11 ފަހަރު ވޯޓުލައިގެން ބ. ދޮންފަނު ކައުންސިލްގެ ރައީސާއި ނައިބު ރައީސް ހޮވައިފި
ދޮންފަނު ކައުންސިލްގެ ރައީސަކީ އަލީ ރަޝީދު
ކައުންސިލް މެންބަރުން ހުވާ ކުރުން
އެގާރަ ފަހަރެއްގެ މަތިން ވޯޓުލައިގެން ބ. ދޮންފަނު ކައުންސިލްގެ ރައީސާއި ނައިބު ރައީސް ހޮވައިފި އެވެ.
ދޮންފަނު ކައުންސިލް އިދާރާގެ ޒިންމާދާރުވެރިޔާ، މުހައްމަދު ސާލިމް އިބްރާހިމް ވިދާޅުވީ، އާދިއްތަ ދުވަހު 10 ފަހަރު މަތިން ވޯޓުލުމުން ވެސް، ރައީސާއި ނައިބު ރައީސަކު ކަނޑައެޅިފައިނުވާ ކަމަށެވެ. ކޮންމެ މެންބަރަކު ވެސް ކުރިމަތިލީ ކައުންސިލްގެ ރައީސަށް ކަމަށާއި އެހެން ނަމަވެސް ހޯމަ ދުވަހު ލޯކަލް ގަވާންމެންޓް އޮތޯރިޓީ އާއި ކައުންސިލް އިދާރާގެ އިސްވެރިން މެދުވެރިވެގެން ރައީސާއި ނައިބު ރައީސަކު ހޮވުމަށް ގޮތެއް ނިންމާފައިވާ ކަމަށެވެ.
އެގޮތުން ވަކި ވަކިން ކައުންސިލް މެންބަރުންނާއި ބައްދަލުކުރައްވައި އެކަމަށް ހައްލެއް ގެންނެވީ ކަމަށް ސާލިމް ވިދާޅުވި އެވެ.
މިއަދު ދޮންފަނު ކައުންސިލްގައި އިދާރާގައި ބޭއްވި ބައްދަލުވުމުގައި ނެގި ވޯޓުން އެ ކައުންސިލްގެ ރައީސަކަށް ހޮވިފައިވަނީ އަލީ ރަޝީދެވެ. އަދި ނައިބު ރައީސަށް ހޮވިފައިވަނީ ހުސައިން ހަފީޒު އެވެ. ދޮންފަނު ހުރިހާ ކައުންސިލަރުންނަކީ ވެސް މިނިވަން މެންބަރުންނެވެ. ރައީސާއި ނައިބު ރައީސް ކަނޑައެޅުމުގައި ދަތިތަކެއް ކުރިމަތިވީ ހުރިހާ މެންބަރުން ވެސް ރައީސް ކަމަށް ކުރިމަތިލައްވައި އަމިއްލަ ނަމަށް ވޯޓު ދެއްވުމުންނެވެ.
ދޮންފަނު ކައުންސިލްގެ ރައީސާއި ނައިބު ރައީސް ކަނޑައެޅުމުން މިހާރު ރައީސާއި ނައިބު ރައީސް ކަނޑަނޭޅި ވަނީ ނ. އަތޮޅު ކައުންސިލާއި، ށ. އަތޮޅު ކައުންސިލާއި، މ. ދިއްގަރު ކައުންސިލެވެ.
މި މައްސަލަ ހައްލު ކުރުމަށްޓަކާއި ވަކި ވަކިން ކައުންސިލްތަކަށް ގުޅައިގެން މަސައްކަތް ފަށާފައިވާ ކަމަށް އެލްޖީއޭ އިން ބުނެ އެވެ. އެލްޖީއޭ އިން ބުނީ ކައުންސިލްތަކުގައި ރައީސް އަދި ނައިބު ރައީސް ހޮވުމަށް އޮންނަނީ ހުވާ ކުރުމަށް ފަހު ބާއްވާ ފުރަތަމަ ބައްދަލުވުމުގައި ކަމަށާއި މި މައްސަލަވީ އެންމެ އަވަހަކަށް ހައްލު ކުރުމަށް މަސައްކަތް ފަށާފައިވާ ކަމަށެވެ.
ލޯކަލް ކައުންސިލް އިންތިހާބުގައި އަލަށް ހޮވުނު ކައުންސިލަރުން ހުވާކޮށްފައި ވަނީ، މިދިޔަ ހޮނިހިރު ދުވަހު އެވެ. އެދުވަހުގެ ހެނދުނުން ފެށިގެން ހަތަރު ދަންފަޅިއަކަށް ބަހާލައިގެން ކައުންސިލް މެންބަރުންވަނީ ހުވާ ކޮށް މަސްއޫލިއްޔަތާއި ހަވާލުވެފަ އެވެ.
