119 ކިލޯ ޑްރަގް ކޭސް: ދައުވާ ލިބޭ 3 މީހުން ޝަރީއަތް ނިމެންދެން ބަންދު

މާލެއާއި ހުޅުމާލޭގައި ފުލުހުން ނިމިދިޔަ ޑިސެމްބަރު މަހުގެ 12 ވަނަ ދުވަހު ހިންގި ޑްރަގް އޮޕަރޭޝަނުގައި އަތުލައިގަތް 119 ކިލޯގެ މަސްތުވާތަކެތީގެ މައްސަލާގައި ހިމެނޭ 3 މީހުން ޝަރީއަތް ނިމެންދެން ބަންދު ކުރުމަށް ކްރިމިނަލް ކޯޓުން އަމުރުކޮށްފިއެވެ.

މި މައްސަލައިގައި ޑައިމޯފިން ޓްރެފިކް ކުރުމުގެ ކުށުގެ ދައުވާ ދައުލަތުން އުފުލާފައިވަނީ ގދ. ހޯނޑެއްދޫ /އިރުމަތީގެ، އަޙްމަދު ސުނައިނު އާއި ގދ. ހޯނޑެއްދޫ /ގުލޭނޫރަންމާގެ، އަލީ ޒުބައިރުގެ އިތުރުން، ގދ ހޯޑެއްދޫ އަލޯރާ އަހުމަދު މުޖާހިދު މައްޗަށެވެ. މި މައްސަލައިގައި އިތުރު ބަޔަކުވެސް އޭރު ފުލުހުންގެ ބެލުމުގެ ދަށަށް ގެންދިޔައެވެ. އޭގެ ތެރެއިން ބައެއް ފަރާތްތަކުގެ މައްޗަށް މިހާރުވެސް ތަހުގީގު ކުރިއަށްދާކަން ދައުލަތުން ފާހަގަކުރެއެވެ.

މި މައްސަލައިގައި ދައުވާ އުފުލާފައިވާ ފަރާތްތައް ޝަރީއަތް ނިމެންދެން ބަންދު ކުރުމަށް ބުދަ ދުވަހުގެ އަޑުއެހުމުގައި ދައުލަތުން ވަނީ އެދިފައެވެ. ދައުލަތުން ފާހަގަކުރާ ގޮތުގައި އެ 3 މީހުންގެ މައްޗަށްވެސް ތުހުމަތު ކުރެވޭ މިންވަރަށް ހެކި ލިބިފައިވެއެވެ. އެގޮތުން މި މައްސަލައިގައި 3 ތަނަކުން މަސްތުވާތަކެތި ފެނިފައިވާއިރު، އޭގެ ތެރޭގައި ބުރުޒުމަގުން ޓެކްސީއެއް ހުއްޓުވައި ހޯދި މަސްތުވާތަކެއްޗާއި، ހުޅުމާލޭގައި ޕާކު ކޮށްފައި އޮތް ހުދު ކާރަކުން ހޯދި މަސްތުވާތަކެތިވެސް ހިމެނެއެވެ.

މި އަޑުއެހުމުގައި ދައުލަތުގެ ވަކީލާ ވަނީ މަސްތުވާތަކެތި ފެނިފައިވާ ދަބަސްތަކާއި ފޮށިގަނޑުތައް ގަތުމަށް އެމީހުން ޙަރަކާތްތެރިވި މަންޒަރުތައް ފެނިފައިވާކަމަށް ވިދާޅުވެފައެވެ. އެމީހުންނާއި ދެކޮޅަށް އިންޓެލިޖެންސް ރިޕޯޓުވެސް ހުށައަޅާފައިވާއިރު، ސީސީޓީވީ ފުޓޭޖުތަކުންވެސް އެ ފަރާތްތަކާއި މި މަސްތުވާތަކެތި ގުޅުވާލެވޭކަން ދައުލަތުން ފާހަގަކުރެއެވެ.

މި އަޑުއެހުމުގައި ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ދީބާނާޒް ފަހުމީ ވަނީ އެ 3 މީހުން ޝަރީއަތް ނިމެންދެން ބަންދު ކުރުމަށް އެކަށީގެންވާ ވަރަށް ހެއްކާއި ސަބަބު ހުރިކަަމަށް ކަނޑައަޅުއްވައި، އެގޮތަށް އަމުރު ކުރައްވާފައެވެ.

މައްސަލައިގެ ޚުލާސާއެއް:

މި މައްސަލައިގެ ތަހުގީގުން ހޯދި ހޯދުންތަކުން، އެ ޓެކްސީން ފެނިފައިވާ ތަކެއްޗަކީ ޑިސެމްބަރު 12 ވަނަ ދުވަހުގެ ފަތިހުގެ ވަގުތެއްގައި “ބަންގާ” ނަމަކަށް ކިޔާ ލޯންޗުން މާލެއަށް އެތެރެކުރި މަސްތުވާތަކެތިކަމަށް ދެނެގަނެވިފައިވެއެވެ. އަދި އެމީހުންނާއި ގުޅުންހުރި ކާރަކުން މަސްތުވާތަކެތި ހުރި 86 ރަބަރު ޕެކެޓާއި ސައިކަލެއްގެ މަޑިދަށުން 5 ރަބަރު ޕެކެޓް ހޯދާފައިވެއެވެ.

މީގެއިތުރުން ހޯނޑެއްދޫ / އަލޯރާ އަރުޝަދު ޚާލިދު (26އ) އެ ތިން މީހުންނާއި ބައްދަލުކޮށް ކަމުގެ އިރުޝާދު ދިނުމުގައި ހަރަކާތްތެރިވެފައިވާކަން ތަހުގީގަށް ފާހަގަކުރެވިފައިވެއެވެ. އަދި މާލެއަށް މަސްތުވާތަކެތި އެތެރެކުރުމަށްފަހު އަރުޝަދު ޚާލިދު އާއި މުހައްމަދު އަކްރަމް އަބްދުލް ހަންނާން ވަނީ ޑިސެމްބަރު 12 ވަނަ ދުވަހު ރާއްޖެއިން ބޭރަށްފުރައިގެންގޮސްފައެވެ.

އަދި މި މައްސަލާގައި ތުހުމަތުކުރެވޭ މީހުންގެ ތެރެއިން އަރުޝަދު ޚާލިދަކީ މަސްތުވާތަކެތި ރާއްޖެއަށް އެތެރެކުރުމުގައި އެންމެ އިސްކޮށް ހުރި ފަރާތްކަމަށް ފުލުހުން ތުހުމަތު ކުރެއެވެ.

މި މައްސަލާގައި ތުުހުމަތުކުރެވޭ އަހުމަދު ސުނައިން އާއި އަލީ ޒުބެއިރަކީ މަސްތުވާތަކެތީގެ ވިޔަފާރިކުރާކަމަށް ތުހުމަތުކުރެވިގެން 2020 ޖެނުއަރީ 30 ވަނަ ދުވަހު ހައްޔަރުކުރުމަށްފަހު، މައްސަލައިގެ ތަހުގީގު ނިންމައި ދައުވާކުރެވި މައްސަލަ ޝަރީއަތުން ސާބިތުނުވުމާއި ގުޅިގެން 2021 ސެޕްޓެމްބަރު 28 ވަނަ ދުވަހު ދޫކޮށްލާފައިވާ ދެ މީހުންނެވެ.