ކަމެއް ދިމަވެދާނެ ހާލަތެއްގައި އަމަލުކުރާނެ ގޮތްތަކަށް އަހުލުވެރިކުރުވުމަށް އެއަރޕޯޓް އެމަރޖެންސީ އެކްސަރސައިޒްގެ ނަމުގައި މޯލްޑިވްސް އެއާރޕޯޓްސް ކޮމްޕެނީ ލިމިޓެޑް (އެމްއޭސިއެލް) އިން ތަމްރީނު ހަރަކާތެއް ފެށުމަށް ނިންމައިފިއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަމުން އެއާރޕޯޓް އެމަރޖެންސީ ސަރވިސް އެސޯސިއޭޓް ޖެނެރަލް މެނޭޖަރު މުހައްމަދު މަސީހު ވިދާޅުވީ އެމަރޖެންސީ ހާލަތެއް ދިމާވެއްޖެނަމަ އެކަމުގައި ހަރަކާތްތެރިވާނެ މުއައްސަސާތަކާއި އެއިދާރާތަކުގެ ދައުރުވެސް މި ހަރަކާތުގެ ތެރެއިން އެނގިގެންދާނެ ކަމަށެވެ. އަދި މި މަސައްކަތްތައް ވަޒަންކުރެވި، މަސައްކަތުގައި ދިމާވާ ދަތިތަކާއި، ރަނގަޅުކުރަންޖެހޭ ކަންތައްތައް ފާހަގަކުރުމަކީވެސް މި ހަރަކާތުގެ ވަރަށް މުހިންމު މަގުސަދެއްގެ ގޮތުގައި މަސީހު ވިދާޅުވިއެވެ.

ދައުލަތުގެ އެކި އިދާރާތަކާއި އެމްއޭސީއެލް އިން ގުޅިގެން ކުރިއަށްގެންދާ މިހަރަކާތުގައި ޖުމްލަ 28 މުއައްސަސާއަކުން ބައިވެރިވާނެއެވެ. އަދި މި ތަމްރީނުގައި 28 މުއައްސަސާއިންވެސް އަދާކުރަމުންދަނީ ތަފާތު ދައުރެއްކަން ފާހަގަކުރައްވާ މަސީހު ވިދާޅުވީ ގިނަ އިދާރަތަކަކުން ގުޅިގެން މި ކުރާ މަސައްކަތުގެ ސަބަބުން ކަމެއް ގޯސްވެއްޖެ ނަމަ އާންމު ހާލަތަށް ރުޖޫއަވުމަށް ފަސޭހަވެގެންދާނެ ކަމަށެވެ.

ރާއްޖެއަކީ ފަތުރުވެރިކަމަށް ވަރަށް ބޮޑަށް ބަރޯސާވެފައި އޮންނަ ޤައުމަކަށް ވާއިރު، އެއާރޕޯޓުގައި ކުއްލި ނުރައްކާތެރި ހާދިސާއެއް ހިނގައިފިނަމަ އޭގެ ސަބަބުން އެންމެ ބޮޑު ގެއްލުމެއް ވާނީ ރާއްޖޭގެ އިގްތިސާދަށާއި މި ދާއިރާގައި މަސައްކަތްކުރާ ފަރާތްތަކަށް ކަމަށް މަސީހު ވިދާޅުވިއެވެ. މަސީހު ވިދާޅުވީ މި ތަމްރީނުގެ ސަބަބުން މައްސަލަތައް އަވަހަށް ހައްލުކުރެވި، މިފަދަ ގެއްލުންތައް ކުޑަކުރެވިގެންދާނެ ކަމަށެވެ.

މި ހަރަކާތް ކުރިއަށް ގެންދިޔުމަށް ހަމަޖެހިފައިވަނީ މާރޗު މަހުގެ 16 ވަނަ ދުވަހުގެ ހަވީރު 16:00 އިން 18:00 އަށެވެ.