ރާއްޖޭގެ ގައުމީ ވޮލީޓީމާއި ހަވާލުވުމަށް ބްރެޒިލްގެ ކޯޗު ސާޖިއޯ ވެލޯސޯ ރާއްޖެ އަތުވެއްޖެއެވެ.
ވޮލީބޯލް އެސޯސިއޭޝަން އޮފް މޯލްޑިވްސްއިން މައުލޫމާތުދިން ގޮތުގައި އޭނާ ރާއްޖެ އައިސްފައިވަނީ އަންގާރަ ދުވަހުގެ ހެނދުނުއެވެ. އަދި ކުރިއަށް ހުރި އިންޓަނޭޝަނަލް މުބާރާތްތަކަށް ރާއްޖޭގެ ފިރިހެން އިންޑޯ ޓީމު ތައްޔާރުކުރާނީ ސާޖިއޯކަމަށްވެސް އެ އެސޯސިއޭޝަނުން މައުލޫމާތުދިނެވެ.
މީގެ ކުރިން ގައުމީ ވޮލީ ޓީމުގެ ކޯޗެއްގެ ގޮތުގައި މަސައްކަތް ކުރަމުން އައީ މުހައްމަދު ސާޖިދު (ބޮޑުކާއްޓެ) އެވެ. މިއީ 2019 ވަނަ އަހަރުގެ ފަހުން ރާއްޖޭގެ ޓީމާއި ބިދޭސީ ޓީމާއި ބިދޭސީއަކު ހަވާލުވި ފުރަތަމަ ފަހަރެވެ. ރާއްޖޭގެ ޓީމު އިތުރަށް ކުރިއެރުވުމަށްޓަކައި ބިދޭސީ ކޯޗަކު ހަމަޖައްސާފައި މިވަނީ އެފްއައިވީބީގެ ޓެކްނިކަލް ސަޕޯޓާއި ޔޫތު މިނިސްޓްރީގެ ވަރަށް ބޮޑު އެއްބާރުލުމަކާއެކުއެވެ.
ވޮލީގައި ގިނަ ތަޖުރިބާތަކެއް ހޯދާފައިވާ ސާޖިއޯ ވަނީ ބަހްރޭން އަދި އެމެރިކާގައި ވޮލީގެ މުހިންމު މަސައްކަތްތަކެއް ކޮށްފައެވެ. އުމުރުން 54 އަހަރުގެ ސާޖިއޯ ވަނީ 25 އަހަރަށްވުރެ ގިނަ ދުވަހު ވޮލީގެ ކޯޗިންގ ދާއިރާގައި މަސައްކަތްކޮށްފައެވެ.
ބްރެޒިލްގެ އުމުރުފުރާ ގައުމީ ޓީމުތަކުގައި އެސިސްޓަންޓް ކޯޗެއްގެ ގޮތުގައި ވެސް މަސައްކަތް ކޮށްފައިވާ ވެލޯސޯ ވަނީ ދުނިޔޭގެ ލެވަލް މުބާރާތްތަކާއި ދެކުނު އެމެރިކާ ބައްރަށް ހާއްސަ މުބާރާތްތަކުގައިވެސް ކާމިޔާބީތަކެއް ހޯދައިފައެވެ. ބާސެލޯނާގައި 1992 ވަނަ އަހަރު ބޭއްވި އޮލިމްޕިކްސްއަށް ތައްޔާރުވި ބްރެޒިލްގެ އަންހެން ވޮލީބޯޅަ ޓީމަށްވެސް ވެލޯސޯ ވަނީ ވޮލެންޓިއަރ ޖޯޗެއްގެ ގޮތުގައި އެހީތެރިކަން ފޯރުކޮށްދީފައެވެ.
