ޓޮޓެންހަމުން ބޮޑު ތަފާތަކުން އެވަޓަން ބަލިކޮށްފި

އިނގިރޭސި ޕްރިމިއަރ ލީގުގައި ހޯމަ ދުވަހުގެ ރޭ އެވަޓަންއާއި ދެކޮޅަށް ކުޅުނު މެޗުން ބޮޑު ތަފާތަކުން ޓޮޓެންހަމް ހޮޓްސްޕާ މޮޅުވެއްޖެއެވެ.

ޓޮޓެންހަމްގެ ދަނޑުގައި ކުޅުނު މި މެޗުން އެޓީމު މޮޅުވީ 5-0 ގެ ނަތީޖާއަކުންނެވެ. މި ނަތީޖާއާއެކު ޓޮޓެންހަމަށް ވަނީ ލީގުގައި އިތުރަށް ކުރިއަށް ދިޔުމުގެ ފުރުސަތު ތަނަވަސްވެފައެވެ. ޓޮޓެންހަމް މިވަގުތު ލީގުގެ ހަތް ވަނައިގައި އޮތީ ކުޅުނު 26 މެޗުން 45 ޕޮއިންޓު ލިބިގެންނެވެ. ހަ ވަނައިގައި އޮތް ވެސްޓް ހޭމްއަށް 45 ޕޮއިންޓު ލިބިފައިވަނީ 28 މެޗު ކުޅެގެންނެވެ. އެހެންކަމުން މެޗުގެ އަދަދު ހަމަކުރާއިރު ލީގުގައި އިތުރަށް ކުރިއަށް ޖެހިލިމުގެ ފުރުސަތު ޓޮޓެންހަމަށް އެބައޮތެވެ. މިހާރު ލީގުގެ އެއްވަނައިގައި އޮތް ސިޓީއަށް ލިބިފައިވަނީ 69 ޕޮއިންޓެވެ. ދެވަނައިގައި ލިވަޕޫލް އޮތީ 63 ޕޮއިންޓު ހޯދައިގެންނެވެ.

މި މެޗުގައި ޓޮޓެންހަމްގެ ފުރަތަމަ ލަނޑަކީ އެވަޓަންގެ ޑިފެންޑަރ މައިކަލް ކީން އަތުން ބައިކޮޅަށް ވަން ގޯލެކެވެ. އެވަޓަންގެ ކީޕަރަށް ހެދުނު މިސްޓޭކެއްގެ ބޭނުން ހިފާ މެޗުގެ 17 ވަނަ މިނެޓުގައި ޓޮޓެންހަމްގެ ދެވަނަ ލަނޑު ކާމިޔާބުކޮށްދިނީ ސޮން ހިއުންގ މިންއެވެ. އެޓީމުގެ ތިންވަނަ ލަނޑާއި ފަސް ވަނަ ލަނޑު މެޗްގެ 37 ވަނަ މިނެޓާއި 55 ވަނަ މިނެޓްގައި ޖަހައިދިނީ ހެރީ ކޭންއެވެ. އަދި ޓޮޓްނަމްގެ ހަތަރު ވަނަ ލަނޑު މެޗްގެ 46 ވަނަ މިނެޓްގައި ޖަހައިދިނީ ސަރޖިއޯ ރެގިއުލޯންއެވެ.