ޔޫކްރެއިން އާއި ރަޝިޔާގައި ތިބި ކުޅުންތެރިންނަށް ފީފާގެ ޚާއްސަ ހުއްދައެއް

ޔޫކްރެއިން އާއި ރަޝިޔާގެ ކްލަބްތަކާއެކު އެއްބަސްވުން ހަދައިގެން ކުޅެމުން އަންނަ ކުޅުންތެރިން ބޭނުންނަމަ އެއެއްބަސްވުން ވަގުތީގޮތުން ސަސްޕެންޑުކޮށް، އެދެގައުމުން ބޭރަށް ދިއުމުގެ ހުއްދަ ފުޓްބޯޅައިގެ މައި އިދާރާ ފީފާ އިން ދީފިއެވެ.

ފީފާއިން މިގޮތަށް ނިންމާފައި ވަނީ ރަޝިޔާ އާއި ޔޫކްރެއިން އާއި ދެމެދު ކުރަމުންދާ ހަނގުރާމައިގެ ސަބަބުންނެވެ. ރަޝިޔާއިން ޔޫކްރެއިންއަށް ދެމުންދާ ހަމަލާތަކާއި ގުޅިގެން މީގެ ކުރިން ފީފާ އަދި ޔުއެފާއިން ވަނީ މެޗުތަކުގައި ރަޝިޔާގެ ދިދަ އާއި ގައުމީ ސަލާމް ބޭނުންކުރުންވެސް މަނާކޮށްފައެވެ. އަދި އޭގެ ފަހުން، އެއްވެސް ބައިނަލްއަގްވާމީ މެޗެއްގައި ރަޝިޔާގެ ޓީމުތަކަށް ނުކުޅެވޭގޮތަށްވެސް ފީފާ އަދި ޔުއެފާއިން ވަނީ ނިންމާފައެވެ.

މިކަމާއި ގުޅިގެން ރަޝިޔާއިން ވަނީ ފީފާ އަދި ޔުއެފާއިން އަޅާފައިވާ ފިޔަވަޅުތައް އުވާލައި، އެގައުމުގެ އަންހެން އަދި ފިރިހެން ޓީމަށްވެސް ބައިނަލްއަގްވާމީ މެޗުތައް ކުޅެވޭ ގޮތަށް ނިންމުމަށް އެދިފައެވެ. އަދި މިއަހަރު ގަތަރުގައި އޮންނަ ވޯލްޑްކަޕްގެ ކޮލިފައިން މެޗުތަކުގައި ކުޅުމުގެ ފުރުސަތު ރަޝިޔާއަށް ދިނުމަށްވެސް އެގައުމުން އެދިފައިވެއެވެ. މި ސަސްޕެންޝަން އުވާނުލައިފިނަމަ އެމައްސަލަ ސީއޭއެސްއަށް ހުށަހަޅާނެކަމަށްވެސް އާރްއެފްޔޫއިން ނެރުނު ބަޔާނުގައިވެއެވެ.

ވޯލްޑްކަޕްގެ ކޮލިފައިންގައި މި މަހު 24 ވަނަ ދުވަހު ރަޝިޔާގެ ފިރިހެން ޓީމު ޕޮލެންޑާއި ވާދަކުރުމަށް ވަނީ ތާވަލުކުރެވިފައެވެ. މި މެޗު ކުޅުމަށް ހަމަޖެހިފައި އޮތީ ރަޝިޔާގައެވެ. އަދި މި މެޗުން މޮޅުވާ ޓީމެއް އޭގެ ފަސް ދުވަސް ފަހުން ވާދަކުރަން ޖެހޭނީ ސްވިޑެން ނުވަތަ ޗެކް ރިޕަބްލިކާއެވެ. ނަމަވެސް މި ތިން ޓީމުންވެސް ވަނީ ރަޝިޔާއިން ޔޫކްރެއިންއަށް ދެމުންދާ ހަމަލާތަކާއި ގުޅިގެން އެގައުމާއެކު ކުޅުމަށް ދެކޮޅުހަދާފައެވެ.

މީގެއިތުރުން ހަނގުރާމައިގެ ކަންކަމުގައި ބެލަރޫސްއިން ރަޝިޔާއަށް ތާއިދު ކުރުމާއި ގުޅިގެން ފީފާއިން ވަނީ ބެލަރޫސްއާއި މެދުވެސް ދަތިކުރުމުގެ ފިޔަވަޅު އަޅާފައެވެ. އެގޮތުން ބެލަރޫސް ކުޅޭ ބައިނަލްއަގްވާމި މެޗުތަކަށް ސަޕޯޓަރުން ނުވެއްދޭގޮތަށް ފީފާއިން ވަނީ ނިންމާފައެވެ.