ކްލަބްގެ ހާލަތު ގޯސްވެ, އަރައިގަންނަން އުނދަގޫ ހާލަތަކަށް ހިނގައިދާނެކަމުގެ ބިރު ހީވެފައިވާ ޗެލްސީން ޕްރިމިއަރ ލީގުގައި ނޮރިޗް ސިޓީ ބަލިކޮށް, ހިތްހަމަޖެހުމެއް ހޯދައިފިއެވެ.

ލީގު ތާވަލްގެ ތިންވަނާގައި ޗެލްސީން ލީދް ފުޅާކުރީ 3-1 ން ނޮރިޗް ސިޓީ ބަލިކޮށްގެންނެވެ. މެޗަށް ނިކުއިންއިރު ޗެލްސީ ވިއްކާލަން އެކްލަބްގެ ވެރިޔާ ރޯމަން އަބްރަމޮވިޗް ފަށާފައިވާ މަސައްކަތް އޮތީ ހުއްޓާލަން ޖެހިފައެވެ. އަދި ޗެލްސީގެ މެޗުތަކަށް ޓިކެޓް ވިއްކުމާއި, ކުޅުންތެރިންގެ އެއްބަސްވުންތައް އާކުރުންފަދަ ކަންކަންވެސް ވަނީ ހުއްޓުމަކަށް އައިސްފައެވެ. އެއީ ރަޝިޔާއިން ޔުކްރެއިންގައި ހިނގަމުންދާ ހަރުކަށި އަމަލުތަކާ ގުޅިގެން, ރަޝިޔާގެ ވިޔަފާރިތަކަށް އިނގިރޭސި ވިލާތުން ފިޔަވަޅުތައް އެޅުމުންނެވެ. އިގިރޭސި ސަރުކާރުން އެޅި ފިޔަވަޅުތަކުގެ އިތުރުން ޗެލްސީގެ މެއިން ސްޕޮންސަރ ވަނީ ސްޕޮންސަރޝިޕް އެއްބަސްވުން ނިމުމަކަށް ގެނެސްފައެވެ.

އުނދަގޫ ވަގުތު ޗެލްސީ މޮޅުކޮށްދޭން ފުރަތަމަ ލަނޑު ޖެހީ މެޗު ފަށައިގެން ތިންވަނަ މިނިތްގައި ޗަލޯބާއެވެ. ދެވަނަ ލަނޑު މޭސަން މައުންޓް ޖެހީ 14 ވަނަ މިނިޓްގައެވެ. ތިންވަނަ ލަނޑު މެޗުގެ ފަހު މިނިޓގައި ޖެހީ ކައި ހަވާޓްޒްއެވެ. ނޮރިޗް ސިޓީގެ ހަމައެކަނި ލަނޑު ދެވަނަ ހާފްގައި ލިބުނު ޕެނަލްޓީއަކުން ޖެހީ ޕޫކީއެވެ.

މިމޮޅާއެކު ޗެލްސީ ލީގު ތާވަލްގެ 3 ވަނާގައި އޮތީ 27 މެޗުން 56 ޕޮއިންޓާއެކުއެވެ. ދެވަނާގައި އޮތް ލިވަޕޫލާ ދެމެދު 7 ޕޮއިންޓްގެ ފަރަޤެއް އެބައޮތެވެ, އަދި ހަތަރު ވަނާގައި އޮތް އާސެނަލްއާ ދެމެދު 8 ޕޮއިންޓްގެ ފަރަޤެއް އެބައޮތެވެ. އެކަމަކު އާސެނަލްއަށްވުރެ އިތުރަށް ޗެލްސީން ދެމެޗު ކުޅެފައިވާތީ އެފަރަޤު 2 ޕޮއިންޓަށް ކުޑަކުރުމުގެ ފުރުޞަތު އާސެނަލްއަށް އެބައޮތެވެ.