިކް ޓްރެކް ބަންދުކުރުމުން އެތަން ބޭނުންކުރާ ފަރާތްކަށް އުނދަގޫވާނެކަން ފާހަގަކުރައްވާ މިނިސްޓަރު ވަނީ މަޢާފަށްްވެސް އެދިވަޑައިގަންނަވާފައެވެ. އެއާއެކު ވިދާޅުވީ ރީތި ސިންތެޓިކް ޓްރެކް ބަންދުކުރާނީ އެތަން ބަންދުކުރެވެން އޮތް އެންމެ ކުޑަ މުއްދަތަށްކަމަށެވެ. ކުރިން ކަނޑައަޅާފައި އޮތީ މިމަހުގެ 11-18 އަށް, 8 ދުވަހަށް ޓްރެކް ބަންދުކުރާށެވެ. އެކަމަކު މިނިސްޓަރު މިއަދު ވިދާޅުވީ އެތަން ބަންދުކުރާނީ 15-18 އަށް, 5 ދުވަހަށް ކަމަށެވެ. އެހަފްލާގައި 550 އަށްވުރެ ގިނަ ބޭފުޅުން ބައިވެރިވާނެކަމަށް މިނިސްޓަރު މަޚުލޫފް ވިދާޅުވިއެވެ.

މޯލްޑިވްސް ސްޕޯރޓްސް އެވޯޑްސް ހަފްލާގައި ބައިވެރިވުމަށް ތަފާތު ކުޅުވަރުތަކުގެ ދުނިޔޭގެ ޗެމްޕިއަނުން, ލެޖެންޑުން ބައިވެރިވާނެކަން މިނިސްޓަރު މަޚުލޫފް ވަނީ އިއުލާންކުރައްވާފައެވެ. އޭގެތެރޭގައި ފުޓްބޯޅަ, ވޮލީބޯޅަ, ކްރިކެޓް, ޓޭބަކް ޓެނިސް, ބިލިއާޑް އަދި ޕެރަލިމްޕިކް ޗެމްޕިއަނުން ހިމެނެއެވެ. އަދި އޭގެތެރެއިން ބައެއް ޗެމްޕިއަނުން އަމިއްލަ ސޯޝަލް މީޑިޔާ އެކައުންޓްތައް މެދުވެރިކޮށް އެކަން ވަނީ ޔަޤީންވެސް ކޮށްދީފައެވެ. ޞަރަހައްދީ ބައެއް ޤައުމުތަކުގެ ކުޅިވަރާބެހޭ ވަޒީރުންވެސް އެހަފްލާގައި ބައިވެރިވެވަޑައިގަންނަވާނެއެވެ.