ފެބްރުއަރީ މަހު ޑްރަގް ކޯޓުން 7 މައްސަލައެއްގައި ފަރުވާއިން ވަކިކުރުމަށް ޙުކުމް ކޮށްފައިވޭ

ފެބްރުއަރީ މަހު ޑްރަގް ކޯޓުން 7 މައްސަލައެއްގައި ފަރުވާއިން ވަކި ކުރުމަށް ޙުކުމްކޮށްފައިވާކަމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނެފިއެވެ.

ޕީޖީ އޮފީހުން ފެބްރުއަރީ މަހުގެ ތަފާސްހިސާބުތައް އާންމުކޮށްފައިވާއިރު، ޑްރަގް ކޯޓުން ޖުމުލަ 83 މައްސަލައެއް ނިންމާފައިވާކަން ވަނީ ބަޔާންކޮށްފައެވެ. އޭގެ ތެރެއިން 7 މައްސަލައެއްގައި ފަރުވާއިން ވަކިކުރުމަށް ޙުކުމް ކޮށްފައިވާއިރު، 48 މައްސަލައެއްގައި ފުރަތަމަ ޙުކުމް އިއްވާފައިވެއެވެ.

މީގެއިތުރުން، ޝަރުތުތަކާއެކު ފަހުގެ ޙުކުމްވެސް 24 މީހެއްގެ މައްޗަށް ކޮށްފައިވާއިރު، ޝަރުތަކާއި ނުލައި 3 މީހެއްގެ މައްޗަށް ވަނީ ފަހުގެ ޙުކުމް އިއްވާފައެވެ. މި މުއްދަތުގައި ކޯޓުގެ އިޙްތިސާސްގެ ތެރޭގައި ނުހިމެނޭ 2 މައްސަލައެއް ބޭރުކޮށްލާފައިވެސް ވެއެވެ.

ޑްރަގް ކޯޓުން ނިންމާފައިވާ މައްސަލަތަަކަށް ބަލާއިރު، ކެނެބިސް ބޭނުން ކުރުމާއި ގުޅޭ 43 މައްސަލައަކާއި، ޑައިމޯފިން ބޭނުން ކުރުމާއި ގުޅޭ 39 މައްސަލައެއްގެ އިތުރުން، ކެނެބިސް ޕެޑަލް ކުރުމާއި ގުޅޭ މައްސަލައެއްވެސް ހިމެނެއެވެ.

ފެބްރުއަރީ މަހު 43 ދައުވާއެއްވެސް ޑްރަގް ކޯޓަށް ހުށައެޅިފައިވެއެވެ.

ޑްރަގް ކޯޓު ފިޔަވައި އިތުރު ކޯޓުތަކަށް ބަލާއިރު، ވައްކަމާއި ގުޅުންހުރި 37 މައްސަލައެއް ވަނީ ނިންމާފައެވެ. އަދި ޑްރަގް ޓްރެފިކް ކުރުމާއި ގުޅޭ 5 މައްސަލައެއްވެސް ނިންމާފައިވެއެވެ. އަދި ވަކިވަކި ކޯޓުތަކަށް ބަލާއިރު، ކްރިމިނަލް ކޯޓުން 30 މައްސަލަ ނިންމާފައިވާއިރު، ޖުވެނަައިލް ކޯޓުން 4 މައްސަލަ އަދި ހުޅުމާލޭ މެޖިސްޓްރޭޓް ކޯޓުން 1 މައްސަލަ ވަނީ ނިންމާފައެވެ.

މީގެއިތުރުން، މެޖިސްޓްރޭޓު ކޯޓުތަކަށް ބަލާއިރު އެންމެ ގިނަ މައްސަލަ ނިންމާފައިވަނީ ކ.މާފުށީ މެޖިސްޓްރޭޓް ކޯޓުންނެވެ. އެއީ 10 މައްސަލައެވެ.