މުއިއްޒުގެ ސިޓީއަށް ރައީސް އޮފީހުގެ ޖަވާބު: ގޯތި ވިއްކާ ވާހަކައެއް ރިޔާސީ ބަޔާނަކު ނެތް
8 މާރިޗު 2022 | އަންގާރަ 17:58ހުޅުމާލެއިން މާލޭ ރައްޔިތުންނަށް ހިލޭ ގޯތި ދޭންޖެހޭކަމަށް މުއިއްޒު ވަނީ ވިދާޅުވެފައި
މާލެ ސިޓީގެ މޭޔަރު ޑރ. މުހައްމަދު މުއިއްޒު
މާލޭގެ ރައްޔިތުންނަށް ހުޅުމާލެއިން ގޯތި ދޫކުރަން ސަރުކާރުން ނިންމާފައިވާތީ އެކަމާ ގުޅޭގޮތުން މާލޭ ސިޓީގެ މޭޔަރު ޑރ. މުހައްމަދު މުއިއްޒު ރައީސް އިބްރާހީމް މުހައްމަދު ސާލިހަށް ފޮނުއްވި ސިޓީއަށް ރައީސް އޮފީހުން ޖަވާބު ދީފިއެވެ.
މުއިއްޒު ރައީސް ސާލިހަށް ފޮނުއްވި ސިޓީގައި ވަނީ ހުޅުމާލެއިން ގޯތި ދޫކުރާ ވާހަކައަކީ ހަގީގަތެއް ކަމަށްވާނަމަ ރާއްޖޭގެ އެހެން ރަށްރަށުގައިވެސް ހިލޭ ގޯތި ދޭ ފަދައިން، ހުޅުމާލެއިން ދޭ ގޯތިތައް މާލޭގެ ރައްޔިތުންނަށް ހިލޭ ދެއްވުމަށް ދަންނަވާފައެވެ. މި ސިޓީގެ ޖަވާބު ރައީސް އޮފީހުން ވަނީ މުއިއްޒުއަށް ފޮނުއްވާފައެވެ.
ސިޓީގެ ޖަވާބުގައި ރައީސް އޮފީހުން ބުނެފައިވަނީ, 2022 ވަނަ އަހަރުގެ ރައީސުލްޖުމްހޫރިއްޔާ އިއްވެވި ރިޔާސީ ބަޔާނުގައި، މާލޭ ރައްޔިތުންނަށް ގޯތި ދިނުމަށްހުޅުމާލެއިން މަދުވެގެން 1000 ގޯތި، ގުޅީފަޅުން މަދުވެގެން 2000 ގޯތި, އަދި ގިރާވަރު ފަޅު ހިއްކައި އެ ބިމުންވެސް ގޯތިދިނުމަށް ނިންމަވައި އެކަން އިއުލާނު ކުރައްވާފައިވާކަމަށެވެ. އަދި އެންމެ ބޭނުންޖެހިފައިވާ މާލޭގެ ރައްޔިތުންނަށް، އިންވަކިކޮށް، ދައުރު ނިމުމުގެ ކުރިން ގޯތީގެ ފަތް ހަވާލުކުރައްވާނެ ކަމަށް ރައީސުލްޖުމްހޫރިއްޔާގެ ރިޔާސީ ބަޔާނުގައި ފާހަގަކުރައްވާފައި ވާކަމަށާއި، ގޯތި ވިއްކުމާ ގުޅޭގޮތުން އެއްވެސް ވާހަކައެއް ރިޔާސީ ބަޔާނުގައި ހިމެނިފައި ނުވާކަމަށް ރައީސް އޮފީހުން ބުނެފައިވެއެވެ.
އަދި ހުޅުމާލެއިން ގޯތި ދޫކުރުމާ ގުޅޭގޮތުން މާލެ ސިޓީ ކައުންސިލުން ހުށަހަޅާފައިވާ ކަންކަން މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ސަމާލުކަމަށް ގެނެސްފައިވާކަމަށްވެސް ރައީސް އޮފީހުން ބުނެފައިވެއެވެ.
މާލެ ސަރަހައްދުގައި ދިރިއުޅޭ ރައްޔިތުންނަށް ހިލޭ ގޯތި ދޫކުރުމާ ގުޅޭގޮތުން މީގެ ކުރިންވެސް މުއިއްޒު ވަނީ ވާހަކަދައްކަވާފައެވެ. އެގޮތުން ރާއްޖޭގެ އެހެން ރަށްތަކުގެ ރައްޔިތުންނަށް ހިލޭ ގޯތި ދޫކުރާ އުސޫލުން މާލެ ރައްޔިތުންނަށްވެސް ހިލޭ ގޯތި ސަރުކާރުން ދޫކުރަންޖެހޭ ކަމަށް ޑރ. މުއިއްޒު ވިދާޅުވެފައިވެއެވެ. އަދި މާލެ ސަރަހައްދުގައި ބިން ހިއްކުމަށްފަހު ހިލޭ ގޯތި ނުދިނުމަކީ ހަމަހަމަކަން ނެތުން ކަމަށްވެސް މޭޔަރު ވަނީ ވިދާޅުވެފައެވެ.
މާލެ ސިޓީ ކައުންސިލްގެ 4 ވަނަ ދައުރުގެ ސްޓްރެޓްޖިކް އެކްޝަން ޕްލޭންގައި މާލޭގެ ރައްޔިތުންގެ ބޯހިޔާވަހިކަމާގުޅޭ ގިނަ މަޝްރޫއުތަކެއް ކުރިއަށް ގެންދިޔުމަށް ހިމަނާފައިވެއެވެ.
