މޮނިޓަރިންގގައި މިހާރު އޮތީ 14 ރަށެއް

ކޮވިޑް-19އާ ގުޅިގެން އެޗްޕީއޭއިން މޮނިޓަރިންގއަށް ލާފައިވާ ރަށްތަކުގެ އަދަދު 14ށް ތިރިވެއްޖެއެވެ.

ރާއްޖޭގައި ޑިސެމްބަރ މަހުގެ ފަހުކޮޅުން ފެށިގެން ފެބްރުއަރީ މަހުގެ މެދެއްހާ ހިސާބަށް ކޮވިޑްގެ ހާލަތު ވަނީ ގޯސްވެފައެވެ. އެދުވަސްވަރު މޮނިޓަރިންގއަށް ލާފައިވާ ރަށްތަކުގެ އަދަދު 30ން މައްޗަށް އަރައިގެންގޮސްފައިވެއެވެ. ނަމަވެސް މާޗް މަހުގެ 4 ވަނަ ދުވަހު އާންމުކޮށްފައިވާ ލިސްޓަށް ބަލާއިރު, މިހާރު މޮނިޓަރިންގގައި އޮތީ 14 ރަށެވެ. އެންމެ ގިނަ ދުވަސްވަންދެން މޮނިޓަރިންގގައި އޮތީ ހއ. އިހަވަންދޫއެވެ. އެއީ މިދިޔަ އަހަރުގެ ޑިސެމްބަރ މަހުގެ 31 ވަނަ ދުވަހުން ފެށިގެންނެވެ.

ދެން މޮނިޓަރިންގގައި ހުރި ރަށްތަކަކީ ހދ. ނޮޅިވަރަންފަރު، ށ. ފުނަދޫ، ލ. ގަން، ހދ. ހަނިމާދޫ، ކ. ގުރައިދޫ، ހއ. ދިއްދޫ، ލ. ދަނބިދޫ، ށ. ކަނޑިތީމު، ތ. ވިލުފުށި، ރ. އަލިފުށި، ހދ. މަކުނުދޫ، އަދި ހއ. ހޯރަފުއްޓެވެ.

ރާއްޖޭގައި މިހާރު ދުވާލެއްގެ މައްޗަށް ކޮވިޑް ޖެހޭ މީހުންގެ އަދަދު ވަނީ 500ން ދަށަށް ގޮސްފައެވެ.