ބީއެމްއެލްއިން ދޫކޮށްފައިވާ ކާޑު ރަަޝިއާގައި ބޭނުން ނުކުރެވޭނެ
7 މާރިޗު 2022 | ހޯމަ 06:21ހަނގުރާމައިގެ ސަބަބުން ދުނިޔޭގެ ޕޭމަންޓް ސިސްޓަމަށްވެސް އޭގެ އަސަރުކޮށްފައިިވޭ
ރަޝިޔާ އާއި ޔޫކުރޭނާ ދެމެދު ހިނގަމުންދާ ހަނގުރާމައިގެ ސަބަބުން ދުނިޔޭގެ ޕޭމަންޓް ސިސްޓަމަށްވެސް އޭގެ އަސަރުކޮށްފައިިވޭ
ޔޫކްރެއިނާއި ރަޝިއާގައި ހިނގަމުންދާ ހަނގުރާމަ އާއި ގުޅިގެން ރަޝިއާގެ އިތުރުން ފިޔަވަޅު އަޅާފައިވާ އެހެނިހެން ސަރަހައްދުތަކުގައި ބީއެމްއެލްއިން ދޫކޮށްފައިވާ ކާޑުތައް ކަސްޓަމަރުންނަށް ބޭނުން ނުކުރެވޭނެކަމަށް ބޭންކް އޮފް މޯލްޑިވްސް (ބީއެމްއެލް) އިން ބުނެފިއެވެ.
އާދިއްތަ ދުވަހު ބީއެމްއެލްއިން ބުނީ، ރަޝިޔާ އާއި ޔޫކުރޭނާ ދެމެދު ހިނގަމުންދާ ހަނގުރާމައިގެ ސަބަބުން ދުނިޔޭގެ ޕޭމަންޓް ސިސްޓަމަށްވެސް އޭގެ އަސަރުކޮށްފައިިވާ ކަމަށެވެ. އެގޮތުން ގައުމުތަކުން އަޅަމުންދާ އިގްތިސާދީ ދަތިކުރުމުގެ ފިޔަވަޅުތަކާއި އެއްގޮތްވާ ގޮތުގެ މަތިން އަމަލުކުރުމަށް ކާޑު ނެޓްވޯކުތަކުން މަސައްކަތް ކުރަމުންދާކަން ބީއެމްއެލްއިން ފާހަގަކޮށްފައިވެއެވެ.
ބީއެމްއެލް އިން ބުނީ، ދުނިޔޭގެ އެކި ގައުމުތަކުންނާއި، ރެގިއުލޭޓްކުރާ އިދާރާތަކާއި، ބޭންކުތަކާއި، ސްވިފްޓްގެ އިތުރުން، ކާޑު ނެޓްވޯކުތަކުން އަޅަމުންދާ ފިޔަވަޅުތަކާ ގުޅިގެން ރަޝިއާގެ އިތުރުންވެސް ފިޔަވަޅު އަޅާފައިވާ އެހެނިހެން ސަރަހައްދުތަކުގައި ބީއެމްއެލްއިން ދޫކޮށްފައިވާ ކާޑުތައް ކަސްޓަމަރުންނަށް ބޭނުން ނުކުރެވޭނެކަމަށެވެ.
މީގެ އިތުރުން އެފަދަ ސަރަހައްދުތަކަށް ނިސްބަތްވާ ފަރާތްތަކުގެ ކާޑު މެދުވެރިކޮށް ކުރާ މުއާމަލާތްތަކުން ބޭންކުގެ މަރޗަންޓުންނަށް ފައިސާ ނުލިބޭނެކަންވެސް ބީއެމްއެލްއިން ފާހަގަކޮށްފައިވެއެވެ.
އަދި ކާޑުގެ މުއާމަލާތްތަކާއި މަރޗަންޓް ހިދުމަތްތަކުގެ އިތުރުން، ރާއްޖޭން ބޭރަށް ފައިސާ ފޮނުވުމާއި ބޭރުން ފައިސާ ގެނައުމުގެ ހިދުމަތަށްވެސް މި ފިޔަވަޅުތަކާއެކު އަސަރުކޮށްފައިވާކަމަށް ބީއެމްއެލްއިން ބުނެއެވެ. އެގޮތުން ރަޝިއާގެ ނުވަތަ ދަތިކުރުމުގެ ފިޔަވަޅު އަޅާފައިވާ ސަރަހައްދުގެ ބޭންކުތަކަށް ޓީޓީ ފޮނުވުމުގައިވެސް އިތުރު ވަގުތު ހޭދަވުމާއި، ނުވަތަ ޓީޓީ ނުފޮނުވޭނެ ހާލަތެއް މެދުވެރިވުންވެސް އެކަށީގެންވާކަން ބީއެމްއެލް އިން ވަނީ ފާހަގަ ކޮށްފައެވެ.
ރަޝިއާއިން ޔޫކްރެއިންގައި ކުރަމުންދާ ހަނގުރާމައާއި ގުޅިގެން ރަޝިއާއާއި ދެކޮޅަށް އެކި ޤައުމުތަކުންނާއި ބައިނަލްއަޤުވާމީ ޖަމާއަތްތަކުން ގެންދަނީ އެކި ބާވަތުގެ ފިޔަވަޅުތައް އަޅަމުންނެވެ.
